Ижкар+9 °C
18 -тӥ оштолэзь 2021 Воскресенье
18+

Нылпиослы нырысетӥ удмурт антологиен тодматӥзы Ижкарын

  • 157
  • 0
Ижкар / Удмуртия
Нылпиослы нырысетӥ удмурт антологиен тодматӥзы Ижкарын
Туспуктэм: Анжелика Тихонова

Ижкарын Калыкъёслэн эшъяськон юртазы «Туала удмурт нылпи литература» нырысетӥ антологиен тодматӥзы. Книгаез Удмуртилэн кунлыкезлы 100 ар тырмон улсын но элькун кивалтэтлэн юрттэмез улсын поттӥзы. Ужрадэ ивортодэтъя «Удмуртия» агентстволэн корреспондентэз но вуылӥз.

Та зэмзэ но аспӧртэм книга, малы ке шуоно <…> со асьмелэн шаермылэн историез, асьме литературамылэн, асьме улонмылэн. Шуиськом ке но книга нылпиослы шуыса, мон оскисько, со арлыдо лыдӟисьёслы но тунсыко луоз
Владимир Соловьёв, Удмуртиысь лулчеберетъя министр

Книга 400 бам вылын но 2 сюрс 200 тиражен потӥз. Отчы 41 авторъёслэн кылбуръёссы, веросъёссы, сценкаоссы, 16 иллюстраторъёслэн пӧртэм аръёсы лэсьтэм 350-лэсь трос суредъёссы пыризы

«Удмуртия» книгапоттоннилэн кивалтӥсез Юрий Кузнецов пусйиз, книгае асьсэзыс возьматэм авторъёс гинэ пыризы шуыса.

Антологие пыризы адямиос, кудъёсыз асьсэды возьматӥзы ини соос писательёс шуыса удмурт литератураын
Юрий Кузнецов, «Удмуртия» издательстволэн кивалтӥсез
 

«Туала удмурт нылпи литература» антологиен тодматон

13 фото
 

Антологие «Кизили» журналлэн азьвыл редакторезлэн, гожъяськисьлэн Ульфат Бадретдиновлэн но ужъёсыз пыризы. Со  книгалэсь туж бадӟым кулэлыксэ пусйиз.

Отчы пыртыны тыршемын сыӵе тунсыкоесь, мур пуштросъемесь, шуом, ужъёс: веросъёс, кылысь люкетъёс, кылбуръёс, пиналъёслы сётэмын сценкаос - тужгес но яркытэз нылпиослы потэмез
Ульфат Бадретдинов, гожъяськись
 

Ульфат Бадретдиновлэн чакламезъя, нылпиослы антологие пырем тужгес пиналэзлы авторлы, Лукерья Шиховалы, 29 арес, нош мӧйыезлы, Лидия Черновалы, 93 арес. Нош оглом авторъёслэсь шоро-куспо арлыдзэс чакланы ке, 60 арес луэ.

Нылпи антологилэсь нырысетӥ тиражзэ быдэсак муниципал но школа библиотекаосы келялозы

Юрий Кузнецов азьланяз удмурт нылпи литература эшшо но тросгес мед потысал шуыса мылкыдзэ вераз.

Мынам ноку но шуэме уз луы, туала удмурт нылпи литература трос потэ шуыса, малы ке шуоно араз 200-300 книгаос потӥзы ке но, соос ноку мултэс уз луэ. Малы ке шуоно, нылпи книгаос бордысен кутске асьмелэн удмурт кылмылэн азинсконэз
Юрий Кузнецов, «Удмуртия» издательстволэн кивалтӥсез

Озьы ик со мукет шумпотымон ивор но вераз. Матысь дыре Удмуртиын 3 аресысен 7 аресозь нылпиослы «Зарни бугор» тямыс хрестоматия поттозы. Со чибориё, бадӟым книгаос луозы. Соосты вань нылпи садъёсы дунтэк келялозы.

Антология 2019-тӥ арын потэм «Туала удмурт проза» но «Туала удмурт поэзия» книгаослэн азьланьтонзы луиз, соос 2019-тӥ арын потӥзы вал

Тодэ вайытом, «Удмуртия» издательство пӧртэм классъёсын пиналъёслэсь удмурт кылъя но литературая тодонлыкъёссэс эскерон но дунъян методика пособиосты поттӥз.



Наверх
Вниз