Ижкар+18 °C
1 -тӥ коньывуон 2020 Покчиарня
18+

Йӧскалык модая Urban udmurt смена ужаны кутскиз Ижкарын

  • 126
  • 0
Ижкар / Удмуртия
Йӧскалык модая Urban udmurt смена ужаны кутскиз Ижкарын
Туспуктэм: vk.com (URBAN UDMURT / смена этномоды 13-31 июля)

13-тӥ пӧсьтолэзе Ижкарысь «Арт-резиденциын» этномодая Urban udmurt (урбан удмурт) лагерь смена ужаны кутскиз. Отчы 12-18 аресъем 20 пиналъёс пырисько, но куд-огаз ужрадъёсы мукет мылкыд карисьёс но лыктыны быгато. Со сярысь ивортодэтъя «Удмуртия» агентстволы «Арт-резиденциысь» удмурт ӵектосъёсъя куратор, сменалэн кивалтӥсез Елена Петрова (Дарали Лели) вераз.

Со чакламын быдэ вуымтэослы, но ми озьы ик ӧтиськомы мылкыд карисьёсты, гожтӥськыса, кин быгатэ лыктыны. Вань ке луонлыкмы, ми эшшо мукетъёссэ но чортӥськомы – куд-ог лекциосты учкыны луэ, куд-ог мастер-классъёсы озьы ик луэ лыктыны
Дарали Лели, «Арт-резиденциысь» удмурт ӵектосъёсъя куратор

Солэн верамезъя, сменае пыриськыны мылкыд карисьёс удмурт кылэз одно ик тодыны кулэ ӧвӧл. Ужрадъёсазы удмуртлыкен тунсыкъяськисьёсты, соин тодматскыны мылкыд карисьёсты возьмало.

Йӧскалык модалы сӥзем сменаын быдэ вуымтэос 20 дэрем вурозы.

Пумаз 20 дэрем вурозы - туала удмурт этномода шӧмо дэремъёс. Быдэс коллекция вуромы. Милям ужпуммы – лэсьтыны продукт, сэре городын возьматом пӧртэм ужрадъёсын, пӧртэм площадкаосын. Валамон, со ваньмыз одӥг малпанэн герӟамын луыны кулэ, соин ик басма басьтӥмы ваньзылы ӵош. Эскизъёсты но ӵош лэсьтомы - кызьы соос адӟо, кыӵе мылкыдзы луоз, но мон чаклало, кыӵе ке но герӟась идея мед луоз шуыса
Дарали Лели, «Арт-резиденциысь» удмурт ӵектосъёсъя куратор

Лагерь 31-тӥ пӧсьтолэзёзь ужалоз. Куинь арня ӵоже пӧртэм мастер-классъёс ортчозы, озьы ик экскурсиос радъялозы, кылсярысь, музейёсы, Калыкъёслэн эшъяськон юртазы этнодизайнер Полина Кубиста доры, Пичи Пургае удмурт дэремез выльдытӥсь Татьяна Москвина доры, Калык творчествоя элькун юртэ, Чеберлыко киужъёсъя йӧскалык центре.

Сменалэн ужанрадлыкеныз солэн «ВКонтакте» мерлыко вотэсысь огиназ тодматскыны быгатӥськоды, отын ик ужрадъёсы гожтӥськон пумысен юанъёс сётыны луоз.

Ватсалом, этномодая сменаез «Ижевские каникулы» ӵектос улсын кар администраци юрттэмен радъязы.

Тодэ вайытом, та дыре Удмуртиын «Шундыкар» лагере мынон понна куриськонъёсты куто.



Наверх
Вниз