Ижкар+19 °C
7 -тӥ пӧсьтолэзь 2020 Пуксён
16+

Шуландыр шулдыръяськон ортчоз Кез ёросын туэ гудырикошконэ

  • 84
  • 0
Бадӟым Олып / Удмуртия
Шуландыр шулдыръяськон ортчоз Кез ёросын туэ гудырикошконэ
Туспуктэм: Руслан Нуриахметов

2020-тӥ арын 8-тӥ гудырикошконэ (кӧснуналэ) Кез ёросысь Бадӟым Олып гуртын «Шулдыр шуландыр» улосвылкуспо фестиваль ортчоз. Сяме пырем тунсыко ужрад сярысь ивортодэтъя «Удмуртия» агентстволы фестивалез огез радъясь, «Удмурт Кенеш» огазеяськонлэн Кез ёросысь ёзэтэзлэн ёзчиез Наталья Селивёрстова вераз.

Фестиваль улсын шуласьёс, йылолъёсты возьматӥсь коллективъёс, эстрада кырӟасьёс, лэнд-артэн вырисьёс, семьяос пӧлын вожвылъяськонъёс радъяськозы. Нимысьтыз конкурс шуласьёс пӧлын луоз.

Шуласькомы, кин кызьы быгатэ. Шуласьёслы конкурс ялӥське: кин золгес шултоз, кин кемагес шултоз, кин кыӵе ке аспӧртэмлыко шуланы быгатэ. Шулдыр ваньмыз пӧрме
Наталья Селивёрстова, «Удмурт Кенеш» огазеяськонлэн Кез ёросысь ёзэтэзлэн ёзчиез

Нырысетӥ шулдыръяськонэз Олыпын улӥсьёс понна 2013-тӥ арын ортчытӥзы. Вашкала йылолэз улӟытыны мылкыд сётӥз ёросысь шаерчи Александр Иванов.

Бадӟым Олыпын улӥсьёс вашкала дыръёсы инвожо дыре шулалляло вал, кыӵе ке чер, висёнъёс медаз кутске шуыса, улон шудо мед луоз шуыса, тазалык мед ваньзылэн луоз шуыса, пудо медаз висьы. Вот сыӵе сямез чакласа, выльысь сое али улӟытӥськомы
Наталья Селивёрстова, «Удмурт Кенеш» огазеяськонлэн Кез ёросысь ёзэтэзлэн ёзчиез

Юмшан Бадӟым Олыпысь Аксак но Тынгыли нимаськись ошмесъёс дорын радъяське. Ужрадэ лыктӥсьёс нялтас тунсыко легендаез тодыны быгатозы. 

Куноосты пумитан 10 часын кутскоз, фестивалез сӥё-дано усьтон 11 часлы чакламын.

Нырысетӥяз фестивале Пермьысь но Татарстанысь коллективъёс пыриськизы. Радъясьёс оско, туэ но трос эшъёссы люкаськозы, коронавирус инфекци уз люкеты шуыса.

Тодэ вайытом, куарусёнэ Алнаш ёросысь Кучыран гуртын фольклоръя но киужъёсъя «Трокай» элькун фестиваль ортчоз



Наверх
Вниз