Ижкар-11 °C
4 -тӥ толсур 2020 Удмуртарня
18+

Алангасаръёс сярысь мультфильм кылдытӥзы Дэри ёросын

  • 57
  • 0
Дэри / Удмуртия
Алангасаръёс сярысь мультфильм кылдытӥзы Дэри ёросын
Туспуктэм: Видеоысь скриншот

Дэри черкогуртысь «Центральный» лулчеберет огъетысь клубъёсын ужан методикая ӧнерчи Альбина Зайцева «Алангасары. Удмуртские великаны» мультфильм кылдытӥз. Матысь дыре сое удмурт кылэ берыктыны малпа. Со сярысь мультфильмлэн авторез ивортодэтъя «Удмуртия» агентстволэн корреспондентэзлы вераз.

Нырысь-валысь берыктэм версиез солэн вань ини. Но со чылкыт, литература кылын ӧвӧлгес. Соин ик мон этнографлы Татьяна Владыкиналы вазиськыны малпасько
Альбина Зайцева, «Алангасары. Удмуртские великаны» мультфильмлэн авторез

Мультфильм лэсьтыны малпанэз Альбина Зайцевалэн пандемия кутскон вакытэ кылдӥз.

Мынам мар ке но пиналъёслы лэсьтэме потӥз, мар соослы зэмзэ но тунсыко луоз. Озьы малпай, со мультфильм луоз шуыса
Альбина Зайцева, «Алангасары. Удмуртские великаны» мультфильмлэн авторез

Мультфильм кылдытон понна Альбина Зайцева алангасаръёс сярысь темаез басьтӥз. Солэн кылъёсызъя, котькуд ар ужъюртсы удмурт лулчеберетъя толэзь улсын пиналъёслы шутэтскон но тодон-валан люкан программа дася. Кылем арын, кылсярысь, Шунды мумы сярысь мадизы. Нош туэ сое великанъёслы сӥземзы потӥз.

Соос бадӟымесь ук, мыным потэ, соос пыр пиналъёсты удмурт фольклорен тодматскыны кыскыны тужгес но капчи. Соос сыӵе супер-геройёс выллем. Нимзы но соослэн тунсыко – Алангасаръёс
Альбина Зайцева, «Алангасары. Удмуртские великаны» мультфильмлэн авторез

Альбина Зайцева ваньзэ ас киыныз лэсьтӥз: мышпалъёс (фон) суредаз, алангасаръёслэсь мугоръёссэс лэсьтӥз, снимать кариз. Озьы ик солы нылпиосыз юрттӥськизы: кыӵе ке пичи люкетъёсты лэсьтӥзы, лымы пырыос вандылӥзы. Ужазы соос акварель буёлъёс, скульптураослы но огшоры пластилин кутӥзы. Мультфильмез телефон камерае гожтӥзы.

Вань ужъёсты гуртамы, кухняямы, тыл котьку одӥг кадь мед луоз шуыса, уйин лэсьтӥм. Толэзьлы пала кухнямы мастерскойлы пӧрмиз, ӝыныез ке но пластилинэн тырмытэмын вал
Альбина Зайцева, «Алангасары. Удмуртские великаны» мультфильмлэн авторез

Пусъём, алангасаръёслэсь тусъёссэс ӧнерчи ас йырысьтыз, ас валамезъя быдэстӥз.

Алангасаръёс – соос великанъёс ук. Одӥг удмурт дауркылъя, адямиос великанъёслэсь пӧрмизы шуыса веран вань. Озьыен, соос адямиос тусъем, ӝуждалазыя гинэ бадӟымесь. Но соосты висъясь тус мон пыртӥ ик. Дауркыл удмурт бере, горд йырсиё, паськыт бамлыо, горд бамо лэсьтӥ
Альбина Зайцева, «Алангасары. Удмуртские великаны» мультфильмлэн авторез

Альбина Зайцевалэн кылъёсызъя, вить минутъем мультфильмлы оглом 1 сюрс котыр яке солэсь но трос кадръёс кошкизы

Мультфильмлы ас куаразэ «Центральный» лулчеберет огъетысь режиссёр Сергей Кочин сётӥз, гожтыны ужъюртысь ик ӧнерчизы Антон Устьянцев юрттӥз.

Ватсалом, мультфильмлэсь удмурт кылын версизэ автор матысь дыре поттыны чакла. 




Наверх
Вниз