Ижкар-11 °C
4 -тӥ толсур 2020 Удмуртарня
18+

Удмуртысь йӧскалык театр спектакльёссэ толсур кутсконысен возьматыны чакла

  • 121
  • 0
Ижкар / Удмуртия
Удмуртысь йӧскалык театр спектакльёссэ толсур кутсконысен возьматыны чакла
Туспуктэм: Григорий Фомин

Удмуртиысь йӧскалык театр спектакльёссэ возьматонэз толсур кутсконысен азьланьтыны чакла. Со сярысь ивортодэтъя «Удмуртия» агентстволэн корреспондентэзлы театрлэн кивалтӥсез Андрей Ураськин вераз.

Солэн кылъёсызъя, учкисьёс, театръёслы ужаны лэзизы шуыса, ужъюртысь вань телефонъёсы жингыръяло ини спектакль юаса. Озьы ке но, туннэ нуналысен ик усьтӥськыны уз быгатэ на.

Милемлы дыр кулэ. <…> Малы ке шуоно учкисьлы вуттыны кулэ милесьтым репертуармес, вераны кулэ, ку ужаськом ми, билет басьтыны кулэ. Со ведь 10 адями гинэ ӧвӧл. Кин жингыръя, возьмаса улэ, 10-15 адями лыктоз, но куд-огез тодыса-валаса уз вуттэ. Рекламалы дыр кулэ. Соин ик, малпасько, спектакльёсмы толсур кутсконысен кутскозы
Андрей Ураськин, Удмуртиысь йӧскалык театрлэн кивалтӥсез

Учкисьёсты пумитан понна театр Роспотребнадзорлэсь куронъёссэ быдэсъяны дась: пырисьёслэсь температуразэс мертаны термометръёс басьтэмын, антисептикен дозаторъёс сыло.

Роспотребнадзорлэн куронъёсыз вань, соос чурытэсь, соос ваньмызлы одӥг кадесь: магазинъёслы но, театръёслы но, кассаослы но, трос калык люкаськон медаз луы. Но, мон малпасько, милям озьы уз но луы, малы ке шуоно милям азьвыл ик билетъёсмы онлайн тросгес кошко вал ини. Валамон, ми ӵуж гожъёс но, мар но лэсьтом. Температуразэс вань калыклэсь ми али но учкиськом ини, кин театре пыре, кин потэ, асьме ужасьёсмылэсь но, лыктӥсьёсмылэсь но
Андрей Ураськин, Удмуртиысь йӧскалык театрлэн кивалтӥсез

Учкисьёслы залын калыкез шахмат радлыкъя пуктозы - куспазы одӥг метр ке но вис мед луоз. Сыӵе амалэн зал ог 50 процентлы тырмытэмын луыны быгатоз. Озьы ик фойеын, буфетын трос калык медаз люкаськы шуыса чакласа возёзы.

Бадӟым вис бере учкисьёсын пумиськонэз котькуд театрын чидатэк возьмало.

Ӝыны ар ужатэк пуким ини, туж мӧзмим ини ми, весь вань цехъёс, весь вань ӧнерчиос тани бызьыло ини ужаськом шуыса, шумпотыса. Артистъёс ветло, ку спектакль пуктом шуыса. Ми дась вал ини солы, премьераосмы но вал, выль спектакльёс но дасямы, репетировать каримы. Но театр ведь улыны уг быгаты калыктэк, учкисьтэк. Спектакль учкисьтэк уг луы. Тӥни сыӵе сегментэз театрлэн ӝыны ар ӧй вал
Андрей Ураськин, Удмуртиысь йӧскалык театрлэн кивалтӥсез

Андрей Ураськинлэн верамезъя, нырысь ик калыклы кельшымон комедия пуктозы шуыса малпало. Нош бӧрысь вань репертуарзэс возьматыны кутскозы.

Ми нырысь ик, оло, премьерамес пуктомы шуыса малпаськом вал, но сое озьы гинэ пуктыны уг луы на, малы ке шуоно милям берпуметӥяз премьераямы учкись сцена вылын пукыны кулэ. Нош учкисьёс артистъёсын кусып возьыны уг яра. Соин ик, яралоз-а сое возьматыны, уз-а, ум тодӥське на. Соин ик ми азьло спектакльёсынымы ик кутскомы. Малпасько, «Ой, чебер нылъёсын» яке «Насьток но Исьтокен»
Андрей Ураськин, Удмуртиысь йӧскалык театрлэн кивалтӥсез

Со сяна, театрысь артистъёс Выль арлы нылпиослы выжыкыл дасяло ини. Сое одно ик возьматозы. Озьы ик, театрен кивалтӥсьлэн кылъёсызъя, учкисьёс арлы быдэ ортчись Выль ар концертсэс но возьмало. Сое но дасяны тыршозы.

Нош Выль арлы сӥзем кыз котырын шулдыръяськонъёс туэ уз луэ.

Сое лэземын ӧвӧл. Озьы ик гожтэмын пуктэтын: спектакль азьын шулдыръяськон ужрадъёс лэземын ӧвӧл. Соин ик интермедиосмы милям туэ уз луэ, жаляса верано. Но ми театрмес озьы ик чебер каром, кызъёс пуктылом, праздник, Выль ар атмосфера мед луоз театрамы шуыса
Андрей Ураськин, Удмуртиысь йӧскалык театрлэн кивалтӥсез

Тодэ вайытом, Удмуртиын театръёслы, кинотеатръёслы, концерт залъёслы, лулчеберет юртъёслы ужаны 17-тӥ шуркынмонысен лэзизы



Наверх
Вниз