«Удмуртия» издательство «Туала удмурт нылпи литература» антология поттӥз. Со сярысь ужъюртлэн «ВКонтакте» мерлыко вотэсысь бамаз ивортӥзы.
Антологие шедем авторъёс пӧлын удмурт литератураысь классикъёс но, кылсярысь, Вениамин Ившин, Вячеслав Ар-Серги, Олег Четкарёв, Василий Ванюшев, егит гожъясьёс но - Наталья Варламова, Елена Богданова, Надежда Шкляева. Валамон, озьы ик нылпиослы трос гожъясьёс авторъёс - Алексей Ельцов, Семён Карпов, Лия Малых, Ульфат Бадретдинов но мукетъёсыз.
Со сяна, бичетэз 16 суредасьёслэн 350-лэсь трос иллюстрациоссы узырмыто.
Антологилэн тиражез 2 сюрс 200 экземпляр. Ваньзэ сямен сое элькунысь муниципал но школа лыдӟиськонниосы келялозы.
Тодэ вайытом, азьвылгес Удмуртиын туала удмурт поэзилэн но прозалэн антологиоссы потӥзы.