Ижкар+19 °C
7 -тӥ пӧсьтолэзь 2020 Пуксён
16+

6,7 миллион манет басьтӥз Удмуртиысь мунё театр федерал ӵектосъя

  • 76
  • 0
Ижкар / Удмуртия
6,7 миллион манет басьтӥз Удмуртиысь мунё театр федерал ӵектосъя
Туспуктэм: vk.com (Владимир Соловьев)

Удмуртиысь кун мунё театрлы «Огъя Россия» партилэн «Культура малой Родины» федерал ӵектосэзъя 6 миллион 700 сюрс манет тыр субсидия висъязы. Со сярысь элькунысь лулчеберетъя министр Владимир Соловьёв мерлыко вотэсысь бамаз ивортӥз.

Театр 86-тӥ сезоназ учкисьёссэ паймытыны дасяське. Партилэн ӵектосэз улсын театрлэн покчи залэз быдэсак лэсьтэмын. Со 50 учкисьёслы чакламын. Отын экспериментальной площадка луоз, кытын мунё театрлэсь спектакльёссэ сяна, элькунысь егитъёслэн театр коллективъёссылэсь но ужъёссэс адӟыны луоз
Владимир Соловьёв, Удмуртиысь лулчеберетъя министр

Висъям субсидия чотын ик таяз арын ньыль выль спектакльёс пуктыны дасясько: мунёос, костюмъёс вуро, кулэ арбериос дасяло.

Выль ужъёс пӧлын тужгес покчиосызлы учкисьёслы - Владимир Сутеевлэн выжыкылъёсызъя «Кто сказал «Мяу»?» спектакль. Бадӟымъёсызгес пиналъёс Михаил Салтыков-Щедринлэн выжыкылэзъя «Чижиково горе» спектакль адӟыны быгатозы. Сое Архангельскысь кун мунё театрлэн чеберлыкъя кивалтӥсез суредасен, «Золотая маска» премилэн лауреатэныз Ольга Верёвкинаен ӵош пуктоз.

Удмуртиысь мунё театрлэн валтӥсь режиссёрез Галина Лихацкая Григорий Горинлэн «Тиль» пьесаез борды кутскиз. Со бадӟым уже театрысь вань артистъёс пыриськозы. «Зарни маска» премилэн эшшо одӥгез лауреатэз, режиссёр Светлана Дорожко Ижкаре Даниил Хармслэсь «Судьба жены профессора» вероссэ пуктыны лыктоз. 

Тодэ вайытом, азьвылгес партилэн ӵектосэз улсын Удмуртиын Кизнер но Можга ёросъёсысь лулчеберет юртъёсты тупатъязы.



Наверх
Вниз