Ижкар+19 °C
6 -тӥ пӧсьтолэзь 2020 Вордӥськон
16+

Фольклоръя но киужъёсъя «Трокай» элькун фестиваль ортчоз Удмуртиын

  • 100
  • 0
Кучырангурт / Удмуртия
Фольклоръя но киужъёсъя «Трокай» элькун фестиваль ортчоз Удмуртиын
Туспуктэм: Руслан Нуриахметов

2020-тӥ арын куарусёнэ Алнаш ёросысь Кучыран гуртысь лулчеберетъя но туризмъя «Советская деревня» центрын фольклоръя но киужъёсъя «Трокай» элькун фестиваль ортчоз. Со сярысь «ВКонтакте» мерлыко вотэсысь бамаз Удмуртиысь лулчеберетъя министр Владимир Соловьёв ивортӥз.

Фестиваль Удмуртилэн кунлыкезлы 100 ар тырмон улсын но Трокай Борисовлэсь творчествозэ вӧлмытон пыр элькунлэсь ваньбурлыктэм (нематериальной) лулчеберет кылёсбурзэ утён, юрттон но азинтон понна радъяське. Ужрадэ 700-лэсь трос адями пыриськоз.

Та выллем фестивальёсты ортчытон семья но улон-вылон йӧскалык сямъёсты но шулдыръяськонъёсты утьыны но улӟытыны юрттэ, озьы ик удмурт калыклэн сяме пырем лулчеберет удысаз творческой но эскерон уж нуыны мылкыд сётэ шуыса лыдъясько
Владимир Соловьёв, Удмуртиысь лулчеберетъя министр

Фестиваль улсын калык дырпусысь праздникъёсты, йылолъёсты возьматозы, куноос удмурт кунлыкез кылдытон бордын тыршем эмчилэн, кылосбурчилэн, мер ужасьлэн но гожъяськисьлэн Трокай Борисовлэн вордӥськем палъёсаз вуылозы. Озьы ик ужрад улсын горд сюйлэсь, бадьпу ньӧръёслэсь арбериос лэсьтонъя, токарной ужъя но мукет мастер-классъёс ортчозы.

Пусъём, ужрадэз ортчытон понна Алнашысь этнотуризмъя «Эштэрек» удмурт центрлы 197 сюрс манет тыр субсидия висъязы.

Тодэ вайытом, «Культура» йӧскалык ӵектос улсын Удмуртиысь коммерци луисьтэм сизьым огазеяськонъёс субсидиос басьтӥзы.



Наверх
Вниз