Ижкар+19 °C
6 -тӥ пӧсьтолэзь 2020 Вордӥськон
16+

Удмуртиысь коммерци луисьтэм сизьым огазеяськонъёс «Культура» йӧскалык ӵектос улсын субсидиос басьтӥзы

  • 73
  • 0
Ижкар / Удмуртия
Удмуртиысь коммерци луисьтэм сизьым огазеяськонъёс «Культура» йӧскалык ӵектос улсын субсидиос басьтӥзы
Туспуктэм: Руслан Нуриахметов

Удмуртиысь лулчеберет удысысь мерлыко уже ӧръям коммерци луисьтэм сизьым огазеяськонъёс «Культура» йӧскалык ӵектос улсын радъям вожвылъяськонын вормизы но субсидиос басьтӥзы. Со сярысь элькун тӧролэн но кивалтэтлэн пресс-службазы ивортэ.

Улосвыллэн тӧроез Александр Бречалов элькунамы 2 сюрс пала коммерци луисьтэм огазеяськонъёс ужало шуыса пусйиз. Со пӧлысь 1 сюрс 791-ез – мерлыко ужен выро. Тросэз соос пӧлысь Ижкарын пусъемын. Огазеяськонъёс физкультура но спорт, дышетон, калыклы мерлыко юрттэт сётон ужен выро.

Мон шумпотӥсько, коммерци луисьтэм огазеяськонъёсмы, соос пӧлын мерлыко ужен вырисьёсыз но, арысь аре мыло-кыдогес ужало шуыса. Соосын быдэстӥськись ӵектосъёс элькунамы улӥсьёс понна туж кулэ луо. Соос интыысь творчествоя кичӧлтонъёслы, быгатонлыко пиналъёслы но егитъёслы юртто, волонтёр движениез, лулчеберет удысын но, азинто
Александр Бречалов, Удмуртилэн тӧроез
 

2020-тӥ арын субсидиослэн оглом быдӟалазы 1 миллион манет луиз

Куд-огез коммерци луисьтэм огазеяськонъёс малпам ӵектосъёссэс быдэстыны кутскизы ини. Огез соос пӧлысь «Не один дома» онлайн-лагерь. Ӵектосэз егитъёслэн лулчеберетъя но спортъя «Тайм-клуб» центрзы улонэ пыӵатэ. Онлайн-лагерь кылем арняе ужаны кутскиз. Солэн ужпумез – 8-10 аресъем 100-лэсь трос пиналъёслэсь гужем шутэтсконзэс радъян. Туэ 28-тӥ гудырикошконозь вить сменаос ужалозы.

Удмуртиысь «Творческое объединение «Ижкар» улосвыл мер огазеяськон пӧсьтолэзь пумын–гудырикошкон кутсконын визуальной искусствоя «Докъя» симпозиум ортчытоз. Со улсын туала инсталляция, лэнд-арт, видеоарт, перфоманс, хеппенинг ӧръёсъя мастер-классъёс радъяськозы.

Элькунысь ӟуч лулчеберетъя огазеяськон пулэсь пичи архитектура синпелетъёс лэсьтонъя «Поляна сказок» усьтэм ёрос фестиваль-вожвылъяськон ортчытыны субсидия басьтӥз. Со гудырикошконлэн кыкетӥ люкетаз радъяськоз. Ужрад улсын Дэри ёросысь Ожмос (Бабино) черкогуртысь нылпи площадкаез пулэсь скульптураосын чебер карыны но мукет ужрадъёс ортчытыны чаклало.

Гудырикошконэ-куарусёнэ «Эштэрек» удмурт этнотуристической центр Удмуртилэн кунлыкезлы 100 ар тырмон улсын но улосвылмылэсь нематериальной лулчеберет кылёсбурзэ утён, юрттон но азинтон понна фольклоръя но киужъя «Трокай» элькун фестиваль ортчытоз.

«Музыкальное общество УР» улосвыл мер огазеяськон туэ коньывуонэ-толсуре академ жанрын ужась солист-вокалистъёс но вокалъя ансамбльёс пӧлын «Новые имена» III улосвылкуспо вожвылъяськон радъялоз. Удмуртиысь лулчеберет удысысь ветеранъёслэн кенешсы коньывуон кутсконын лулчеберет но искусство удысын ужам ветеранъёслэсь «Я жизнь свою культуре посвятил» нимо элькун нуналзэс ортчытоз. Вотка ёросысь «Союз неравнодушных родителей» интыысь мер огазеяськон куарусёнэ-толсуре пичи формаем хореографи искусствоя «Арабеск» VI элькун вожвылъяськон радъялоз. Со классика хореографи удысысь быгатонлыко нылпиосты но творчествоя коллективъёсты шараян но юрттэт сётон понна ортчытӥськоз.

Тодэ вайытом, азьвылгес Удмуртиысь 58 ӵектосъёс Азьмуртлэн грантъёсъя фондэныз 2020-тӥ арын ортчытэм кыкетӥ конкурсын вормизы но оглом 56 миллион манетлэсь коньдон утӥзы.



Наверх
Вниз