Ижкар+18 °C
1 -тӥ коньывуон 2020 Покчиарня
18+

Пичи Пурга ёросысь калык хор Анапаын «Живи у моря» ӵектосэ пыриськоз

  • 143
  • 0
Анапа / Россия
Пичи Пурга ёросысь калык хор Анапаын «Живи у моря» ӵектосэ пыриськоз
Туспуктэм: Надежда Леонтьева

Пичи Пурга ёрос лулчеберет юртысь калык хор «Живи у моря» федерал ӵектослэн ӧтеменыз Анапае мынӥз. Хорын кырӟасьёс отын арня ӵоже шутэтскозы но асьсэлэсь творчествоя быгатонлыкъёссэс возьматозы. Со сярысь ивортодэтъя «Удмуртия» агентстволэн корреспондентэзлы калык хорлэн кивалтӥсез Надежда Леонтьева вераз.

Зарезь дуре Удмуртиысь «Роза мира» гранд-фестивальлэн лауреатъёсыз мыно.

Коллективме кытчы ке но туж потэ ини вал поттэме. Ми «Роза мира» элькун конкурсын куинь ар выступать кариськом ини. Ми отын кык пол лауреатъёс но луэмын, огпол гран-при но басьямын ини. Соос лауреатъёсты арлы быдэ кытчы ке но поттало. Туэ тани милемыз Анапае ӧтизы
Надежда Леонтьева, Пичи Пурга калык хорен кивалтӥсь

Пичи Пургаысь кырӟасьёс 13 кузя потӥзы. Анапае соос куать номерзэс нуо: куинь удмуртсэ, кык ӟучсэ но наигрышъёс. Со сяна, огезлэн кырӟасьсылэн пиез Савелий Богданов Быдӟым Атыкай ожын Вормонлы 75 ар тырмонлы сӥзем кылбур лыдӟоз.

Тунсыко, хоре пыриськисьёс мынон сюрессэс но тэк уг ортчыто: поездын яке дугдылон интыосын но кырӟало, репертуарзэс тодазы ваё.

Кырӟасьёс асьсэды кык санаторийёсын возьматозы. Со сяна, артистъёслы Россилэн лымшор шаеретӥз экскурсиос ортчытозы. Одӥг нуналзэс быдэсак Крым выжен тодматсконлы висъялозы. 

Нялтас вераса, фестивале Пичи Пургаысь калык хор сяна, ёросысь ик Яган-Докья черкогуртысь семья, Алнашысь кырӟась но «Роза мира» вожвылъяськонысь жюрилэн ёзчиосызлэн академ хорзы пыриськозы. 

«Живи у моря» ӵектослэн одӥгез ӧрез – Кубаньын улӥсьёсты Удмуртиысь йӧскалык лулчеберетэн тодматон. Нош таиз ужрадзы озьы ик Вормонлы 75 ар тырмонлы но Удмуртилэн кунлыкезлы 100 ар тырмонлы тупатэмын


Наверх
Вниз