100 лет государственности Удмуртии
Ижкар+8 °C
3 -тӥ инвожо 2020 Вирнунал
16+

Патриот мылкыдо удмурт кырӟанъя вожвылъяськонлэн йылпумъянэз радиолэн меӵак эфираз ортчоз

  • 175
  • 0
Ижкар / Удмуртия
Патриот мылкыдо удмурт кырӟанъя вожвылъяськонлэн йылпумъянэз радиолэн меӵак эфираз ортчоз
Туспуктэм: Григорий Фомин

Быдӟым Атыкай ожын Вормонлы 75 ар тырмонлы сӥзем патриот мылкыдо удмурт кырӟанъя «Быдӟым Вормонлы сӥзисько» вожвылъяськонлэн Ижкарысь кун филармониын радъяны чаклам финалэз «Мынам Удмуртие» радиолэн меӵак эфираз ортчоз. Сыӵе пумкылъян коронавирус инфекци вӧлмонэз алон понна кутӥзы, иворто радъясьёс.

Элькунысь каръёсысь но ёросъёсысь нимаз кырӟасьёслэсь но коллективъёслэсь 40-лэсь трос куриськонъёс вуизы. Соос пӧлысь ӧнерлыко жюри 28 устооссэ бырйиз.

Ваньзэ соосты 28-тӥ южтолэзе 14 часысен «Мынам Удмуртие» радиолэн меӵак эфираз кылзыны луоз. Вань мылкыд карисьёс кельшем кырӟан понна СМС пыр куара сётыны но «Приз зрительских симпатий» номинациын вормисез бырйыны юрттозы. Озьы ик меӵак эфирын ӧнерлыко жюри но тужгес кужмооссэ ужъёсты шараялоз. 

Пусъём, жюрие кылбурет но крезьгур удысысь тодмо адямиос пыро:

  • Марина Ходырева - Удмуртиысь крезьгурчиослэн огазеяськонзылэн тӧроез;
  • Семён Байкузин - эктонъя но кырӟанъя «Италмас» академ кун ансамбльлэн хормейстерез;
  • Валентина Пудова -Удмурт Элькунысь калык артистка;
  • Виктор Шибанов - кылбурчи, литератураез эскерись, кылосбур тодосъя кандидат;
  • Анастасия Шумилова - кылбурчи, журналист.

Со сяна, финалэ потэм вань кырӟанъёсты «Мынам Удмуртие» телераокомпанилэн нимлыко вотэсбамаз но вожвылъяськонлэн «ВКонтакте» мерлыко вотэсысь огиназ поттозы. Отын но соос понна куара сётыны луоз. 

Коронавирус инфекци вӧлмонэз алон вылысь но Удмуртиысь тӧролэн трос калыко ужрадъёсты ортчытонлэсь возиськыны косэмезъя элькунысь кун филармони «П. И. Чайковскийлэн шаераз» искусствоосъя фестивальлэн радлыказ воштонъёс пыртӥз.



Наверх
Вниз