Ижкар+19 °C
7 -тӥ пӧсьтолэзь 2020 Пуксён
16+

Удмурт крезьгуръя «Кыӵе ке но клип» лэсьтон вожвылъяськонэ пыриськыны ӧтё Удмуртиын улӥсьёсты

  • 86
  • 0
Ижкар / Удмуртия
Удмурт крезьгуръя «Кыӵе ке но клип» лэсьтон вожвылъяськонэ пыриськыны ӧтё Удмуртиын улӥсьёсты
Туспуктэм: Майя Бывальцева

Егитъёслэн выль искусствозыя «Новарт 2020» фестиваль улсын Ижкарысь Арт-резиденцилэн удмурт лабораториез удмурт крезьгуръя клипъёсъя «Кыӵе ке но клип» вожвылъяськонэ пыриськыны ӧте. Со сярысь «ВКонтакте» мерлыко вотэсысь бамаз ӵектослэн кураторез Дарали Лели ивортӥз.

Клиплы кырӟанъёс Удмуртиысь но Ижкарысь крезьгурчиосын берло кык ар ӵоже гожтэмын но удмурт кылын быдэстэмын луыны кулэ. Но озьы ик улосвылмылы, калыкъёслэн эшъяськонзылы но Удмуртилэн мукет аспӧртэмлыкъёсызлы сӥзем мукет кылын кырӟанъёсты но учкозы. Нырысь ик егит но аспӧртэм быдэстӥсьёслы саклык висъялозы.

Вожвылъяськонэ пыриськисьёслэн клипъёссы 2020-тӥ арын лэсьтэмын но чеберлык дунлыкен луыны кулэ (коммерци но реклама клипъёсты уз басьтэ). Озьы ик радъясьёс анимацилы но шумпотозы шуыса пусъё.

Ужъёсты 25-тӥ инвожоозь darali.leli@gmail.com электрон почтае кутозы

27-тӥ инвожое «Новарт 2020» онлайн-фестиваль улсын клипъёсын трансляция ортчытозы.

Вожвылъяськонэ пыриськисьёслэсь ужъёссэс экспертъёс дунъялозы. Ваньзэсты ик Ижкарысь Арт-резиденцилэн но Ижкар администрациысь физкультурая, спортъя но егитъёсын ужан политикая управленилэн таукаронъёсынызы пусъёзы, ужъёссэс «Даур ТВ» интернет-телевидениын возьматъялозы. Озьы ик пыриськисьёс 2021-тӥ арын удмурт кылын выль фильм лэсьтонэ пыриськыны быгатозы.

Ужрад визуальной искусство удысын быгатонлыко муртъёсты шараян, егит крезьгурчиослы азинскыны луонлык сётон, удмурт кинематографистъёслэсь командазэс кылдытон вылысь радъяське

Тодэ вайытом, Удмуртиын туала калык лулчеберетъя «Тангыра» фестивалез гудырикошконлы выжтӥзы.



Наверх
Вниз