Ижкар+16 °C
4 -тӥ пӧсьтолэзь 2020 Кӧснунал
16+

Вӧсьбур кырӟанъя «Ингерд» группа кылдытӥзы Алнаш ёросын

  • 1307
  • 0
Байтэрег / Удмуртия
Вӧсьбур кырӟанъя «Ингерд» группа кылдытӥзы Алнаш ёросын
Туспуктэм: vk.com ("Алнашский колхозник"/ "Алнаш куара")

Алнаш ёросысь Байтерег гуртын вӧсьбур (духовной) кырӟанъя «Ингерд» группа кылдытӥзы. Со сярысь ивортодэтъя «Удмуртия» агентстволэн корреспондентэзлы группаын огез кырӟась, Байтерегысь гурт лыдӟетъюртысь библиотекарь Алевтина Тарасова вераз.

Байтерег гуртысь библиотека 2014-тӥ арысен ини «Православный вестник» программая ужа. Со улсын арлы быдэ православилы сӥзем пӧртэм-пӧртэм ужрадъёс ортчытъя.

Ми ӵош ужаськом Ӟуння гуртысь протоиереен Виталий Александровен. Со Ӟуннялась настоятель Староюмьинского храма Покрова Пресвятой Богородицы. Соосын ӵош ми валче улӥськом, валче ужрадъёс ортчытъяськом. Нылпиослы но, бадӟымъёслы но, пинал семьяослы но ортчытъяськом сыӵе ужрадъёс
Алевтина Тарасова, Байтерегысь гурт лыдӟетъюртысь библиотекарь

Алевтина Тарасовалэн верамезъя, вӧсьбур кырӟанъёсты соос ужазы азьвыл ик кутылӥзы вал ини, нош ньыль толэзь талэсь азьло группа кылдытыны кариськизы.

Ми клубын ужасьёсын ӵош кырӟалляськом вал ини сыӵе кырӟанъёсыз, но милям асьме понна гинэ уг луы сое. Ми тодӥськом вал, черк старостамылэн Надежда Котковалэн лулчеберет удысын дышетскемез шуыса, со ачиз гожъя кырӟанъёс но, кылбуръёс но. Тӥни соин ӵош кенешыса, ми озьы группа люкамы
Алевтина Тарасова, Байтерегысь гурт лыдӟетъюртысь библиотекарь

Группае Актэмыр но Байтерег гуртъёсысь сизьым нылкышноос пыризы. Кивалтӥсе черксылэсь старостазэ Надежда Котковаез бырйизы. Алевтина Тарасовалэн кылъёсызъя, ваньзы ик кырӟасьёс туж лякытэсь, мыло-кыдоесь, Инмарлы оскисьёс. Та группаез но соос калыкез умоез пала берыктон понна шуыса малпазы.

Калыкъёслы вуттыны Инмар сярысь чебер кырӟанъёсыз. Ӧжыт ке но адямилэн сюлэмыз мед ӟечлы берыктӥськоз. Асьмелэн али улонмы секыт, лек но шуыны луэ, соин ик сыӵе группа милям кылдытэммы потӥз
Алевтина Тарасова, Байтерегысь гурт лыдӟетъюртысь библиотекарь

Группазэс нылкышноос «Ингерд» нимазы.

Герд – со герӟась. Гердлэн словарьын трос валэктонэз. Ми адямиез герӟаськом инэн, сыӵе кырӟанъёсыз кырӟаса, Инмар сярысь, Инмар Анай сярысь
Алевтина Тарасова, Байтерегысь гурт лыдӟетъюртысь библиотекарь

Группае пыриськисьёс асьсэлы чебер дӥсьёс но вуризы, асьсэос коньдон бичазы, лыз но чагыр басма басьтӥзы. Вераны кулэ, дэремъёссылы сыӵе буёлэз юнме шорысь ӧз быръе.

Малы со сыӵе ин буёло, малы ке шуоно Покрова Пресвятой Богородицы праздниклэн лыз буёлэз, соин ик, милям черкмы сыӵе бере, ми сыӵе буёлъёсын вераським
Алевтина Тарасова, Байтерегысь гурт лыдӟетъюртысь библиотекарь

Кемалась ӧвӧл кырӟасьёс Ымусьтонлы сӥзем программа улсын Муважи школаын, арлыдоослэн юртазы, Актэмырысь, Ӟунняысь часовняосын кырӟазы. Котькытын но соосты туж шуныт пумитазы.

Ми малпаськом, адямилы кулэ али сыӵе кырӟанъёс. Тани ми ветлӥмы бигер улосысь Тэремшур гуртэ, ми отчы коньывуон толэзе ветлӥм, <…> ай группамы соку гинэ кылдӥз вал ай. Отын ми кык кырӟан кырӟамы. Сыӵе отзывъёссы вал! Адямиос шуо, тӥлесьтыд, пе, кырӟанъёстэс кылзыса, синкыли, пе, ачиз кошке, бӧрдыса, пе, кылзӥськиськом. Муважи школаын но «мурашки по коже» шуо дышетӥсьёссы, сыӵе, пе, кырӟанъёсты
Алевтина Тарасова, Байтерегысь гурт лыдӟетъюртысь библиотекарь

Нылкышноос удмурт но, ӟуч но кылын кырӟанъёс быдэсъяло. Алевтина Тарасовалэн кылъёсызъя, удмурт кырӟанъёссэс троссэ кивалтӥсьсы Надежда Коткова гожтэ - кылъёссэ но, гурзэ но. Нош ӟучъёссэ вотэсысь утчало, отысь ик минусовкаос но, фонограммаос но шедьто. Со сяна, а капелла но кырӟало.

Милям ӧвӧл баянчимы. Соин ик ӧжыт ке но разнообразить карыны тыршиськом. Но куке ветлӥмы вал арлыдоослэн юртазы, отын ужасьёссы шуизы, тӥляд, пе, арганчитэк но сыӵе чебересь кырӟанъёсты
Алевтина Тарасова, Байтерегысь гурт лыдӟетъюртысь библиотекарь

Кырӟаны люкаськылэм сяна, «Ингердэ» пыриськисьёс мукет ужрадъёс но ортчытъяло: библиотекаын пумиськыло, книгаос сярысь, шулдыръяськонъёс сярысь верасько. Кемалась ӧвӧл, «Пельняньлэн дунневыл нуналэз» фестивале пыриськизы. Библиотекаын люкаськыса, пельнянь кутӥзы, видео лэсьтӥзы. 

Тодэ вайытом, Быдӟым Атыкай ожын Вормонлы 75 ар тырмон азьын Удмуртиын патриот мылкыдо удмурт кырӟан гожтонъя «Быдӟым вормонлы сӥзисько» вожвылъяськон ялӥзы.



Наверх
Вниз