Ижкар-11 °C
4 -тӥ толсур 2020 Удмуртарня
18+

«100 пӧртэм дэрем» адӟытон дасязы Можга ёросын Удмуртилэн кунлыкезлы 100 ар тырмонлы

  • 67
  • 0
Можга / Удмуртия
«100 пӧртэм дэрем» адӟытон дасязы Можга ёросын Удмуртилэн кунлыкезлы 100 ар тырмонлы
Туспуктэм: ВЫСТАВКА "100 пӧртэм дэрем" видеоысь скриншот

Можга ёросын Удмуртилэн кунлыкезлы 100 ар тырмонлы «100 пӧртэм дэрем» адӟытон дасязы. Со сярысь ивортодэтъя «Удмуртия» агентстволэн корреспондентэзлы Можга ёросысь туризмез но киужез азинтонъя центрысь валтӥсь методист, удмурт дэремъя «Катар» студилэн кивалтӥсез Валентина Берёзкина вераз.

Элькунмылэн кунлык басьтэмез дырысен 100 ар тырмиз бере, ми но, Можга ёросъёс, малпамы мар ке но 100 лыдпусэн герӟаны. Соку шуак ваньмылэн йырамы малпан шуккиз, вашкала дэремъёсын выриськом бере ини, нош кыӵе меда быдэс Можга ёросамы вашкала дэремъёс? Соин ик малпамы «100 пӧртэм дэрем» карыны. Зэмзэ но озьы ик пӧрмиз, но соос табере 100-лэсь но трос луизы
Валентина Берёзкина, Можга ёросысь туризмез но киужез азинтонъя центрысь валтӥсь методист

Адӟытонлы Можга ёросысь вань 13 муниципал кылдытэтъёсысь пӧртэм гуртъёсысь дэремъёсты люказы. Со понна радъясьёс лулчеберет юртъёсын, школаосын ужасьёслы вазиськизы. Валентина Берёзкиналэн кылъёсызъя, ваньзы ик туж капчиен соглаш луизы, Удмуртилэн кунлыкезлы 100 ар тырмонлы сӥзем бадӟым ужрадлы соослэн но дэремъёссы юрттозы шуыса шумпотӥзы. Озьы, пӧлазы бигер палась вуэмъёсыз но, Вавож палась тусъемъёсыз но вань. Но огкадез – одӥг но ӧвӧл.

Кудӥз ке но ёрос гожысь ик бичамын, Нынёкысь но, Учаысь но, Удмурт Пычасысь но, Быдӟым Сурдысь но. Котькытысь-котькытысь. Шор сюлмысьтыз но. Озьы пӧртэм-пӧртэм дэремъёс луизы
Валентина Берёзкина, Можга ёросысь туризмез но киужез азинтонъя центрысь валтӥсь методист

Бызён, нуналысь-нуналэ нуллон удмурт дэремъёс XIX-тӥ даурысен кутскыса, ХХ-тӥ даурысь 60-тӥ аръёсы вуремъёсыз дорозь люкаськизы.

Воксё паймимы, вайизы быдэс комплект, Сибы палась Какся гуртысь. 1832-тӥ арын со воксё но вуремын ини. Тӥни со 1800-тӥ аръёсысь туж трос комплектъёс вуизы. Сыӵе калык татын дэремъёссэ ненег сяськаез кадь возем
Валентина Берёзкина, Можга ёросысь туризмез но киужез азинтонъя центрысь валтӥсь методист

Нош кызьы утиллям сыӵе вашкала дэремъёсты, юалоды. «Катар» студиен кивалтӥсьлэн верамезъя, вашкалаослэсь чакласа.

Пичи дырысенымы, пе, кылемын сыӵе суред: анайёссы шуо, пе, вылэм - куар чиньы йыл быдӟа луиз ке, одно ик тӧлатыны поттоно ини, нош сӥзьыл нырысетӥ куар усиз ке, выльысь кеносъёсы сандыкъёсы пыртано. Озьы, туж рос-прос, калыкез, инкуазез чакласа дэремъёсты утё вылэм
Валентина Берёзкина, Можга ёросысь туризмез но киужез азинтонъя центрысь валтӥсь методист

Адӟытонэз радъясьёс азязы дэрем пыр удмурт калыклэсь даур ӵоже ортчем сюрессэ возьматыны ужпум пуктӥзы: кызьы улӥзы, кызьы улон воштӥськиз, кызьы со улон удмурт нылкышнолэн дэремаз адӟиськиз.

Соос ыжгон, дэра басмалэсь но эшшо бурлат шорт дэремъёс мед луозы шуыса турттӥмы. Берпуметӥосыз тужгес дуноосыз - базар коже дэремъёс. XIX-тӥ даурлэн пумаз ӟеч уло вылэм ини, калык быгатэ вылэм ини басьтыны базарысь сӥньыс
Валентина Берёзкина, Можга ёросысь туризмез но киужез азинтонъя центрысь валтӥсь методист

Со сяна, дэремъёс адямилэсь кыӵе луэмзэ, сямзэ но возьмато. Валентина Берёзкина пусъе, котькуд дэрем тунсыко, дуно-а со, дунтэмгес-а, уго сое нуллӥсь ас даурзэ улӥз, улонэз адӟиз.

Одӥг кышномуртлэсь тани вайизы дэремзэ, Поршур гуртысь. Со выльысь 84 аресказ, огназ улӥсь кышномурт, корка пуктэ. Но 84 арескын кыӵе огназ улӥсь нылкышно дӥсьтоз выль корка пуктыны? Нош со озьы шуэм: «Кулон азям выль коркан улэме потэ». Одӥг тӥни со дэремъя ик валаськод – дэремез но куаж-куаж лэсьтэмын, вань сюлмысь. Тӥни озьы удмурт нылкышно усьтӥське
Валентина Берёзкина, Можга ёросысь туризмез но киужез азинтонъя центрысь валтӥсь методист

Пусъём, кык арня ӵоже адӟытонэн Можга карын тодматӥзы, нош табере сое Можга ёросысь Кватчи гуртын «Катар» студиын возьматозы.

Калык куриз, ваньзылэн адӟемзы потэ, ваньзы экскурсиен лыкто - пичиен бадӟымозь. Ваньзылы со выль усьтон - удмурт дэрем пыр Можга калыкез, солэсь историзэ, улон сюрессэ – ваньзэ-ваньзэ тани та экскурсиын адӟыны луоно. Соин ик ми малпамы сое Выль арозь кыскыны
Валентина Берёзкина, Можга ёросысь туризмез но киужез азинтонъя центрысь валтӥсь методист

Валентина Берёзкина пусйиз, юась луиз ке, адӟытонэз Ижкаре но ваёзы. Нош бӧрысь вань дэремъёсты берен кузёоссылы берыктозы.

Мон весь шуисько, куке дэремъёсты чебер-чебер манекен вылэ понӥськом, чебер-чебер вераськом, семьяослэн асьсэлэн но со дэремлы мылкыдзы ӝутӥське кадь. Соос собере дунъяны кутско со дэремъёссэс, милемлы кельтэмзы уг поты ни, выльысь куро. Соин ик ми соосты выльысь берыктомы
Валентина Берёзкина, Можга ёросысь туризмез но киужез азинтонъя центрысь валтӥсь методист




Наверх
Вниз