Ижкар+27 °C
12 -тӥ пӧсьтолэзь 2020 Воскресенье
16+

«Удмурт кылбурчи» огинлэн нырысетӥ бичетэз потӥз Ижкарын

  • 681
  • 0
Ижкар / Удмуртия
«Удмурт кылбурчи» огинлэн нырысетӥ бичетэз потӥз Ижкарын
Туспуктэм: Богдан Анфиногенов

Удмуртиын «ВКонтакте» мерлыко вотэсысь «Удмурт кылбурчи» огинлэсь нырысетӥ бичетсэ поттӥзы. Со сярысь ивортодэтъя «Удмуртия» агентстволэн корреспондентэзлы огинлэн кивалтӥсез, кылбурчи Богдан Анфиногенов вераз.

Книгае 2013-тӥ арысен огинын потам 93 удмурт кылбурчиослэн 93 ужъёссы пыризы.

Богдан Анфиногеновлэн кылъёсызъя, пӧлазы школаын дышетскисьёслэн но, мӧйыослэн но ужъёссы вань. Гожъясьёс понна та книга возьмамтэ кузьым луиз. 

Тросэз возьмамтэ но шумпотымон шуыса верало. Малы ке шуоно мон нокинлы но ӧй вера вал та бичет сярысь но ӧй кенешы соосын
Богдан Анфиногенов, кылбурчи, «Удмурт кылбурчи» огинлэн кивалтӥсез

Бичетэз Богдан Анфиногенов Эстониысь Финн-угор литератураослэн фондзылэсь 500 евро тыр стипендия басьтэмезлы луыса поттӥз. Дизайн но вёрстка лэсьтыны Вера Штыкова но тупатъяны Анастасия Шумилова юрттӥзы.

Кызьы пусъе Богдан Анфиногенов «Удмурт кылбурчи» книгалэн азькылаз, таӵе бичет поттыны малпанэз солэн ноку ӧй вал. Но дыр ортчемъя валаз, со кулэ шуыса, уго огинысь борддорын потэм кылбуръёс син азьысь ышо, соосты утчано луэ. Со сяна, вотэсбамъёсын йыртэмасьёс «кузёяськыны» ярато. Озьы огин чиптэм-чаптэм ышыны но быгатоз, соин валче – вань кылбуръёс. Соин ик та бичет трос аръёс ӵоже люкам ужъёслэсь ог люкетсэс огазеян но утён, 2010-тӥ аръёсы гожъяськись кылбурчиослэсь улон-вылонзэс, малпанъёссэс возьматон луоз.

Мыным аслым туж кельшиз книга, дизайн туж умой пӧрмиз, кылбуръёс но мыным туж кельшо, малы ке шуоно соос огшорыесь, улон-вылон сярысь, соос мыным туж матын луо
Богдан Анфиногенов, кылбурчи, «Удмурт кылбурчи» огинлэн кивалтӥсез

Книга 150 экземплярен гинэ потӥз, сое Богдан Анфиногеновлы яке «Удмурт кылбурчи» огинэ вазиськыса басьтыны луэ. Дуныз 150 манет.

Тодэ вайытом, кемась ик ӧвӧл Удмуртиын удмурт кылбуретлы но прозалы сӥзем антологиос поттӥзы



Наверх
Вниз