Ижкар+17 °C
26 -тӥ куарусён 2020 Кӧснунал
18+

Алнаш ёросысь удмурт фольклор коллектив Смоленскын огъяросси вожвылъяськонлэн лауреатэз луиз

  • 90
  • 0
Смоленск / Россия
Алнаш ёросысь удмурт фольклор коллектив Смоленскын огъяросси вожвылъяськонлэн лауреатэз луиз
Туспуктэм: vk.com (Кузебаевский СДК)

Алнаш ёросысь Кузёбай гуртысь «Берекет» фольклор ансамбль 5-тӥ куарусёнэ Смоленскын ортчем фольклор ансамбльёслэн «Традиции» огъяросси вожвылъяськоназы кыкетӥ степенё лауреат луиз. Со сярысь ивортодэтъя «Удмуртия» агентстволэн корреспондентэзлы ансамбльлэн кивалтӥсез Елена Лаврентьева вераз.

Та туж бадӟым вормон ми понна. Вормон понна ӧм но мынэ вал, ум но оскиське вал инты но сётозы шуыса. Калыкез, дуннеез адӟыны, асьмелы куаныны шуыса потӥм вал. Кыкетӥ степенё лауреатъёс ӧм ке но луысалмы, кӧтмы ӝож ӧй луысал
Елена Лаврентьева, «Берекет» ансамбльлэн кивалтӥсез

Елена Лаврентьевалэн кылъёсызъя, соос Алнашысь ёрос лулчеберет юртэн валче мукет вожвылъяськонэ пыриськыны видео дасязы вал. Но пандемиен валче ужрадэз ӧз ортчытэ. Соку методистсы Смоленскын вожвылъяськон луоз шуыса тодыса, ужзэс отчы келяз. Бӧрысь ансамбльлы ужрадэ пыриськыны ӧтён вуиз.

«Берекет» ансамбле пыриськисьёс учкисьёслы «Уфае, Уфае» кырӟан, пудо сёткан гур но бӧрысь гур быдэстӥзы.

Ужрадэ быдэс Россиысь 23 фольклор коллективъёс пыриськизы. Кузёбайёс понна та одӥгез бадӟымез вожвылъяськон луиз, уго коллективзылы туэ 1-тӥ куарусёнэ вить ар гинэ тырмиз ай.

Вожвылъяськонэ «Берекет» ансамбле укмыс пыриськисьёс вуылӥзы. Елена Лаврентьевалэн верамезъя, ветлэмзылэсь, учкисьёслэн пумитамзылэсь туж шуныт мылкыдзы кылиз.

Туж синмасько костюмъёсмылы. Тросэз «Брангурт песянайёсты» тодо. Тӥ соос-а шуыса юало но, ми бускель гуртысь шуыса серекъяськом. Смоленске вуон азямы «мар бон кырӟаса потом ай, пумиталозы ук» шуыса кенешыса, шыпыт гинэ кырӟаны кутским но, кылӥзы, снимать каро, кылзӥсько, «Браво!» шуыса чабко, тунсыко. Адями улэпкын кырӟамлэсь мӧзмемын
Елена Лаврентьева, «Берекет» ансамбльлэн кивалтӥсез

Вожвылъяськонэ пыриськем сяна, коллективъёс Смоленск улосвылысь ёросъёсы концертъёсын потазы. «Берекетъёслы» Ярославльысь но Москваысь коллективъёсын Ершичской ёросэ вуылыны шуд усиз. Отын соос котькудзы 6-7 номер возьматӥзы.

Со сяна, вожвылъяськонэ пыриськисьёс понна Смоленск каретӥ экскурсия ортчытӥзы.

Смоленсклы туж-туж синмаським. Тужгес но ми крепостной стеназылы паймим. <…> Гурезё кар, туж чылкыт, туж чебер, туж трос синпелетъёссы, машина ӧжыт. Рекламазы ӧвӧл. Солы воксё паймим. <…> Милям коллективысьтымы Семён Алексеевлэн песятаезлэн братэз Смоленск палан быремын (Быдӟым Атыкай ож аръёсы – ред.), нош отын парксы вань, соин ми куяським но отын. <…> Со сыӵе инты, отчы ведь трос асьмелэнъёс быремын, синкылиос шыр гинэ васько
Елена Лаврентьева, «Берекет» ансамбльлэн кивалтӥсез

Тодэ вайытом, Удмуртиысь калык эктонъя «Купанча» элькун вожвылъяськонэ куриськонъёсты кутыны кутскизы



Наверх
Вниз