Ижкар+15 °C
2 -тӥ пӧсьтолэзь 2020 Покчиарня
16+

«Дорвыжы» удмурт батырлыко эпосэз выльысь поттӥзы Удмуртиын

  • 317
  • 0
Ижкар / Удмуртия
«Дорвыжы» удмурт батырлыко эпосэз выльысь поттӥзы Удмуртиын
Туспуктэм: vk.com (Удмуртия Книжное-Издательство)

«Удмуртия» издательство «Дорвыжы» удмурт батырлыко эпосэз вылысь поттӥз. Тазэ изданиеез выль иллюстрациос узырмыто. Кызьы вераз ивортодэтъя «Удмуртия» агентстволы ужъюртысь чеберлыко литературая редактор Сергей Матвеев, книга кие кутымон пӧрмиз.

Одӥг ласянь, туала полиграфия куронъёсъя со быдэстэмын – кие кутымон, чебер адӟиське. Мукет ласянь, мыным кельше букваослэн туссы - тани асьмелэн вань ук вашкала удмурт пусъёс, соос кызьы ке но ог-огенызы герӟаськемын. <…> Пуштрос сётэ вылтуслы ас сяменыз усьтӥськыны. Текст, солэн пуштросэз но книгалэн вылтусыз ог-огенызы герӟаськыса, кызьы ке но выль явление сёто кадь, выль учкон
Сергей Матвеев, «Удмуртия» книгапоттонниысь чеберлыко литературая редактор

Книгалэн шорсюлэм пуштросэз луэ ӟуч историклэн, Поволжьеысь калыкъёслэсь историзэс но лулчеберетсэс эскерисьлэн Михаил Худяковлэн ХIХ даурлэн пумаз но ХХ даурлэн кутсокназ калыкысь люкам мадёсъёс вылэ инъяськыса гожтэм удмурт батырлыко эпосэз. Ӟуч кылысь эркын берыктӥз Удмуртиысь калык гожъясь Василий Ванюшев

Удмуртиысь калык художниклэн Вячеслав Михайловлэн суредъёсыз книгаез узырмыто но солэсь пуштроссэ син азе ӟечгес пуктыны но юртто шуыны луоз, дыр.

Михаил Худяковлы удмурт калык кемалась памятник пуктыны кулэ, но памятник асьмеос пуктылӥськом книгаоссэс выльысь поттылыса. Со туж бадӟым уж удмурт калыклы лэсьтӥз, и сыӵе сочетание – Михаил Худяков одӥг ласянь, мукет ласянь – Вячеслав Михайлов, куинетӥ ласянь «Удмуртия» издательствоысь ужасьёслэн быгатонлыксы, мон малпасько, туж чебер произведение кылдытӥзы
Сергей Матвеев, «Удмуртия» книгапоттонниысь чеберлыко литературая редактор

Берлозэ «Дорвыжы» эпос 2008-тӥ арын потӥз вал. Та дырозь ваньмыз книгаос вузамын-басьтэмын ни. Будӥзы выль лыдӟисьёс, соин ик сое выльысь поттонлы кулэлык кылдӥз. Вань сыӵе маръёс ке, кудъёсыз ноку уг вужмо, шуэ Сергей Матвеев. Со – асьмелэсь выжыосмес, али дырмес, азьлане учконмес огазеясь калыкмылэн историез. Ваньзэ сое удмурт калыклэн эпосэз возьматэ.

Пиналъёс будо, соос, оло, али ваньзэ валаса но уг вутто, мар со удмурт калыклэн узырлыкез. Таӵе книгаос поттыса, сыӵе узырлыкмес калыклы возьматыса, соин но асьмеос пиналъёсты дышетӥськом, соослы яратон пыӵатӥськом. Азьланяз но, мон малпасько, таӵе переизданиос кулэ луозы, быгатэммыя ми тыршомы поттыны
Сергей Матвеев, «Удмуртия» книгапоттонниысь чеберлыко литературая редактор

Книгалэн тиражез 500 экземпляр. Сое «Удмуртия» издательстволэн вузкаронниысьтыз (Пастухов нимо урам, 13, куинетӥ этаж) басьтыны луоз. 

Тодэ вайытом, алигес «Удмуртия» издательство Ижкарлэн 19-20 дауръёсысь туспуктэмъёсыныз выль книга поттӥз



Наверх
Вниз