100 лет государственности Удмуртии
Ижкар+8 °C
3 -тӥ инвожо 2020 Вирнунал
16+

Татарстанысь Кукмор ёросысь удмурт калык ансамбль вормиз калыккуспо фестивальын Сочиын

  • 356
  • 0
Сочи / Россия
Татарстанысь Кукмор ёросысь удмурт калык ансамбль вормиз калыккуспо фестивальын Сочиын
Туспуктэм: vk.com (Фестиваль-конкурс НАРОДНЫЕ ИСТОКИ)

Татарстанысь Кукмор ёросысь «Инвожо» калык ансамбль йӧскалык лулчеберетъёсъя но фольклоръя «Народные истоки» эктон-кырӟанъя калыккуспо фестиваль-вожвылъяськонын вормиз. Ужрад 12-16 южтолэзе вить нунал ӵоже Сочиысь Дагомыс шутэтскон интыын ортчиз. Со сярысь ивортодэтъя «Удмуртия» агентстволэн корреспондентэзлы «Инвожо» ансамбльлэн кивалтӥсез Геннадий Ахметов вераз.

«Инвожо» ансамбль вожвылъяськонын «Семык возь» удмурт шулдыръяськонэз возьматӥз. Геннадий Ахметовлэн верамезъя, со Кукмор ёросысь Вуж Каньсар гуртын гинэ ортчылӥз.

Праздникын люкаськемъёс шулдыръяськиллям, шудӥллям пӧртэм шудонъёсын: валъёс вылын ӵошатскон, круген шудонъёс, эктонъёс. Котькудӥз ассэ умой паласен гинэ возьматыны тырше вылэм, уго татын егитъёслы вань вал луонлык тодматскыны, ог-огзылы пар шедьтыны, выль кен но лушканы
Геннадий Ахметов, «Инвожо» ансамбльлэн кивалтӥсез

Шулдыръяськон пумын, быдэс арлы ӟеч малпанъёссэс вераса, ваньзы изьыоссэс вылӥе лэзьяллязы. Праздник йылпумъяськыса но гуртазы бертыны ӧз дыртылэ. Урам кузя кырӟаса, арганэн шудыса ветлӥзы, котькуд азбаре пыразы. Озьы корка кузёослы умой улон сӥзьылӥзы.

Та йылолэз возьматонэнызы инвожоос «фольклор» номинациын 1 степенё лауреатъёс луизы. Озьы ик соосты нимысьтыз «За сохранение народных и фольклорных традиций» пусйизы но туэ Белоруссиысь Минскын ортчоно «Платформа» калыккуспо вожвылъяськонэ пыриськыны 10 сюрс манет тыр грант сётӥзы.

Геннадий Ахметов пусъе, та выллем вожвылъяськонъёсы, оло, куать пол пыриськизы ини шуыса. Сочие но нырысьсэ ӧз вуылэ. Коллективзылэсь тыршемзэ котьку вылӥ дунъяло. Вормонъёссылы луыса Москвае но ветлӥзы ини.

Фольклор конкурс – со тунсыко но аспӧртэм сям-йылолъёс, вашкала вунэм праздникъёс, эктонъёс, кырӟанъёс, яркыт котюмъёс, усто коллективъёс. Котькуд фестивальысь ми паймыса бертӥськом, кыӵе азьмелэн шаермы узыр шуыса. Котькуд адямилы синмаськиськом, кин тырше ваньзэ сое утьыны но азьланьтыны
Геннадий Ахметов, «Инвожо» ансамбльлэн кивалтӥсез

Таӵе фестивальёс туж бурдъяло, шуэ ансамблен кивалтӥсь. Астэ, калыкедлэсь йылолъёссэ возьматыны, мукет адямиосын тодматскыны, шутэтскыны луонлык сёто.

Таӵе луонлыкъёс вань дыръя эшшо но эшшо ужам потэ. Вужзэ выльдэм, тодэмзэ паськытатэм. Пересьёсмы кошко, соосын ӵош сям-йылолъёс вуно. Бадӟым узырлыкмы ыше шуыны луоз. Соин ик таӵе фестивальёс яркыт возьмато, вашкалаез утёно шуыса. Нош фольклор ансамбльёс ке ӧз, кин на?
Геннадий Ахметов, «Инвожо» ансамбльлэн кивалтӥсез

Ужрадэ Россилэн пӧртэм сэрегъёсысьтыз 62 коллективъёс, оглом 1 сюрс 600 адями, пыриськизы

Инвоожоос Сочие 16 кузя ветлӥзы – пиналысен мӧйыозь. Мукет люкаськем коллективъёсын экскурсиосы потазы, шутэтскизы, вожвылъяськонлы дасяськизы но асьсэзыз сцена вылын возьматӥзы. Со сяна, соос понна пӧртэм мастер-классъёс ортчизы.

Жаляса верано, дуннеын кылдэм югдурен йырин кунгож сьӧрысь куноос вуыны ӧз быгатэ. Азьло аръёсы Казахстанысь, Эстониысь коллективъёс вал
Геннадий Ахметов, «Инвожо» ансамбльлэн кивалтӥсез

Ватсалом, кукморъёс сяна, удмуртъёсты Татарстанысь ик Огырчи ёросысь Варклед-Бӧдья гуртысь «Инвис» коллектив но возьматӥз на. Соос «калык вокал» номинациын кыкетӥ инты басьтӥзы. 

Удмурт коллективъёс «Народные истоки» фестивальын

11 фото

Тодэ вайытом, туэ 29-30 куартолэзе Ижкарын кыкетӥзэ туала калык культурая «Тангыра» фестиваль ортчытыны чаклало



Наверх
Вниз