Ижкар+22 °C
8 -тӥ гудырикошкон 2020 Кӧснунал
16+

Гербер сярысь фильм дасяны чакла Удмуртиысь Калыкъёслэн эшъяськон юртсы

  • 69
  • 0
Ижкар / Удмуртия
Гербер сярысь фильм дасяны чакла Удмуртиысь Калыкъёслэн эшъяськон юртсы
Туспуктэм: Григорий Фомин

Удмуртиысь Калыкъёслэн эшъяськон юртсы Гербер йӧскалык шулдыръяськон сярысь фильм лэсьтон борды басьтӥськиз. Сое быдэстон понна ӧнерчиос калыклэсь юрттэтсэ куро. Со сярысь ивортодэтъя «Удмуртия» агентстволэн корреспондентэзлы Калыкъёслэн эшъяськон юртсылэн кивалтӥсезлэн воштӥсез Татьяна Фёдорова вераз.

Ужъюртысь ӧнерчиос каръёсын, ёросъёсын, гуртъёсын, мукет улосвылъёсын азьло аръёсы ортчылэм Гербер но Гырон быдтон шулдыръяськонъёсысь видеоосты люкаса одӥг фильме огазеяны малпало.

Ми Калыкъёслэн эшъяськон юртазы соосты огазеясалмы но мар со Гербер верасалмы, кызьы сое пусйылӥзы, кылсярысь, 20 ар талэсь азьло кыӵе ке гуртын, нош кызьы али пусъё, кызьы со воштӥськиз ӵошатысалмы
Татьяна Фёдорова, Калыкъёслэн эшъяськон юртсылэн кивалтӥсезлэн воштӥсез

Татьяна Фёдоровалэн кылъёсызъя, фильмез историез, сямъёсыз сярысь, Татарстанысь, Башкортостанысь удмурт гуртъёсын ортчытон радлыкез сярысь но мукет веранэн ватсалозы.

Веранэз ӟуч кылын луоз, малы ке шуоно удмурт калык тодэ ик мар со Гербер, нош милям ужпуммы мукет адямиослы, калыкъёслы милям Гербер шулдыръяськонмы вань шуыса, со Удмуртиын валтӥсь йӧскалык шулдыръяськон луэ шуыса возьматыны
Татьяна Фёдорова, Калыкъёслэн эшъяськон юртсылэн кивалтӥсезлэн воштӥсез

Фильмез лэсьтон понна ӧнерчиослы пӧртэм аръёсы, пӧртэм интыосын ортчылэм Гербер но Гырон быдтон шулдыръяськонъёсысь видеоос кулэ. Юрттэт сётыны котькуд мылкыд карись быгатэ. Со понна ddnodm@mail.ru электрон почтае «Гербер» шуыса пусйыса видеозаписьёсты келяно

Милям ӧвӧл сюбегатонъёсмы, кинлэн маиз вань, котькыӵе Герберъёсысь, ваньзэ басьтом. Вань ёросъёслэн, пичи гуртъёслэн но, ас сямъёссы вань ук. Со котьку тунсыко
Татьяна Фёдорова, Калыкъёслэн эшъяськон юртсылэн кивалтӥсезлэн воштӥсез

Татьяна Фёдорова пусъе, фильмез, материалъёс вуизы ке, инвожое ик лэсьтыны тыршозы но Калыкъёслэн эшъяськон юртсылэн мерлыко вотэсъёсысь бамъёсаз поттозы. Нош трос люкаськизы ке, оло, кӧня ке сериен но дасялозы.

Тодэ вайытом, туэ дунне вылын коронавирус кузёяськемен сэрен Гербер йӧскалык шулдыръяськон дышем сямья уз ортчы, со интые гудырикошкон толэзе Выль шулдыръяськон луоз



Наверх
Вниз