100 лет государственности Удмуртии
Ижкар+8 °C
3 -тӥ инвожо 2020 Вирнунал
16+

2020-тӥ ар понна удмурт кылын тужгес кужмозэ чеберлыко литература ужез шараянъя вожвылъяськон ялӥзы Удмуртиын

  • 438
  • 0
Ижкар / Удмуртия
2020-тӥ ар понна удмурт кылын тужгес кужмозэ чеберлыко литература ужез шараянъя вожвылъяськон ялӥзы Удмуртиын
Туспуктэм: Алексей Арзамасцев

Удмуртиысь Печатья но калыке ивортодэт вӧлмытонъя агентство но «Кенеш» журналлэн редакциез 2020-тӥ ар понна удмурт кылын тужгес кужмозэ чеберлыко литература ужез шараянъя вожвылъяськон ялӥзы. Со сярысь «Кенеш» журналлэн «ВКонтакте» мерлыко вотэсысь бамаз ивортэмын.

Вожвылъяськон сизьым номинациосъя мыноз:

  • Тужгес умоез кузьмадёс, роман;
  • Тужгес умоез верос, новелла, чеберлыко очерк, эссе;
  • Тужгес умоез кылбур сузьет, поэма;
  • Тужгес умоез пьеса;
  • Пиналъёслы гожтэм тужгес умоез уж;
  • Чеберлыко литература ужез (ужъёсты) дунъясь яке литература тодосъя тужгес умоез гожтос;
  • Удмуртысь ӟуч кылэ берыктэм тужгес кужмоез уж (пӧртэм жанрен).
Ужъёссэс Удмуртиын но солэн палэназ улӥсь удмурт кылын гожъяськись пӧртэм арлыдъем авторъёс келяны быгато.
Вормисьёсты 15-30 сюрс манет коньдон кузьымъёсын пусъёзы

Вожвылъяськонэ ыстэм ужъёслэн темазы но быдӟалазы котькыӵе луыны быгатэ. Котькуд авторлэн одӥг яке тросгес ужъёссэ (мукет авторен ӵош гожтэмъёссэ но) пӧртэм номинациосы сётыны луонлыкез вань, но одӥг автор одӥг литература удысъя (номинация) гинэ вормись луыны быгатэ.

Азьвыл нимаз книгаен потэм яке бичетъёсын, газет-журналъёсын печатлам ужъёс, Интернет вотэс бамъёсын дунтэк потэмъёссэ вератэк, вожвылъяськонэ уг кутӥсько.

Жюри ёзчиос нырысь ик авторъёслэсь ӝутэм ужпумъёсты чеберлыко, аспӧртэмлыко возьматыны быгатэмзэс, тунсыко сюжет кылдытыны тыршемзэс, жанрлэсь куронъёссэ лыдэ басьтэмзэс, сое узырмытэмзэс, чеберлыко литература кылын гожтыны быгатэмзэс чаклалозы.

Ужъёсты туэ 10-тӥ шуркынмонозь «Кенеш» журналлэн редакцияз (Ижкар, Пастухов урам, 13 номеро юрт) яке Kenesh-udm@yandex.ru электрон почтаяз ыстоно.

Йылпумъянъёс 2021-тӥ арын толшоре лэсьтозы

Вожвылъяськонлэн куронъёсыныз пыр-почгес тодматскыны «Кенеш» журналлэн туэ понна 2-тӥ номерзэ басьтыса, Печатья но калыке ивортодэт вӧлмытонъя агентстволэн но «Кенеш» журналлэн сайтъёсазы, журналлэн «Одноклассники», «ВКонтакте» мерлыко вотэсъёсысь бамъёсаз пырыса быгатӥськоды. 

Тодэ вайытом, кылем ар понна вожвылъяськонэ 85 адями пыриськиз.



Наверх
Вниз