Ижкар+17 °C
26 -тӥ куарусён 2020 Кӧснунал
18+

Удмуртиысь книгаос «Малая Родина - 2020» огъяросси вожвылъяськонысь дипломъёсын бертӥзы

  • 93
  • 0
Москва / Россия
Удмуртиысь книгаос «Малая Родина - 2020» огъяросси вожвылъяськонысь дипломъёсын бертӥзы
Туспуктэм: Удмуртиысь печатья но калыке ивортодэт вӧлмытонъя агентстволэн пресс-службаез

«Удмуртия» издательстволэн книгаосыз улосвыл но шаертодонъя литературая «Малая Родина - 2020» огъяросси вожвылъяськонысь дипломъёсын бертӥзы. Конкурслы йылпумъянъёс Москваын 33-тӥ калыккуспо книга адӟытон-ярмаркаын лэсьтӥзы. Со сярысь ивортодэтъя «Удмуртия» агентстволэн корреспондентэзлы «Удмуртия» книгапоттоннилэн кивалтӥсез Юрий Кузнецов вераз.

Туэ конкурсэ 52 книгапоттониослэсь 100-лэсь трос книгаос пыриськизы

Вожвылъяськонын «Увлекательное краеведение» номинациын лауреат «Удмуртия» издательстволэн «Мифы, легенды и сказки удмуртского народа» книгаез луиз. Дипломъёсын книгапоттонниез, суредасез но авторзэ пусйизы.

Озьы ик «Дело мастера боится» номинациын «Секреты удмуртских мастеров» книга диплом басьтӥз.

Сыӵе учыръёс, куке одӥг издательство кык пол сцена вылэ туба, со туж шер та конкурсын, малы ке шуоно отчы быдэс Россия пыриське, и кык пол мед синйылтозы шуыса, со туж но туж шер учыр. Одӥг пол гинэ но со лыдметэ шедьыны туж шер ай. <…> Нырысьсэ ми луимы лауреатъёс, со милемыз туж но туж шумпоттэ
Юрий Кузнецов, «Удмуртия» книгапоттоннилэн кивалтӥсез

Со сяна издательстволэн удмурт кылын «Лӧпшо Педунь, Алдар Иван но мукетъёсыз» книгаез но «Туала удмурт поэзия», «Туала удмурт проза» антологиез Россиысь книгапоттӥсьёслэн ассоциацизылэн «Лучшее региональное издание» вожвылъяськоназ лауреатъёс луизы.

Пусъём, Москваысь «Манеж» шор адӟытон залын 2-6 куарусёнэ ортчем 33-тӥ калыккуспо книга адӟытон-ярмаркае ас адӟытонэныз Удмуртиысь книгапоттонни нырысьсэ пыриськиз.

Туэ нырысьсэ милемлы, Россиысь тужгес умой, адскымон издательствоослы, сётӥзы луонлык татчы дун тырытэк пыриськыны. <…> Али «Удмуртия» издательстволэн авторитетэз туж бадӟым. Ми регионъёсысь устоосыз издательствоос пӧлы пыриськом
Юрий Кузнецов, «Удмуртия» книгапоттоннилэн кивалтӥсез

Кызьы пусйиз Юрий Кузнецов, туэ адӟытон-ярмарка коронавирус инфекци вӧлмонэн сэрен трос сюбегатонъёсын радъяськиз. Соин валче кунгож сьӧрысь пыриськисьёс но тросэз ужрадэ книгаоссэс гинэ келяны быгатӥзы. Озьы ке но, адӟытон туж умой ортчиз. 

Тодэ вайытом, азьвыл издательстволэн книгаосыз «Малая Родина - 2020» огъяросси вожвылъяськонлэн вакчи лыдметаз сюризы шуыса ивортӥзы вал. 



Наверх
Вниз