Ижкар+22 °C
8 -тӥ гудырикошкон 2020 Кӧснунал
16+

Йӧскалык модая «Чильтыр-вальтыр» школа усьтыны дасясько Можгаын

  • 115
  • 0
Можга / Удмуртия
Йӧскалык модая «Чильтыр-вальтыр» школа усьтыны дасясько Можгаын
Туспуктэм: vk.com (Чильтыр-вальтыр)

Можгаын удмурт шӧмо дӥсь вурисьёс но киужасьёс понна йӧскалык модая «Чильтыр-вальтыр» школа усьтыны дасясько. Со сярысь ивортодэтъя «Удмуртия» агентстволэн корреспондентэзлы ӵектослэн авторез, Можга ёрос администрациысь лулчеберетъя, спортъя но егитъёсын ужан политикая управлениысь ӧнерчи Надежда Сапожникова вераз.

Кылем арын куарусёнэ ми Можга ёросысь Кватчи гуртын йӧскалык модая нырысетӥзэ усьтэм фестиваль-вожвылъяськон ортчытӥм. Отчы 13 дизайнеръёс лыктӥзы но 18 бичетъёссэс возьматӥзы. Соку ми валам, ужрадмы ваньмызлы кельшиз шуыса, дизайнеръёслы но, учкисьёслы но, модалиослы но, спонсоръёсмылы но
Надежда Сапожникова, ӵектослэн авторез

Со сяна, радъясьёс валазы, вань на мар бордын ужаны но: модалиосты сцена вылтӥ ветлыны дышетоно, калыкен, дизайнеръёсын ужано. Соин ик фестиваль-вожвылъяськонлы ӵектос гожтӥзы.

Ӵектос Удмуртиысь йӧскалык политикая министерстволэсь 61 сюрс 813 манет тыр грантсэ утӥз

Солы луыса туэ фестиваль-вожвылъяськон сяна, дизайнеръёслы йӧскалык модая «Чильтыр-вальтыр» школа ужалоз.

Ӵектосэ вань мылкыд карисьёс пыриськыны быгато. Нырысь ик ми модалиосты ветлыны дышетом, собере дизайнеръёсын ужалом, «Катар» студие ветлом, кызьы азьло дэремъёс вурылэмын вал учком, уго милям «Катар» студиын 200-лэсь трос удмурт дэремъёс. Ми соосты эскером, кыӵе буёлэн соос вуремын, кыӵе кройзы, шонер-а ми удмурт дэремъёс вуриськом шуыса чаклалом
Надежда Сапожникова, ӵектослэн авторез

Со сяна гуртъёсын чыртывесь, удмурт сумка лэсьтонъя, кускерттон куонъя мастер-классъёс ортчозы, дизайнеръёслэн дӥсьёсынызы модалиосты пӧрмытыса фотосессиос радъялозы.

Бӧрысь, 20-тӥ гудырикошконэ, Березнякысь али выльдӥськись лулчеберет юртын фестиваль-вожвылъяськон ортчоз. Жюри ёзчиос тужгес усто бичетэз но дизайнерез быръёзы. Надежда Сапожниковалэн верамезъя, туэ отчы эшшо но трос вуриськисьёс пыриськозы, уго выль мылкыд карисьёс но вань ини. Озьыен, фестиваль выль нимъёсты но усьтоз.

Фестиваль-вожвылъяськонэн ӵектос уз ворсаськы.

Гудырикошкон бере милям ӵектосмы азьланьтӥськоз. Ми утэм грантэнымы аппаратура басьтӥм, табере милям удмурт дэремъёсты калыке чебер туспуктэмъёс, фотосессиос пыр поттаны луонлыкмы вань. Со сяна милям вань на волонтёръёсмы, со «Егит тулкым» сменаысь фото-, видеоискусство ӧрысь, «Шундыысь» егитъёс, туспуктӥсьёс, озьы ик вань ӧнерлыко туспуктӥсьёсмы но, визажистъёсмы но, парикмахеръёсмы но, кудъёсыз дунтэк, волонтёръёс кадь, милемын ужаны дась
Надежда Сапожникова, ӵектослэн авторез

Надежда Сапожникова пусъе, таӵе ужрадъёс бере гурт калык удмурт дэремъёсын золгес тунсыкъяськыны кутске, вуриськисьёслэн заказъёссы но тросгес люкасько. Соин ик ӵектос туж кулэ но сое одно ик азинтозы. 

Тодэ вайытом, Удмуртиын туэ этномодельеръёслы «Гербер Фешн» вожвылъяськон но ортчоз.



Наверх
Вниз