Ижкар+19 °C
14 -тӥ оштолэзь 2021 Вирнунал
18+

Удмурт кырӟанъя «Элькуновидение-2016» вожвылъяськон ортчоз 22-тӥ коньывуонэ

  • 1586
  • 0
Ижкар / Удмуртия
Удмурт кырӟанъя «Элькуновидение-2016» вожвылъяськон ортчоз 22-тӥ коньывуонэ
Фото: vk.com (Элькуновидение - 2015)

Удмурт кырӟанъя 5-тӥез «Элькуновидение» вожвылъяськон 2016-тӥ арын 22-тӥ коньывуонэ «Аксион» дворецын ортчоз, ивортӥзы радъясьёсыз.

«Таиз «Элькуновидение» Удмуртиын витетӥез луоз ни. Азьло аръёсы сямен ик, ӵошатсконэ котькуд ёрос яке кар аслэсьтыз кырӟасьсэ яке коллективзэ лэзьыны быгатэ. Курон одӥг: кырӟанэз быдэстӥсьёс но гожтӥсьёс (кылбурчи но крезьгурчи) одӥг ёросысь луыны кулэ», — тодэ вайыто вожвылъяськонэз радъясьёс.

Та вожвылъяськон удмурт крезьгуро лулчеберетэз узырмытыны, выль нимъёсты усьтыны юрттэ. Радъясьёс ёросъёсысь лулчеберетъя юртъёслы, артистъёслы, кылбурчиослы вазисько — «Элькуновидение» пыриськон вылысь али ӵапак репертуар быръён вакыт.

«Та конкурс аслэсьтыз кулэлыксэ туж умой возьматӥз ни. Котькуд ёрос ас кырӟасьёсыныз, артистъёсыныз данъяськыны быгатэ. «Элькуновидение» пыр потэм кырӟасьёс, усточиос вормисе ке но уг пото, соослэн нимзы паськыт вӧлмытӥське но быдэс ар ӵоже со нимъёс чузъясько «Мынам Удмуртие» радио пыр. Соин ик вазиськем потэ, эн азьтэмъяське, поттэ адямидэс. Кырӟанэз быдэстӥсь сяна, данэ потэ быдэс ёрос», — вераз вожвылъяськонлэн продюсерез Геннадий Корепанов.

Тодэ вайытом, «Элькуновидение» вожвылъяськон «Евровидение» музэн ортче, но радлыкез мукетгес. Нырысетӥ люкетэз луэ концерт. Отын котькуд ёрослэн дунъясез кырӟанъёслы баллъёс пуктылэ. Кыкетӥ люкетэз телеканалын мынэ, соку ик учкисьёс куара сётыны быгато. Вань со баллъёсты ватсаса, вормись кырӟан тодмо луэ. Вожвылъяськонлы йылпумъянъёсъя озьы ик бырйисько устоез кылбурчи но устоез крезьгурчи.

«Элькуновидение» пыриськемзы бере туж тодмо луизы, кылсярысь, Шаркан ёросысь «Тулкым», Можга ёросысь «5 Сергейёс», Кияса ёросысь «Ерпечкаос» ансамбльёс, Эгра каргуртысь Денис Чирков, Глазкарысь Александр Леонтьев, Дэбес ёросысь Иван Котельников но трос мукетъёсыз.

ВАТСАН

Удмурт кырӟанъя «Элькуновидение» вожвылъяськонын вормылӥзы:

2012-тӥ ар — Можга ёрос «5 Сергейёс» ансамбль

2013-тӥ ар — Можга карысь «ВиА» дуэт (Влад Андреев но Андрей Конышев)

2014-тӥ ар — Шаркан ёросыс «Тулкым» ансамбль

2015-тӥ ар — Пичи Пурга ёросысь Андрей Корнилов



Наверх
Вниз