Ижкар+19 °C
7 -тӥ пӧсьтолэзь 2020 Пуксён
16+

«Кыӵе ке но клип» фестиваль улсын лэсьтэм ужъёсты поттӥзы Удмуртиын

  • 64
  • 0
Ижкар / Удмуртия
«Кыӵе ке но клип» фестиваль улсын лэсьтэм ужъёсты поттӥзы Удмуртиын
Туспуктэм: Видеоысь скриншот

Удмуртиын удмурт крезьгуро видео кылдытонъя «Кыӵе ке но клип» фестивале вуэм ужъёс потӥзы. Со сярысь ивортодэтъя «Удмуртия» агентстволэн корреспондентэзлы Ижкарысь «Арт-резиденциысь» егитъёсын ужанъя ӧнерчи, удмурт проектъёсъя куратор, ӵектослэн кивалтӥсез Дарали Лели вераз.

«Арт-резиденция» юрттэмен Егитъёслэн нуналзылы, 27-тӥ инвожолы, куать выль клипъёс поттӥзы. Та дыре эшшо ньылез бордын ужало на.

Калыклэн тунсыкез вань на, соин ик ми сое азьланьтыны малпамы. Тани туннэ мыным нылаш гожтӥз, клип лэсьтэмез потэ шуыса. Соин ик мылкыд карисьёслэн вань на луонлыксы пыриськыны. Нош собере, мон малпасько, шуом, куарусёнэ, ми сое ваньзэ огазе люкалом но показ выллем лэсьтом. Ужъёсты эскером но мастер-класс выллем вераськон ортчытом
Дарали Лели, ӵектослэн кивалтӥсез

Туннэ нуналлы потэм клипъёсты лэсьтон бордын Дарья Никитина, Дмитрий Барабанов, Анастасия Иванова, Ростислав Егоров, Ульяна Соколова, Илья Акилов, Ксения Тихонова, Евгений Кузнецов, Дарали Лели, Сергей Васильев, Илья Безработный тыршизы.

Дарали Лелилэн верамезъя, та уж борды егитъёсты кыскыкуз, валтӥсь ужпумез соослэсь луонлыкъёссэс, мылкыдзэс усьтон вал, кудзэ соос азьланяз азинтыны, оло, ӧнерлыко ӟечлыкозь но вуттыны быгатысалзы. Со пусъе, куд-ог клипъёс нылпи визьемесь на, но соосъя но кужымзы, режиссёр быгатонлыксы, адямиосты радъяны, ужез пумозяз вуттыны быгатэмзы шӧдӥське.

Мон тани Настя Ивановаез пусйысал, кудӥз «Вылӥе лобӟо» кырӟанлы клипез лэсьтӥз. Со нырысетӥ луиз, кин клипсэ келяз. Валамон ини, со нылпи, егит учкон на, со ачиз но дышетскись на, но мон адӟисько, со организатор кадь ӟеч быгатэ ужаны, ужез радъяны. Мыло-кыдо басьтӥськиз, ваньзэ ас дыраз лэсьтӥз. Яке Ульяна Соколова.Со Marie Danic-лэн «Шат со яратон» кырӟанэзлы анимация амалэн клип лэсьтӥз. Та нылаш «Шундыкарын» но ассэ возьматӥз ини, солэн туж бадӟым талантэз. Соин ик со талантсэ удмурт лулчеберетын усьтыны мед быгатысал
Дарали Лели, ӵектослэн кивалтӥсез

Клип лэсьтон егитъёс понна мылкыдъя уж гинэ медаз луы шуыса, ӵектослэн кивалтӥсез ужъёссэс ӧнерчиосын сэрттон-пертчон радъяны, янгышъёссэс эскерыны малпа на.

Али тани мон «Куара» огинлэн кивалтӥсезлэсь Влад Степановлэсь комментарий кури ини. Со кӧня ке ар ӵоже видеоискусствоен выре. Озьы ик Эстониысь Эдина Чуллёклэсь - со финн-угор фильм фестиваль радъя котькуд ар, солэсь дунъетсэ куром на. Малы ке шуоно, мар пӧрмиз, созэ учкись ачиз адӟе, лайк пуктэ, нош мар ӧз пӧрмы, куддыр валаны секыт
Дарали Лели, ӵектослэн кивалтӥсез

Дарали Лели пусъе, таӵе ӵектосъёс валаны юртто, кин азьланяз режиссёр луыны, монтаж лэсьтыны быгатоз, кинэн рос-прос кино борды басьтӥськыны луоз, уго, азьланяз солэн та клип лэсьтӥсьёсын зэмос фильм но кылдытыны малпанэз вань. Клипъёсын чӧлсконъпусъя тодматскыны луэ.

Тодэ вайытом, азьвылгес Удмуртиын «Устоез удмурт видеоблог» вожвылъяськон йылпумъяськиз. Радъясьёслы оглом 13 уж вуиз



Наверх
Вниз