Ижкар+19 °C
6 -тӥ пӧсьтолэзь 2020 Вордӥськон
16+

«Вашкала. Туала. Кайтала» ӵектосэз улонэ пыӵатозы вуоно арын Кияса ёросын

  • 113
  • 0
Лутоха / Удмуртия
«Вашкала. Туала. Кайтала» ӵектосэз улонэ пыӵатозы вуоно арын Кияса ёросын
Туспуктэм: Григорий Фомин

2021-тӥ арын Кияса ёросысь Лутоха гуртын калыкез дышетонъя «Вашкала. Туала. Кайтала» ӵектосэз улонэ пыӵатозы. Малпанзы кун йӧскалык политикая удысысь ӵектосъёсты улонэ пыӵатон понна муниципал кылдытэтъёслы субсидиос люкылонъя вожвылъяськонын вормисьёс пӧлы шедиз но 89 сюрс 980 манет утӥз. Со сярысь ивортодэтъя «Удмуртия» агентстволэн корреспондентэзлы ӵектослэн авторез, Лутоха гуртысь лыдӟетъюртысь библиотекарь Елена Северьянова вераз.

Вашкала ӧнеръёсты утён ужпумен ӵектосэз вуоно арын южтолэзе улонэ пыӵатыны кутскозы.

Ми ньыль мастер-классъёс лэсьтомы. Со понна егитъёсын гуртысьтымы пересьёс доры ветломы но соослэсь мастер-классъёссэс басьтомы, видеоролик сниматьтомы, сое монтировать каромы но интернетэ вӧлмытомы
Елена Северьянова, «Вашкала. Туала. Кайтала» ӵектослэн авторез

Гуртысь арлыдоос удмурт сиён-юон пӧраны, кырӟаны-эктыны, удмурт ибырвесь лэсьтыны но удмурт пужы пужыятыны дышетозы.

Бӧрысь, вань видео ужъёс потэм бере, 1-тӥ пӧсьтолэзе «Лутохинское» муниципал кылдытэтын кибашлыослэсь фестивальзэс ортчытозы. Отын озьы ик видео лэсьтозы. Вань ужъёсты «YouTube» каналэ поттозы.

Мон малпасько, бадӟым удмурт фестиваль ортчытӥм ке, луозы адямиос, кудъёсызлы со тунсыко луоз. Малпасько, арысь аре сое паськытатыны луоз но гуртамы, муниципал кылдытэтамы сяна, ёрос инлыкен ортчытыны луоз
Елена Северьянова, «Вашкала. Туала. Кайтала» ӵектослэн авторез

Тодэ вайытом, йӧскалык политикае ӧръям ӵектосъёсты улонэ пыӵатыны элькунысь 13 проектъёслы 1 миллион манетлэсь трос коньдон висъязы.



Наверх
Вниз