Ижкар+19 °C
7 -тӥ пӧсьтолэзь 2020 Пуксён
16+

«Удмурты. На земле древних Алангасаров» книга поттыны грант утӥз Удмуртиысь книгапоттонни

  • 77
  • 0
Ижкар / Удмуртия
«Удмурты. На земле древних Алангасаров» книга поттыны грант утӥз Удмуртиысь книгапоттонни
Туспуктэм: Геннадий Сидоров

Ижкарысь «Удмуртия» издательство Печатья но калыке ивортодэт вӧлмытонъя федерал агентстволэсь «Удмурты. На земле древних Алангасаров» книга поттыны грантсэ утӥз. Со сярысь ивортодэтъя «Удмуртия» агентстволэн корреспондентэзлы книгалэн радъясез, книгапоттоннилэн валтӥсь редакторез Георгий Грязев вераз.

Со луоз удмурт калык сярысь: удмурт калыклэн выжыез, кытысь потэмез, мукет калыкен эшъяськемез, удмурт калык пӧлын данэ потэм адямиос, Удмуртиез данъям мукет выжыысь калыкъёс сярысь. Со ваньмыз веранъёсын, визькылъёсын, мифъёсын, легендаосын пӧлэстӥськыса кошкоз. Озьыен, котькуд малпанэз выжыкылысь, легендаысь, мифъёсысь басьтэм люкетъёсын юнматэмын луоз
Георгий Грязев, «Удмурты. На земле древних Алангасаров» книгаез радъясь

Георгий Грязевлэн кылъёсызъя, книга туннэ нуналлы 90 процентлы дась ини. Али отчы пыртон понна ӟечлыко туспуктэмъёс, суредъёс люкан бордын тыршо.

Пӧртэм куазен, пӧртэм вакытэ лэсьтэмын мед луозы, чебер, данъяськымон мед луозы. Тани кыӵе чебересь туспуктэмъёс пыртӥмы вал «Секреты удмуртских мастеров» книгае, солэсь ляб медаз луэ ни туспуктэмъёс
Георгий Грязев, «Удмурты. На земле древних Алангасаров» книгаез радъясь

Книгаез куинь кылын поттыны чаклало. Валтӥсь кылъёсыз удмурт но ӟуч луозы, со сяна англи кылын вакчияк текстъёс но пыртозы.

Кытчы ке элькунлэн палэназ мынӥськод ке, Москвае-а, шуом, яке кунгож сьӧрысь-а адямиос лыкто, одно ик англи кылын но куро. Аннотацизэ адӟемзы потэ. Соос адӟо, туспуктэмъёс чебер лэсьтэмын, тодэмзы потэ пуштроссэ, мар сярысь, кин сярысь. Соин ик таӵе уж лэсьтыны малпаськомы, но азьланяз, оло, куинь кылын быдэсак книгаос но поттомы. Таиз пилотной луоз. Учком. Дыр возьматоз
Георгий Грязев, «Удмурты. На земле древних Алангасаров» книгаез радъясь

Георгий Грязев пусъе, книга пиналъёслы но, арлыдоослы но валамон, капчи кылын гожтэмын, соин ик котькинлы тунсыко луоз но мар ке выльзэ сётоз.

Азьвыл чакламъя, лыдӟисьёс соин туэ ар пумын тодматскыны быагатозы ини

Тодэ вайытом, кемалась ик ӧвӧл, издательствоын «Дорвыжы» удмурт батырлыко эпосэз выльысь поттӥзы.



Наверх
Вниз