Ижкар+18 °C
1 -тӥ коньывуон 2020 Покчиарня
18+

«КультПросвет» урам радио ужаны кутскоз Пичи Пургаын

  • 87
  • 0
Пичи Пурга / Удмуртия
«КультПросвет» урам радио ужаны кутскоз Пичи Пургаын
Туспуктэм: Алексей Арзамасцев

Пичи Пурга черкогуртын Удмуртилэн кунлыкезлы 100 ар тырмонлы «КультПросвет» урам радио ужаны кутскоз. Нырысетӥ выпускез 6-тӥ гудырикошконэ потоз ини. Со сярысь ивортодэтъя «Удмуртия» агентстволэн корреспондентэзлы Пичи Пурга ёрос администрациысь лулчеберетъя но туризмъя управленилэн кивалтӥсез Надежда Степанова вераз.

Солэн кылъёсызъя, «КультПросвет» урам радио гудырикошкон толэзь ӵоже ужалоз но валэктон ужлы сӥземын луоз.

Пургалан трансляция вань, ульча радио шуиськом. Калык трансляциез кылзӥськыны яратэ. Соин ик ульча радио форматэн ужалом. <…> Культура удысысь иворъёсмес сяна, проектъёсмы сярысь ми вералом. Туэ тани лулчеберет удысын сизьым проектмы грант утӥз, соос сярысь вералом, ужрадъёсмы сярысь вералом, собере котькуд лулчеберетъя ужъюртлэн аслаз висъям дырыз луоз
Надежда Степанова, Пичи Пурга ёрос администрациысь лулчеберетъя но туризмъя управленилэн кивалтӥсез

Радиоверанъёсын ас уженызы ёрос музей, искусствоосъя нылпи школа, лулчеберет юрт, библиотека, кибашлыослэн юртсы но мукетъёсыз тодматозы.

Музейлэн «Музейная справочная» висъетэз луоз, искусствоосъя нылпи школамы классика крезьгурен тодматоз. Кылзомы школаын дышетскись пиналъёслэсь классика шудэмзэс. Собере чакласьком на кибашлыослэн юртмылэн аслаз просветительской сэрегез луоз шуыса. Кыӵе киужъёс милям татын улӟытэмын но кызьы со киужъёсты туала улонэ пыртыны луоз, со сярысь луоз нимысьтыз сэрегмы. Нош клубной системамы тодматоз аслаз коллективъёсыныз, усто кырӟасьёсынымы
Надежда Степанова, Пичи Пурга ёрос администрациысь лулчеберетъя но туризмъя управленилэн кивалтӥсез

Сузъетъёсты ёросысь тужгес усто коллективъёслэн но кырӟасьёслэн удмурт но ӟуч кылын кырӟанъёссы шулдыртозы. Озьы ик кылзӥсьёс Герман Корепановлэсь крезьгурзэ, Антон Чеховлэсь вероссэ кылзыны быгатозы. Сузъетъёс ӟуч но удмурт кылын луозы.

Нош азьланяз, Надежда Степановалэн верамезъя, сузьетъёслэсь люкетъёссэ мерлыко вотэсъёсы но поттозы. Озьыен, Пичи Пургаын улӥсьёслэн но куноослэн сяна, соосты кылзыны, Пичи Пурга ёрослэн улон-вылонэныз тодматскыны вань мылкыд карисьёслэн но луонлыксы луоз.

Нырысетӥез сузьет 6-тӥ гудырикошконэ 12 часын потоз но час ӵоже кыстӥськоз. Нош кыкетӥез 17 часысен 18 часозь чузъяськоз. 

8-тӥ гудырикошконэ Ижкарын егитъёслэн йӧскалык лулчеберетсыя «Тангыра» фестиваль ортчоз



Наверх
Вниз