Ижкар-11 °C
4 -тӥ толсур 2020 Удмуртарня
18+

Коми-пермяк лулчеберетлэн нуналъёсыз ортчозы Ижкарын

  • 77
  • 0
Ижкар / Удмуртия
Коми-пермяк лулчеберетлэн нуналъёсыз ортчозы Ижкарын
Туспуктэм: vk.com ("ШОНДiБАН" • ЛИК СОЛНЦА)

12-29 шуркынмонэ Ижкарын коми-пермяк лулчеберетлэн нуналъёсыз ортчозы. Со сярысь Удмуртиысь Калыкъёслэн эшъяськон юртсылэн пресс-службаез ивортӥз.

12-тӥ шуркынмонэ Калыкъёслэн эшъяськон юртазы вашкала коми-пермяк дӥськутэн, чеберлыко киужъёсын но суредъёсын бадӟым адӟытон усьтӥськоз

28-тӥ но 29-тӥ шуркынмонэ горд сюен, туен ужанъя, кускерттонъёсты керттонъя, басма вылэ суред пуктонъя мастер-классъёс радъяськозы. Со сяна, коми-пермяк сиён-юонъёсты веръяны луоз. Та ужрадъёсы азьвыл ик гожтӥськыны кулэ, телефон номеръёс: 8-950-811-30-11, 63-10-62.

Нош чаклам концертъёсы Ижкарын улӥсьёс гинэ ӧвӧл, вань мылкыд карисьёс учкыны быгатозы. Соосты «Вконтакте» мерлыко вотэсын но Youtube каналын возьматозы.

27-тӥ шуркынмонэ 19 часын Коми-пермяк лулчеберетлэсь нуналъёссэ усьтон ортчоз. Отчы устоосыз коми-пермяк коллективъёс пыриськозы, соос пӧлын «Виль шы», «Шай-май», «Мича асыв», «Шондiбан», озьы ик искусствоосъя нылпи школаослэсь устооссэ номеръёссэс, йӧскалык шӧмо дӥсьёсты возьматозы.

28-тӥ шуркынмонэ 11 часын Большая Коча черкогуртысь «Мича асыв» фольклор ансамбльлэн концертэз ортчоз. Коллектив ас палысьтызы сям-йылолъёсты люка но уте. Учкисьёс пу-барабан шудэм улсын коми-пермяк кырӟанъёсты кылзыны но тупи-тап эктонэз дышетыны быгатозы.

28-тӥ шуркынмонэ 19 часын «Шай-май» фолк-группалэсь концертсэ учкыны ӵекто. Коллектив шулдыр но мӧзмыт, калык но туала гожтэм кырӟанъёсты быдэстэ, туала но йӧскалык крезьгуро инструментъёсын шудэ.

29-тӥ шуркынмонэ 19 часын «Виль шы» этической проект йылпумъясь концерт ортчытоз. Отчы пыриськисьёс Пермьын, Ижкарын но Пермь шаерысь Юсьва ёросын уло, соин ик ӵем уг люкаськыло. Котькуд концертсы выль сямен чузъяське, учкисьёс пелянэз но кураез, ӟуч крезез но санквылтапез, джембеез но пу-барабанэз кылозы.

Вань ужрадъёс Удмуртиысь Калыкъёслэн эшъяськон юртазы радъяськозы

Тодэ вайытом, 25-27 куарусёнэ Коми-Пермяк автоном округлэн шоркараз Кудымкарын Удмурт лулчеберетлэн нуналъёсыз ортчизы.



Наверх
Вниз