Ижкар+18 °C
6 -тӥ гудырикошкон 2020 Покчиарня
16+

Патриот мылкыдо удмурт кырӟан гожтонъя вожвылъяськон мынэ Удмуртиын

  • 1333
  • 0
Ижкар / Удмуртия
Патриот мылкыдо удмурт кырӟан гожтонъя вожвылъяськон мынэ Удмуртиын
Туспуктэм: Руслан Нурихаметов

Быдӟым Атыкай ожын Вормонлы 75 ар тырмон азьын «Мынам Удмуртие» радиоын ужасьёс патриот мылкыдо удмурт кырӟан гожтонъя «Быдӟым вормонлы сӥзисько» вожвылъяськон ялӥзы. Со сярысь Удмуртиысь печатья но калыке ивортодэт вӧлмытонъя агентстволэн пресс-службаез ивортэ.

Вожвылъяськонлэн валтӥсь ужпумез - кырӟан гожъясьёслэсь но кырӟасьёслэсь удмурт кылын выль ужъёс кылдытыны мылкыдзэс лӧпкытон. Кырӟанъёссы шаерез яратонлы, ас калыксылэсь чеберзэ, лулкужымзэ данъянлы сӥземын луыны кулэ. Соос пиналъёслэсь но, мӧйыослэсь но ас шаеренызы, ас калыкенызы данъяськон мылкыдъёссэс мед улӟытозы, Вормон нунал понна ожын но ужын тыршем калыкез сӥлы мед карозы

Вожвылъяськонэ 12 арескысен нимаз кырӟасьёс но, коллективъёс но пыриськыны быгато. Кырӟан гожтӥсьёс но, быдэсъясьёс но кырӟанзэс ас чотазы яке ёроссылэсь, гуртсылэсь, муниципал кылдытэтсылэсь, предприятизылэсь, удысэтсылэсь шуыса келяны быгато.

Конкурс кык люкетэн ортчоз: заочной но очной.

Заочной люкетэ пыриськон понна 15-тӥ южтолэзёзь куараен гожтэм кырӟанъёсты vormon75@yandex.ru электрон почтае келяно. Очной люкетаз тужгес усто ужъёсты быдэстӥсьёсты ӧтёзы, со южтолэзь пумын-оштолэзь кутсконын ортчоз. 

Вормисьёсты жюри быръёз. Солэн ёзчиосыз пӧлын вожвылъяськонэз радъясьёс, ӧнерлыко крезьгурчиос но кылбурчиос луозы. Озьы ик 28-тӥ южтолэзе вожвылъяськонлэн йылпумъян концертаз учкисьёс но куаразэс сётозы.

Жюрилэн ёзчиосыз куинь тужгес усто кырӟанъёсты быръёзы. Со сяна, учкисьёслэсь тужгес трос куаразэс люкам кырӟанэз но пусъёзы. Ваньзы соос коньдон кузьым басьтозы. Котькуд пыриськисьлы «Быдӟым вормонлы сӥзисько» вожвылъяськонэ пыриськемез сярысь сертификат сётозы.

Вормисьёслэн кырӟанъёссы Вормон нуналэ «Мынам Удмуртие» радиоын чузъяськозы

Вожвылъяськонлэн куронъёсыныз чӧлсконпусъя пыр-почгес тодматскыны луэ.

Пусъём, «Быдӟым вормонлы сӥзисько» вожвылъяськонэз нырысьсэ 2015-тӥ арын Быдӟым Атыкай ожын Вормонлы 70 ар тырмонлы ортчытӥзы вал. Конкурс шаерез гажан мылкыдо удмурт кырӟанъёс туж кулэ шуыса возьматӥз. 



Наверх
Вниз