Ижкар+14 °C
14 -тӥ гудырикошкон 2020 Удмуртарня
16+

Удмурт кылбуретлы но прозалы сӥзем выль антологиосын тодматозы Ижкарын

  • 652
  • 0
Ижкар / Удмуртия
Удмурт кылбуретлы но прозалы сӥзем выль антологиосын тодматозы Ижкарын
Туспуктэм: Алексей Арзамасцев

17-тӥ тулыспалэ, Анай кыллэн калыккуспо нуналэз азьын, Ижкарысь Калыкъёслэн эшъяськон юртазы «Туала удмурт поэзия» но «Туала удмурт проза» антологиосын тодматон ортчоз. Со сярысь «Удмуртия» издательстволэн «ВКонтакте» мерлыко вотэсысь бамаз ивортэмын.

Книгаосты поттон бордын ужамзы сярысь «Удмуртия» книгапоттоннилэн кивалтӥсез Юрий Кузнецов но антологиосты люкась-радъясь, издательствоысь чеберлыко литературая редактор, удмурт кылбурчи но прозаик, Россиысь гожъясьёслэн огазеяськонзылэн ёзчиез Сергей Матвеев вералозы

Презентация улсын кылбуръёс, кырӟанъёс, бичетъёсы пырем произведениосысь люкетъёс чузъяськозы.

Со сяна, ужрадын Удмуртиысь йӧскалык лыдӟетъюртлэн фондъёсысьтыз книгаосын «Туала удмурт литература» адӟытон ужалоз. Отын гожъяськисьёслэсь пӧртэм аръёсы огазьын потэм бичетъёссэс возьматозы. Озьы ик тодматоно книгаосы пырем авторъёслэн берпуметӥ книгаоссы луозы.

Ужрад удмурт кылын мыноз. Отчы вань мылкыд карисьёсты ӧтё. Кутсконэз 16 часын. Пыронэз дунтэк.

Пусъём, антологиосты Удмуртилэн кунлыкезлы 100 ар тырмонэз пусъён улсын элькун кивалтэтлэн юрттэменыз поттӥзы. Туэ издательство эшшо одӥг антология дася – «Туала нылпи литература».

Тодэ вайытом, «Туала удмурт поэзия» но «Туала удмурт проза» книгаосы 74 авторъёслэн ужъёссы пыризы: 42 кылбурчиослэн но 32 прозаикъёслэн.



Наверх
Вниз