100 лет государственности Удмуртии
Ижкар+3 °C
30 -тӥ южтолэзь 2020 Вордӥськон
16+

«Секреты удмуртских мастеров» книгаен тодматӥзы Ижкарын

  • 726
  • 0
Ижкар / Удмуртия
«Секреты удмуртских мастеров» книгаен тодматӥзы Ижкарын
Туспуктэм: Майя Бывальцева

Ижкарын удмуртъёслэн киужъёссы но кибашлыос сярысь «Секреты удмуртских мастеров» книгаен тодматӥзы. Бичетэз Удмуртилэн кунлыкезлы 100 ар но Удмурт комиссариатлэн издательской ужъя ёзэтаз нырысетӥ книгаос потэм дырысен 100 ар тырмонлы сӥзьыса поттӥзы.

Книга бордын «Удмуртия» издательствоысь ӧнерчиос ньыль ар ужазы. Кызьы вераз книгапоттоннилэн валтӥсь редакторез, книгалэн радъясез Георгий Грязев, татчы азьвыл аръёсы потэм пӧртэм книгаосысь материалъёсты пырыен-пырыен бичазы, со аспӧртэм веме выллем луиз.

Татын куинь даур возьматӥськемын: 19-тӥ даурын кутӥськись арбериосмы удмуртъёслэн но, вашкалаосыз вылэ пыкиськыса, туала вакытэ лэсьтэм арбериос. Со туж шумпотымон, со возьматэ, азинске шуыса асьмелэн культурамы, азинско киужъёсмы. Озьы адӟиськод ке, данъяськем потэ аслад калыкеныд, аслад культураеныд
Георгий Грязев, «Удмуртия» издательстволэн валтӥсь редакторез, книгаез радъясь

Бичетын уйпал но лымшор удмуртъёслэн, озьы ик бесерманъёслэн юртъер котырын кутӥськись арбериоссы, дӥськутсы возьматэмын. Нимаз люкетэз али ужась кибашлыослы сӥземын. Кылсярысь,элькунамы куиськисьёслэсь школазэс кылдытӥсьлы но азинтӥсьлы Альбина Едыгаровалы.

«Секреты удмуртских мастеров» книгаен тодматон

14 фото

Нимысьтыз саклык висъямы со кибашлыослы, кинъёс асьме элькунлэсь «Признание» премиен пусъемын. Соосты юри асьсэ ужъёсынызы, туспуктэмъёсынызы пыртӥм книгалэн пумаз, асьмелэн пиналъёсмы но, мукетъёсыз но мед тодозы шуыса, кинъёс азьланьто, кинъёс туннэ но ужало та калык творчествоез азинтонын
Георгий Грязев, «Удмуртия» издательстволэн валтӥсь редакторез, книгаез радъясь

Та книга туж бадӟым кузьым, солэн бамъёсыз пӧртэм выжыысь калыкъёсты быдэс удмурт калыкен тодмато, пусйиз Кун Кенешысь тодосъя, дышетонъя, лулчеберетъя, йӧскалык но егитъёсын ужан политикая но спортъя ялан ужась ӧрилэн кивалтӥсез, «Удмурт Кенеш» огазеяськонлэн тӧроез Татьяна Ишматова.

Книга <…> котькуд адямилы удмурт лулчеберетлэсь сюлэмзэ усьтоз, малы ке шуоно асьмеос кырӟанъёс пыр, кылбуръёс пыр синмаськиськом калыклы, но вылтусыз ке ӧй луысал, пуштросэз ке ӧй луысал, кудӥз герӟаськемын вашкала сямъёсын, вашкала быгатӥсь адямиосын утем ужан амалъёсын, сое секыт луысал, дыр, али возьматыны
Татьяна Ишматова, Кун Кенешысь тодосъя, дышетонъя, лулчеберетъя, йӧскалык но егитъёсын ужан политикая но спортъя ялан ужась ӧрилэн кивалтӥсез, «Удмурт Кенеш» огазеяськонлэн тӧроез

Ми, удмуртъёс, туж шудоесь, малы ке шуоно ми туж узыресь, вераз Удмуртиысь йӧскалык политикая министр Лариса Бурнова. Нош шудмы но узырлыкмы валтӥсез бордын – ми туж ӝикыт утиськомы сое, мае асьмелы сётӥзы анай-атайёсмы, песянай-песятайёсмы, соин ик со туннэ но улэ но азинске, пусйиз кивалтӥсь.

Та книгалэн авторез – удмурт калык. <…> Вашкалазэ, калыклэсь сямъёссэ, озьыен, зэмлыкозэ, озьы гинэ, мынон-ветлон куспын, уд адӟы. Солы дыр кулэ, солы улонэдлэсь кӧня ке дырзэ висъяны кулэ – пуксьыны та чебер книгаен но синмаськыны калыклы. Малпасько, та книгалэн сыӵе адӟонэз, солэн бадӟым улонэз
Лариса Буранова, Удмуртиысь йӧскалык политикая министр

Мыным йӧтэ, со туж кие кутымон, ушъяськымон продукт луэм, кудӥз ке кылёз историе. Малы ке шуоно удмуртлыкез таӵе яркыт, пӧртэм ласянь усьтӥсь книгаос асьмелэн трос ӧвӧл. <…> Шумпотӥсько, таӵе уж, огъя уж, пишмиз шуыса
Владимир Соловьёв, Удмуртиысь лулчеберетъя министр

Книга «Секреты удмуртских мастеров» нимаське бере, юатэк ӧм чидалэ: нош мар бордын удмурт кибашлыослэн секретсы. Со понна бичетэз «учконо, лыдӟоно, сюлэм пыртӥ поттоно, соку валалод секретсэ», мыняса вераз Георгий Грязев.

Пусъём, книгаен тодматон ужрадэз туж узырмытӥзы но яркытгес каризы фольклор кырӟанъя но эктонъя «Айкай» театр но «Шаркан трикотаж» огазеяськонлэн вашкала йылолъёс вылэ пыкъяськыса кылдытэм дӥськутъёссэ возьматон. Со сяна, Удмуртиысь йӧскалык лыдӟетъюрт «Удмуртия» издательствоын пӧртэм аръёсы потэм калык киужъёслы сӥзем книгаосын адӟытон радъяз. Озьы ик «Секреты удмуртских мастеров» книгаез кылдытонэ пыриськем муртъёслы данъетъёс сётӥзы.

Тодэ вайытом, Удмуртилэн кунлыкезлы 100 ар тырмон улсын «Удмуртия» издательство «Туала удмурт поэзия» но «Туала удмурт проза» антологиосӟуч-удмурт кыллюкам поттӥз ни, нош азьвылгес калык пӧраськонлы сӥзем «Удмуртская народная кухня» книгаез вуизз.



Наверх
Вниз