Ижкар+19 °C
6 -тӥ пӧсьтолэзь 2020 Вордӥськон
16+

Нылашъёслы «Чеберинка» йӧскалык вожвылъяськонэ куриськонъёсты кутыны кутскозы Удмуртиын пӧсьтолэзе

  • 72
  • 0
Ижкар / Удмуртия
Нылашъёслы «Чеберинка» йӧскалык вожвылъяськонэ куриськонъёсты кутыны кутскозы Удмуртиын пӧсьтолэзе
Туспуктэм: Григорий Фомин

2020-тӥ арын пӧсьтолэзе Удмуртиын нылашъёслы чеберлыкъя «Чеберинка» йӧскалык вожвылъяськонэ куриськонъёсты кутыны кутскозы. Со сярысь ивортодэтъя «Удмуртия» агентстволэн корреспондентэзлы «Чеберай» ӵектослэн кивалтӥсез Ксения Широбокова вераз.

Вожвылъяськонлэн нырысетӥ быръён люкетэз онлайн амалэн ортчоз. Нылашъёс туэ 1-тӥ куарусёнозь анкетаен, творческой быгатонлыксэс возьматӥсь видеоен но туспуктэмъёсынызы куриськонзэс келяны кулэ луозы. Ужъёссэс жюрилэн ёзчиосыз учкозы, бӧрысь соосты мерлыко вотэсъёсы поттозы но калык куара сётон ялозы. Тужгес трос куара люкам нылашъёс финалэ сюрозы.

Со сяна, быръён люкет улсын дыдыос понна одӥг гинэ кастинг радъялозы. Со «Эктоника» open air (опен эйр) ужрадын ортчоз. Нылашъёс асьсэды, быгатонлыкъёссэс жюрилы улэпкын возьматыны быгатозы но тужгес яркытъёсыз, висъяськисьёсыз меӵак, калыкен куара сётонэ пыриськытэк, финалэ потозы.

Кызьы пусъе ӵектослэн кивалтӥсез Ксения Широбокова, ужрадэ удмурт кылын вераськисьтэм нылашъёс но пыриськыны быгатозы.

Ми англи кылын вераськись нылашъёсты но кутом, валтӥсез – со сямъёсты мед тодоз. Та ӵектос удмурт нылъёслы юрттон понна, удмурт лулчеберетэз азинтон понна радъяське. Но, валамон ини, со нылашъёс, кудъёсыз пыро вожвылъяськонэ, валаны но тодыны кулэ, удмурт кылын вераськисьёс азьпалан шуыса
Ксения Широбокова, «Чеберай» ӵектослэн кивалтӥсез

Финалэ потэм нылашъёсын йылпумъясь ужрадэз Ижкарын туэ толсуре ортчытыны малпало. Нырысь-валысь чакланъёсъя, отчы 20 дыдыос пыриськозы. Но вожвылъяськонэ вуэм куриськонъёсъя лыдзы воштӥськыны быгатоз на.

Финалэ потэм нылашъёслы одно ик ваньмызлы кузьымъёс сётӥськозы, соос милям школаямы, шуом, пырозы. Со сяна, соос асьсэ ёросъёсазы Пичи Чеберайёс луозы но, соослэн луоз миссизы - удмурт кылэз, удмурт лулчеберетэз пичи дырысен азинтон. Ми соосын кусыпъёсмес возём, одно ик азьланяз но со пичи Чеберайёсмес пӧртэм ужрадъёсы кыскалом
Ксения Широбокова, «Чеберай» ӵектослэн кивалтӥсез

Пусъём, вожвылъяськонэ 7 аресысен 16 аресозь нылашъёс пыриськыны быгатозы. Соослэсь быгатонлыкъёссэс арлыдъя куинь группаосъя эскерозы. 

Тодэ вайытом, нылкышноос пӧлын чеберлыкъя но устолыкъя «Чеберай» вожвылъяськонлэн финалаз 20 апайёс потӥзы. Соослэн йылпумъясь ужрадзы 20-тӥ шуркынмонэ ортчоз.



Наверх
Вниз