Ижкар+14 °C
14 -тӥ гудырикошкон 2020 Удмуртарня
16+

Гербер йӧскалык шулдыръяськонэз Удмуртиын гудырикошконлы выжтӥзы

  • 726
  • 0
Вавож / Удмуртия
Гербер йӧскалык шулдыръяськонэз Удмуртиын гудырикошконлы выжтӥзы
Туспуктэм: Руслан Нуриахметов

2020-тӥ арын удмуртъёслэн сяме пырем Гербер шулдыръяськонзы Удмуртиын гудырикошконэ ортчоз. Со сярысь элькунысь Калыкъёслэн эшъяськон юртсылэн пресс-службаез ивортӥз.

Быдэс Удмуртиысь но бускель улосвылъёсысь куноосты туэ Вавож ёрос пумитаны дасяськиз. Татын Удмуртилэн кунлыкез понна нюръяськись Кузёбай Герд вордскиз. Коронавирусэн йырин малпам ужрадъёс воштӥськизы, соин ик Гербер но гудырикошкон толэзе ортчоз - мукет пуштросэн но мукет ним улсын. Гербер интые та шулдыръяськон «Выль» (выль вуэм емышъёсты данъян праздник) нимаськоз
Удмуртиысь Калыкъёслэн эшъяськон юртсылэн пресс-службаез

Радъясьёслэн верамзыя, шулдыръяськонлэн форматэз Герберлэн кадь ик луоз. Люкаськем куноослы удмурт дуннелэсь узырлыксэ, йӧскалык лулчеберетлэсь вашкалазэ, туннэ нуналзэ но вуонозэ возьматозы.

Ужрадын пӧртэм площадкаос ужалозы, котькудӥз аслыз кельшымонзэ бырйыны быгатоз. Котьку сямен вӧсяськон но вӧсям ӝукез веръян луоз. Озьы ик валтӥсь малпанэз но кылёз – инкуазен огазе кариськон. «Выль» шулдыръяськонлэн темаез – Вавож ёросысь воршудъёслэн историзы.

«Выльлэн» аспӧртэмлыкез - калыккуспо площадкаос но вуэм емышъёсын ярмарка. Нырысьсэ удмурт калык шулдыръяськонын асьсэдыз Удмуртиын улӥсь мукет калыкъёс но возьматозы. Соосты озьы ик калык юмшанэ ӧтёзы, уго, асьсэ праздникъёссэс тросэз мукет арлы выжтӥзы
Удмуртиысь Калыкъёслэн эшъяськон юртсылэн пресс-службаез

Тодэ вайытом, Удмуртилэн кунлыкезлы 100 ар тырмонэз пусъён улсын Гербер шулдыръяськон 20-тӥ инвожое ортчыны кулэ вал. Туэ южтолэзе праздниклэсь тодметпуссэ кылдытонъя вожвылъяськонлы йылпумъянъёс лэсьтӥзы, со сяна, Герберлы нимысьтыз вотэсбам но удмурт кылын GPS-навигатор дасяны малпало.

Ватсалом, нырысь-валысь чакланъёсъя, Ижкарын озьы ик гудырикошконлы туала калык лулчеберетъя «Тангыра» фестивалез но выжтӥзы, нош Шаркан ёросысь Быгыын финн-угор сиён-юонъя «Быг-Быг» фестиваль таяз арын воксё уз луы



Наверх
Вниз