Ижкар-4 °C
5 -тӥ толсур 2021 Воскресенье
18+

3-тӥ толсуре Ижкарын Суредан устолыкъя элькун музейын Удмуртиысь калык суредасьлэн Вячеслав Михайловлэн адӟытонэз ужаны кутскиз. Ужрад усточилэн 70 арес тырмонэзлы сӥземын. Со сярысь ужъюртлэн пресс-службаез ивортӥз.

Адӟытонлэн валтӥсь малпанэз – суредасьлэн творчествоез пыр выжыослэн кулэлыксы, адямилэн но инкуазьлэн тупамзы сярысь тодэ вайытон.

Вячеслав Михайлов аспӧртэм суредась, синъёсты кыскись инкуазьсуредъёс но натюрмортъёс кылдытэ, удмурт мифологиен герӟаськем мур пуштросо ужъёс лэсьтэ.

Адӟытон 30-тӥ толшорозь ужалоз, пыронэз дунын.

Тодэ вайытом, Удмуртиын улӥсьёс калык лулчеберетэз возьматӥсь туспуктэмъёсъя вожвылъяськонэ пыриськыны быгато. 

Удмуртиын Крезьгуръя элькун колледжын тупатъян ужъёсты йылпумъязы. Дышетсконниын укноосты вошъязы. Со сярысь элькунысь культурая министр Владимир Соловьёв «ВКонтакте» мерлыко вотэсысь бамаз ивортӥз.

Лулчеберет ужъюртъёслэсь ваньбурзэс выльдон программа улсын колледжлы улосвыл коньдэтысь 1 миллион 115 сюрс манет висъязы.

Министрлэн кылъёсызъя, таяз арын лулчеберетъя сизьым ужъюртъёсын тупатъян ужъёс оглом 15 миллион манет тыр быдэстэмын луозы.

Тодэ вайытом, Калык творчествоя элькун юртын тупатъян ужъёсты нуыны элькун коньдэтысь 3 миллион манет висъязы

Удмуртиысь П. И. Чайковский нимо операя но балетъя театрез Санкт-Петербургын Искусствоосъя «Золотой витязь» калыккуспо славян форумлэн валтӥсь данъетэныз пусйизы. Сое «Сказание о невидимом граде Китеже и деве Февронии» спектакль пуктэмзы понна сётӥзы, ивортӥз элькунысь лулчеберетъя министерстволэн пресс-службаез.

Театрысь валтӥсь балетмейстерлэн Николай Маркеловлэн «ВКонтакте» мерлыко вотэсысь бамаз ивортэмезъя, форум туэ 12-тӥзэ ортчиз. Театрысь ӧнерчиосты валтӥсь данъетэн сяна, зарни дипломъёсын пусйизы

Данъетъёс басьтӥзы:

 Инна Галушко, театрлэн кивалтӥсез, Удмуртиысь лулчеберет удысысь дано ужась;

 Николай Роготнев, театрлэн валтӥсь режиссёрез но спектакльлэн крезьгуръя кивалтӥсез, Удмуртиысь искусство удысысь дано ужась;

– Николай Маркелов, театрысь валтӥсь балетмейстер, пуктӥсь режиссёрез, Удмуртиысь искусство удысысь дано ужась;

– Наталья Меньшикова, театрысь солистка, калыккуспо конкурсъёслэн лауреатсы, Феврониялэсь партизэ быдэстӥсь.

Министерстволэн пресс-службаез пусъе, та опера крезьгурез но пуштросэз ласянь туж шуг, соин ик сое шер пуктыло. Туннэ нуналлы дасям спектакльёс даслэсь ӧжыт лыдъясько. Пуштросаз татаро-монголъёс кузёяськон вакыт, отысь яркыт геройёс возьматэмын. 

Тодэ вайытом, Йӧскалык театрысь артист Никита Михалковлэн театрысьтыз спектакльын валтӥсь воргорон ролез шудоз.

Гарк ёросысь Каменной гуртын лулчеберетъя но ваньмон дыръя центрлэсь выль юртсэ усьтӥзы. Лэсьтӥськон «Культура» йӧскалык ӵектос улсын южтолэзьысен мынӥз. Со сярысь ивортодэтъя «Удмуртия» агентстволы Грак ёросысь «Лидер» лулчеберет юртлэн кивалтӥсез Анастасия Козлова вераз.

Со 100 интылы учкон залэн юрт. Клуб сяна, отчы библиотека но сельсовет интыяськизы. Оглом 23 миллион манет быдтэмын. Тырмытэмын оргтехникаен, мебель, выль креслоос басьтэмын
Анастасия Козлова, Грак ёросысь «Лидер» лулчеберет юртлэн кивалтӥсез

Анастасия Козловалэн верамезъя, гуртоос дасо ар пала клубтэк улӥзы. 1957-тӥ арын пуктэм юртэз куашкан калэ вуэмен лыдъязы но 2013-тӥ арын чылкак ворсазы. Творчествоя коллективъёс, ансамбльёс, пӧртэм кружокъёс ужзэс куспетӥ каризы.

Озьы ик лыдӟиськоннизылэн но юртэз урод ни вылэм, липетэз ялан вияса улӥз. Соин ик корка пырон гуртоос понна туж бадӟым шумпотон луиз.

Милям Грак ёросамы кык гинэ поселениос, кытын улӥсез йылэ. Отын (Каменной гуртын – ред.) вань егитъёс, вань пиналъёс, улӥсез котькытынлэсь трос – 500 адями, пичи район понна со умой. Отын улӥсьёс кемалась выль юрт сярысь малпаськизы, куризы
Анастасия Козлова, Грак ёросысь «Лидер» лулчеберет юртлэн кивалтӥсез

Солэн кылъёсызъя, выль чебер юртэ артысь Улын Адам-Учи гуртын улӥсьёс но ветлозы. Озьы ик Буббы гуртысь но калык вуылоз, дыр. Отын клубзы вань ке но, со пичи но вуж ни, вераз Анастасия Козлова

Тодэ вайытом, кӧня ке нунал азьвыл Грак черкогуртысь «Лидер» лулчеберет юртын 3D кинозал усьтӥзы

Шуркынмонлэн берпуметӥ арнянуналаз Пермь шаерысь Куеда ёросысь Гондыр черкогуртын «Тол вӧсь» удмурт сям-йылолэз ортчытӥзы. Со бере ужрадэ пыриськисьёс котрес ӝӧк сьӧры люкаськылӥзы но Гондырын удмурт гимназия но Куеда ёросын туризмъя но лулчеберетъя йӧскалык центр кылдытон сярысь кенешизы. Со сярысь ивортодэтъя «Удмуртия» агентстволэн корреспондентэзлы Удмуртиысь Камсьӧр удмуртъёслэн йӧскалык центренызы кивалтӥсь Флюра Чибышева вераз.

Ужрадэ Пермь шаерысь Чернушка, Уинское, Куеда ёросъёсысь, Башкириысь Янаул, Татышлы ёросъёсысь, Удмуртиысь удмуртъёс вуылӥзы. Соос Инмарлы тау карыса, толэз ӟечен потыны мед быгатозы, пудолы сиён мед тырмоз шуыса курыса, «Тол вӧсь» сям-йылолэз радъязы. «Дӧдьы кыткон» но ортчытӥзы, пӧртэм шудонъёсын шудӥзы, шулдыръяськизы. 

Нош собере мер огазеяськонъёсын кивалтӥсьёс котырес ӝӧк сьӧры люкаськизы. 

Кемалась ӧвӧл, та центрын (Гондын гурт поселениын – ред.) кык школаосты огазе каризы. Кипчак гуртысь удмурт школаез вайизы. Сое Куедае келяны малпало вал, но удмурт центрлэн тӧроез Олег Фатталов чутрак пумит луиз: удмурт школаосыз ӟуч школаосын сурано ӧвӧл, Гондырысь школаен огазеяно, кытын удмурт пиналъёс дышетско, шуиз. Школаосты огазеяса, Гондыр школаен кивалтӥсез но воштӥзы, удмуртсэ пуктӥзы
Флюра Чибышева, Удмуртиысь Камсьӧр удмуртъёслэн йӧскалык центренызы кивалтӥсь

Али школалы Максим Прокопьевлэсь нимзэ но удмурт йӧскалык инлык сётон сярысь вераськон ӝутӥзы. Школаез гимназия карыны но мылкыдзы вань. Дышетскисьёслы интернатлы инты но сюроз, шуо. Бӧрысь отчы, Пермь шаерысь сяна, Башкортостанысь Янаул, Татышлы ёросъёсысь удмурт пиналъёс но дышетскыны лыктыны быгатысалзы.

Али та уж бордын удмурт центр но Куеда ёросысь дышетонъя ёзэт ужало. Тӧрозы куронъёссэс туж шумпотыса пумитаз. Одно ик юрттомы, шуиз, лэсьтомы
Флюра Чибышева, Удмуртиысь Камсьӧр удмуртъёслэн йӧскалык центренызы кивалтӥсь

Флюра Чибышевалэн кылъёсызъя, Пермь шаерын удмуртъёс туж мыло-кыдоесь. Соослэн лулчеберетсы но зол утиське. Кылсярысь, Гондыр черкогуртын ик нылпи садын котькуд группаын пиналъёслэн пичильтык удмурт ансамбльёссы, удмурт дӥсьёссы вань. Соос пичи дырысенызы ик удмурт кырӟанъёсты, эктонъёсты тодыса будо.

Соослэн киземын ини кизёнзы — удмуртлыксы. Садик аресысен. Уж борды анай-атайёссы шумпотыса басьтӥськизы. Соос адӟо, пиналъёссы рос-прос удмурт кылын верасько шуыса. Пиналзы кытчы ке уг ке сюры, соос кӧтсэс ӝож карыны кутско табере, малы мынамез отчы уг пыриськы шуыса. Вожмаськон но кылдӥз ини
Флюра Чибышева, Удмуртиысь Камсьӧр удмуртъёслэн йӧскалык центренызы кивалтӥсь

Ужамзэс адӟыса, ёрос кивалтӥсьёс но соос понна дурбасьто, ӵектонъёссэс, куронъёссэс лыдэ басьто, пусйиз Камсьӧр удмуртъёслэн йӧскалык центрзылэн кивалтӥсез.

Тӧрозылэн удмуртъёс вылэ бадӟым осконэз, со удмуртъёсты туж ушъяса вера
Флюра Чибышева, Удмуртиысь Камсьӧр удмуртъёслэн йӧскалык центренызы кивалтӥсь

Соин ик туризмъя но лулчеберетъя йӧскалык центр кылдытыны малпанзэс но ёрос тӧрозы шумпотыса пумитаз. Со понна Пермь шаерысь мукет ёросъёсысь лыктэм удмуртъёс но дурбасьтӥзы, шумпотэмзэс кизэс чабыса ик веразы. Асьсэос но пиналъёсынызы, калыкенызы гинэ но туристъёслы удмурт лулчеберетэз, сям-йылолъёсты,

Читать полностью

Ижысь Шор площадьын йӧ карлэн вань пуктӥськемъёсыз «12 месяцев» выжыкыллы сӥземын луозы. Валтӥсез зэмос выль ар тылскемен но агай-вынъёслэн-толэзьёслэн скульптураосынызы «Выжыкылысь выль ар нюлэс» лабиринт луоз. Со сярысь кар администрацилэн пресс-службаез ивортӥз. 

Котькудӥзылы аслаз вордскем толэзез вадьсын туспуктэм лэсьтыны но соосты мерлыко вотэсъёсы хештегъёсын поттыны ӵектӥськом. Кылсярысь, #ямарт, #яфевраль. Карын улӥсьёс пӧлын тужгес вӧлмем толэзез кузьым возьма
Евгения Сундукова, «Центр активных коммуникаций» ужъюртлэн кивалтӥсез

Йӧ карез «Королевалэн часъёсын замокез» усьтоз. Мукетъёсыз объектъёс, арлэсь вакытъёссэс возьматыса, шунды мынэмъя пуктэмын луозы.

Шор площадьын выль ар кар лэсьтыны йӧэз дасяны 5-6 толсуре кутскозы. Бадӟым гуръёсты, пиналъёслы кык пало гурезьёсты, Дед Морозлэсь но Снегурочкалэсь кабъёссэс, лабиринтэз, йӧ ӵашаосты 31-тӥ толсурозь пуктыны кулэ. Кылем арын сямен ик нимысьтыз йӧ гурезь тазалыксыя сюбегатэм луонлыкъёсын пиналъёслы пуктозы.

Тодэ вайытом, Шор площадьын карлэсь валтӥсь Выль ар кыззэ пуктыны кутскизы ни. Выль ар тылъёсты 1-тӥ толсуре ӝуатозы

8-тӥ толсуре «Лэсьтэмын Удмуртиын» («Сделано в Удмуртии») форумын 2022-тӥ арлы ужрад туризмъя дырпусэн онлайн-тодматон ортчоз. Отчы 12 валтӥсь ужрадъёс пырозы – арлэн котькуд вакытэзлы быдэн куинь. Со сярысь улосвыл тӧролэн но кивалтэтлэн пресс-службазы ивортӥз.

Дырпусэз кылдытонлэн валтӥсь ужпумез – пуш но лыктон туризмез азинтон, Удмуртиын ортчись ужрадъёс сярысь тросгес веран. Вуоно арын элькунын тросэзлы тодмо ужрадъёс – Искусствоосъя «П. И. Чайковскийлэн вордскем шаераз» фестиваль (0+), «Пельняньлэн дунневыл нуналэз» фестиваль (0+), озьы ик выльёсыз радъяськозы. Ваньмыз соос isit Udmurtia порталын но ӵектослэн мерлыко вотэсъёсысь огинъёсаз шараямын луозы.

Тодматон ужрадэ 500-лэсь трос адями пыриськоз шуыса чаклало. Со пӧлын Росси улосвылъёсын туризмен вырисьёс, федерал экспертъёс, тӧрлык ёзэсъёслэн ыстэм муртъёссы, туроператоръёс.

Ватсалом, «Лэсьтэмын Удмуртиын» ужбергатон форум 6-10 толсуре онлайн амалэн ортчоз. Валтӥсез тема – «Тренды, которые объединяют мир». 

Грак черкогуртысь «Лидер» лулчеберет юртын «Культура» йӧскалык ӵектос улсын 3D кинозал усьтӥзы. Табере Гракын но бускель гуртъёсын улӥсьёс Россиын но кунгож сьӧрын потӥсь выль киноосты, мультфильмъёсмы кыдёке ветлытэк учкыны быгатозы.Со сярысь элькунысь лулчеберетъя министр Владимир Соловьёв «ВКонтакте» мерлыко вотэсысь бамаз ивортӥз.

Кинозалэз выльдыны 5 миллион манет висъязы. Коньдонэн 3D фильмъёсты возьматыны луонлыкен проектор, экран, куара тӥрлык, контрольно-кассовой тӥрлык но учкисьёслы 100 пуконъёс басьтӥзы
Владимир Соловьёв, Удмуртиысь лулчеберетъя министр

Пусъём, Удмуртия кинозалъёсты выльдонъя программае 2015-тӥ арысен пыриське. Грак ёросысь культура юрт элькунамы 13-ез луиз, кытын вылӥ ӟечлыко фильмъёсты возьматъялозы. Матысь дыре, толсуре, сыӵе кинозал Якшур-Бӧдьяысь ивортодэтъя но лулчеберетъя центрын но усьтӥськоз. 

Тодэ вайытом, «Айкай» театр Короленко нимо театрлэн азьвыл юртаз концертъёс ортчытъялоз


5-тӥ толсуре 15 часын Ижкарын Калыкъёслэн эшъяськон юртазы Удмуртиысь лулчеберетъя йӧскалык огазеяськонъёслэн Эшъяськон ӝытсы ортчоз. Отчы элькунысь огазеяськонъёсысь азьветлӥсьёсты но творчествоя коллективъёсты ӧтё. Со сярысь элькунысь йӧскалык политикая министерстволэн пресс-службаез ивортӥз.

Ужрадэ пыриськисьёс ас огазеяськонэнызы кивалтӥсьсылэсь, азьветлӥсьёссылэсь ӟечкыланзэс дасяны но йӧскалык дӥсьёсын чеберлыко номер быдэстыны кулэ. Возьматонзы оглом 10 минутозь луыны быгатэ.

Эшъяськон ӝыт Удмуртиын улӥсь поръёслэн «Одо Мари Ушем» мер огазеяськонзылэн «Исторические аспекты межкультурного многообразия Ижевска» ӵектосэз улсын ортчоз. 2021-тӥ арын ӵектос мер ужен вырись коммерци луисьтэм огазеяськонъёслэн но мер аскивалтонъя ӵектосъёссыя кар конкурсын вормиз.

Ужрад Россиын улӥсь калыкъёслэсь пӧртэмлыксэс, лулчеберетсэс утён но лулчеберетъя йӧскалык огазеяськонъёслэсь ужзэс кужмоятон понна радъяське.

Эшъяськон ӝытэ пыриськыны куриськонъёсты yamakov@inbox.ru электрон почтае кутозы. Ватсаса ивор басьтыны 8-950-829-82-22 телефон номеръя луэ («Одо Мари Ушем» огазеяськонлэн тӧроез Николай Иванович Ямаков) 

Тодэ вайытом, Глазкарысь пединститутын дышетскисьёс «Фольклорная карусель» ужрадзы улсын пӧртэм сям-йылолъёсты возьматӥзы.

Удмурт йӧскалык театрысь артист Максим Григорьев Москваын Никита Михалковлэн театраз пуктэм «Дядя Ваня» спектакльын валтӥсь воргорон ролез шудоз. Ивортодэтъя «Удмуртия» агентстволэн корреспондентэз артистлэсь со сярысь пыр-почгес юалляськиз.

Максим Григорьев 2019-2020 дышетскон аре Никита Михалковлэн кинематографияя но театр искусствоя академияз актёрлэн мастерскояз тодон-валан люказ. Ӵапак соку ӵош дышетскись эшъёсыныз А. П. Чеховлэн «Дядя Ваня» пьесаезъя сыӵе ик нимо спектакль дасязы. Пуктӥсь режиссёрез Мария Шмаевич луиз,  чеберлыкъя кивалтӥсез — Анатолий Васильев.

Со милям киноакадемиын сыӵе дипломной ужмы вал. Кивалтӥсьёсмы сое учкизы но та «Дядя Ваняез» азинтом шуыса веразы. Мыным тон, пе, дядя Ваняез шудод шуизы. <…> Шудӥськом вал ваньмы, 13 адями, но быдэс группаысь милемыз куать адямиез гинэ бырйизы та спектакле
Максим Григорьев, Удмурт йӧскалык театрысь артист

Максим Григорьевлэн верамезъя, спектакль туэ толшоре дась вал. Чеберлыкъя кивалтӥсьсы Анатолий Васильев сое учкиз, умоен пусйиз. Кулэ на вал Никита Михалковлы возьматыны но калыклы возьматон дырез пусйыны. Но пандемиен но мукет учыръёсын сэрен, уж ӝегаз.

Но номыр шоры учкытэк, премьера луоз. Нырысетӥ возьматонъёс 8-10 толсуре Москваын Никита Михалков кивалтэм улсын ужась Театръя но киноя центрын ортчозы

Тодэ вайытом, Максим Григорьевез Никита Михалковлэн киноакадемияз дышетскыны 400-лэсь ятыр куриськисьёс пӧлысь бырйизы вал. Отын тодон-валан люкаса Удмуртие берытскемез бере, артист йӧскалык театрын Виктор Астафьевлэн романэзлэн люкетэзъя «Чёртова яма» моноспектакльзэ возьматӥз ини. Бӧрысь соин моноспектакльёсъя Solo калыккуспо театр фестивале пыриськиз. Нош али Максим Григорьев ужъюлтошъёсыныз ӵош удмурт кылын кинокомедия лэсьтыны дасяське

2022-тӥ арын Удмуртиын «Гербер» улосвылкуспо йӧскалык шулдыръяськонлэн валтӥсь темаез веме луоз. Шулдыръяськон 18-тӥ инвожое Пичи Пурга ёросын ортчоз. Со сярысь «Удмурт Кенеш» огазеяськонлэн исполкомезлэн пумиськоназ Калыкъёслэн эшъяськон юртсылэн кивалтӥсезлэн воштӥсез Татьяна Фёдорова вераз.

Солэн кылъёсызъя, али ужрадлэсь учкетсэ (концепция) дасяло, площадкаосты радъян сярысь малпасько.

Озьы ик ортчытон интыя пумысен пумкылъян кутэмын. Ми вуылӥмы ӵектэм интыосы, кушъёсы. Гербер Кечур гурт вӧзысь возьвылын ортчоз шуыса вераськимы. Возь туж бадӟым, чебер
Татьяна Фёдорова, Удмуртиысь Калыкъёслэн эшъяськон юртсылэн кивалтӥсезлэн воштӥсез

Тодэ вайытом, Герберез радъясь комитетлэн нырысетӥ пумиськонэз 17-тӥ шуркынмонэ ортчиз

Глазкарысь дышетӥсьёсты дасясь В. Г. Короленко нимо кун институтысь историяя но лингвистикая факультетын витетӥ курсын дышетскись Ксения Богданова «Мисс студенчества Финно-Угрии» калыккуспо вожвылъяськонэ пыриськоз. Ужрад Ханты-Мансийскын 7-11 толсуре ортчоз. Со сярысь Глазкарысь дышетсконнилэн «ВКонтакте» мерлыко вотэсысь огиназ ивортӥзы.

Ксения Богданова Дэбес черкогуртын вордӥськиз. Глазкарын англи но удмурт кылъёсъя дышетӥсьлы дышетске. Нылмурт котькытчы вутскыны тырше, огъяросси но, калыккуспо но ужрадъёсы вуылэ. Пичи дырысеныз хореографиен выре. Институтысь «Ромашка» центрысь калык эктонъя студие ветлэ. Нош 2020-тӥ арысен «Чайка» эктонъя коллективен кивалтэ.

Али Ксения командаеныз вожвылъяськонлы дасяське. Ваньзэ, мае быгатэ, марлы дышетскиз, возьматыны тыршоз шуыса пусъе.

Конкурслэн люкетъёсыз пӧртэмесь, котькудаз тужгес усто быгатонлыкъёсмес возьматыны кулэ. Мон эктонъёсын вырисько бере, творческой люкетаз ӵапак со жанрын ик асме возьматыны ӧдъясько, со мон понна тужгес тунсыкоез но сюлмаськытӥсез луэ. <…> Дасяськыкум пӧртэм ӧнерчиос, эшъёсы, ӵыжы-выжыосы доры вазиськоно луисько. Соослэн усьтэм сюлэмо, юрттыны дась луэмзы мыным мылкыд сёто
Ксения Богданова, Глазкарысь пединститутын дышетскись

Пусъём, туэ «Мисс студенчества Финно-Угрии» вожвылъяськон «Вековые традиции – креативные горизонты!» темалы сӥземын луоз. Со кӧня ке люкетъёсын ортчоз: пресс-конференция, «Ремёсла финно-угорских народов: творим с креативом» мастер-класс, «ЭтноОбъектив: взор прошлого – взгляд в будущее» конкурс, «Путешестую по Финно-Угрии!» видеоконкурс, устолыкъя «Красота народа – во всём!» конкурс но йылпумъясь дефиле. 

Туэ Ксения Богданова Удмуртилэн Кун Кенешезлэсь нимъем премиоссэ басьтӥсь 20 студентъёс пӧлы пыриз

Тодэ вайытом, 2020-тӥ арын «Мисс студенчества Финно-Угрии» вожвылъяськон Удмуртиын луыны кулэ вал, но коронавирусъя югдур умойтэмен сэрен конкурсэз ӧз ортчытэ. 

18-19 толсуре Пичи Пургаын ӵужонболъя улосвылкуспо чемпионат ортчытозы. Со сярысь ивортодэтъя «Удмуртия» агентстволэн корреспондентэзлы Пичи Пурга ёрос лыдӟетъюртысь ёзэтэн кивалтӥсь, «Ӵужонбол для всех» ӵектослэн одӥгез авторез Людмила Шумилова вераз.

Пичи Пурга ёросын ӵужонболэн 2018-тӥ арысен шудо. Отын ик со кылдӥз но шуыны луоз. Ӵужонбол – командаен шудон, аспӧртэм квиддич, тупен хоккей, кытын клюшка интые ӵужон кутӥське.

Ми соин Ымусьтон вакытэ шудыны кутским, куке удмуртъёс пӧртмаськыса ветло. Озьы, кӧня ке пӧртмаськон, шулдыр шудон но со луиз милям. Нош 2019-тӥ арын нырысьсэ ёрос инлыкен чемпионат шуыса ортчытӥм ини
Людмила Шумилова, «Ӵужонбол для всех» ӵектослэн одӥгез авторез

Шудон ёросын ӝог вӧлмиз. Пумен мукет ёросъёсын но соин тунсыкъяськыны кутскизы. Людмила Шумиловалэн кылъёсызъя, та дыре ӵужонболэн элькунысьтымы ӧжытэзтэк вань ёросъёсын шудо ини.

Туэ ёрос лыдӟетъюртлэн «Ӵужонбол для всех» ӵектосэз Владимир Потанинлэн ӟечлэсьтон фондысьтыз 500 сюрс манет тыр грант утӥз. Солы луыса пургаос нырысьсэ ӵужонбонъя улосвылкуспо инлыкен чемпионат ортчыто. Отчы, элькунысь командаосты сяна, Татарстанысь Огырчи ёросысь но командаез возьмало. Соос борды мукет мылкыд карисьёс но итӥськыны быгато.

Куриськонъёсты 16-тӥ толсурозь кутозы ай. Ӵошатсконлэн куронъёсыныз пыр-почгес тодматскыны чӧлсконпусъя луэ.

Пусъём, ӵектос улсын мукет ужрадъёс но ортчозы. Кылсярысь, вуоно арын Пичи Пурга ёросысь пиналъёс понна «Пичи ӵужонбол» чемпионат но мукет ужрадъёс радъялозы.

Ӵектосмы быдэс арлы гожъямын. Чемпионат сяна, висказ товарищеской матчъёс луозы на, «Пельменной ӵужонбол», «Гурт возёс ӵужонбол» ортчытӥм ини. Озьы ик пӧртэм конкурсъёс луозы: ӵужонбол сярысь такмакъёсъя, суредъёсъя конкурсъёс но мукет
Людмила Шумилова, «Ӵужонбол для всех» ӵектослэн одӥгез авторез

Тодэ вайытом, Удмуртиын вуоно арын ортчоно Спортъя элькун тол гурт шудонъёслэн талисманэз Камушка луоз

Удмуртиын сяме пырем «Будӥсь писательлэн ӝӧк сьӧраз» литературая IX элькун конкурсэз (6+) ялӥзы. Со сярысь Г. Д. Красильниковлэн музей-квартираезлэн «ВКонтакте» мерлыко вотэсысь бамаз ивортӥзы.

Вожвылъяськонэ пыриськисьёсты арлыдъя ньыль категорияя учкозы:

  • 1-4 классъёсын дышетскисьёс;
  • 5-7 классъёсын дышетскисьёс;
  • 8-11 классъёсын дышетскисьёс;
  • вылӥ но ӧнеръя дышетсконниосын тодон-валан люкасьёс но мӧйыос.

Удмурт но ӟуч кылын ужъёсты кык номинацияя эскерозы: «Чурысь чуре ми проза кылдытом» (проза) но «Паймымон кылбурет дунне» (кылбурет).

Ужъёс пӧртэм жанръем луыны быгато. Быдӟалазы 14 кеглен бичаса, куинь А4 бамлэсь трос медаз луы. Ужъёсты «На конкурс» шуыса пусйыса krasmuzey@mail.ru электрон почтае келяно. Соосты туэ 1-тӥ толсурысен 2022-тӥ арын 31-тӥ толшорозь кутозы. Котькуд пыриськисьлэсь котькуд номинациын быдэн одӥг ужзэ гинэ учкозы. Вормисьёсты вуоно арын 26-тӥ оштолэзе пусъёзы. Пыр-почгес чӧлсконпусъя.

Тодэ вайытом, кылем арын конкурсэ 89 адями пыриськиз вал. 

Удмуртиын кунгож сьӧрын улӥсьёслы шаермылэн кыл, лулчеберет, вӧсьлык аспӧртэмлыкъёсыныз тодматскыны «Добро пожаловать в Удмуртию» видеороликъёс поттозы. Со сярысь Калыкъёслэн эшъяськон юртсылэн пресс-службаез ивортӥз.

Роликъёсты кылдытон бордын «Куара» огазеяськонысь егитъёс но лулчеберетъя йӧскалык огазеяськонъёслэн ёзчиоссы тыршозы. Уж борды кутскизы ини.

Куинь минут котыр кыстӥськись видеороликъёсын шаерамы улӥсь пӧртэм калыкъёслэн сямъёссы но улон-вылонзы сярысь вералозы; Удмуртилэн интывылаз улонлэн аспӧртэмлыкъёсын тодматозы; элькунлэсь вӧсьбур картазэ возьматозы; мер интыосын астэ возён эсэпъёс сярысь мадёзы но валэктозы, кытчы уже интыяськон, дышетскон но шутэтскон сярысь юанъёсын вазиськоно. Озьы ик роликъёсы туспуктэмъёс, текст, инфографика но мукетсэ ватсалозы.

Соосты интернетысь пӧртэм площадкаосы поттозы. Учкыны вань мылкыд карисьёс быгатозы

Видеороликъёсын сётэм вань ивортодэт англи кылын субтитръёсын но мыноз. Дась ужъёсын туэ толсуре тодматыны чаклало ини.

Пусъём, ӵектос Удмуртиысь йӧскалык политикая министерстволэн юрттэмез улсын лэсьтӥське. 

Тодэ вайытом, Ижкарысь студентка калыкез удмурт кылэн, лулчеберетэн но учкымон интыосын тодматон ӵектоссэ улонэ пыӵатоз.


Глазкарысь дышетӥсьёсты дасясь В. Г. Короленко нимо институтын арлы быдэ радъяськись «Фольклорная карусель» ужрадын историяя но лингвистикая факультетысь удмурт кылъя но англи кылъя ӧрысь кыкетӥ курсысь студентъёс элькунлэн пӧртэм ёросъёсысьтыз сям-йылолъёсты возьматӥзы. Озьы егитъёс фольклоръя гужем практиказылы йылпумъянъёс лэсьтӥзы. Со сярысь ивортодэтъя «Удмуртия» агентстволэн корреспондентэзлы Тодосъя но дышетонъя «Кылӧс» финн-угор центрлэн кивалтӥсез Ольга Никифорова вераз.

Интерактивной формаен возьматӥськомы. «Фольклорная карусель» бере, со берга шуиськомы. Но милям туала амалэн со бергаз. Машина мынӥз Кез ёросысь Дэбес ёросэ, собере Глаз ёросэ, Эгра пала кошкиз, Можгаысь одӥг нылашмы вал, Можга пала вуимы
Ольга Никифорова, Тодосъя но дышетонъя «Кылӧс» финн-угор центрлэн кивалтӥсез

Озьы, егитъёс ас факультетысьтызы ик мукет студентъёсты – историкъёсты, географъёсты но мукетъёссэ – люкам материалэнызы тодматӥзы.

Нылъёс тужгес тунсыко материалъёссэс, кызьы асьсэлы потэ, возьмато. Тани Кез ёросысь студенткамы 83 аресъем пересьлэсь «Ватон гур» кырӟанзэ гожтыса вайиз. Туж тунсыко кылзыны вал сое
Ольга Никифорова, Тодосъя но дышетонъя «Кылӧс» финн-угор центрлэн кивалтӥсез

Мукетъёсыз бигер сюанэн, мадиськонъёсын, ишанъёсын но тунаськонэн тодматӥзы.

Егитъёслы туж кельшиз тунаськон. Озьы йырамы малпан кылдӥз, тунаськонлы быдэс ужрад но сӥзьыны. Туж куризы, мукет факультетысь но студентъёс, удмурт кылын тунаськон ортчытыны
Ольга Никифорова, Тодосъя но дышетонъя «Кылӧс» финн-угор центрлэн кивалтӥсез

Ольга Никифоровалэн кылъёсызъя, таӵе ужрад факультетазы ог 5-6 ар ортчытъяло ини. Котькуд пумиськонзэс выль сямен, тунсыкогес карыны тыршо. Кылсярысь, черсыса, керттӥськыса, пужыятскыса пукон ӝытъёссы вал. Нош туэ караоке радъязы – удмурт кырӟанъёсты кырӟазы. 

Тодэ вайытом, Удмуртиын нырысьсэ вылӥ но шор ёзо ӧнер дышетсконниосысь студентъёс понна «ЭТНОэксперт» визьбур шудон ортчытозы. Нош эшшо элькунамы улӥсьёс калык лулчеберетэз возьматӥсь туспуктэмъёсъя «Самобытная Россия» вожвылъяськонэ пыриськыны быгато.

Удмуртиысь 48 лулчеберет ужъюртъёс 14-22 аресъем егитъёслы музейёсы, театръёсы, галереяосы, филармониосы но мукет лулчеберет ужъюртъёсы ветлыны кылдытэм «Пушкинская карта» федерал программа борды итӥськизы. Со сярысь элькун тӧролэн но кивалтэтлэн пресс-службазы ивортӥз.

Пӧлазы куинь частной, 13 кун но 32 муниципал ужъюртъёс

Соос пушкын Дэбес черкогуртысь Сибыр трактлэн историезлы сӥзем музей но Эгра ёросысь Бачкей гуртысь «Этапный пункт» музей. Берпуметӥез 2000-тӥ арын Сибыр трактын интыяськем азьвыл этапной пунктын усьтэмын. Юртэз 1877-тӥ арын матысь гуртъёсысь рекрутъёс пуктӥзы. Со дырысен сое одӥг пол но рос-прос ӧз тупатъялэ, нош утьыны 1900-тӥ арын кык классъем земской училище усьтэмзылы луыса быгатӥзы. Туннэ нуналлы музей «Сибирский тракт – дорога сквозь века» экскурсионно-туристической маршрутлэн люкетэз луэ.

Со но мукет лулчеберет ужъюртъёсы ветлыны «Пушкинской карта» басьтон понна «Госуслуги» порталын регистрация ортчоно но учётной записез юнматоно; смартфонэ «Госуслуги. Культура» ватсэт пуктоно; тыриськонъя «Мир» сӧзнэтлэсь виртуальной картазэ кылдытоно яке картаез «Почта банк» ёзэтъёсысь басьтыны луэ.

2022-тӥ арын 1-тӥ толшорысен картаосы 5 сюрс манет ватсалозы. Нош туэ понэмез коньдон «ӝуалоз»

Пусъём, туннэ нуналлы Удмуртиын «Пушкинская карта» программае пыриськисьёс пӧлын азьветлӥсь Драмая ӟуч театр луэ. Отысь спектакльёсы картаосъя 2 сюрс 300-лэсь ятыр билетъёс вузазы ни. Озьы ик азьпал радын Йӧскалык театр но П. И. Чайковский нимо операя но балетъя театр мыно.

Музейёс пӧлын нырысетӥ интыын М. Т. Калашников нимо ыбылӥськон пыӵал тӥрлыкъя музей огъет луэ. Та дырлы отчы 339 билетъёс басьтӥзы ни.

Муниципал ужъюртъёс пӧлын ӵектосэ «Молодой человек» театр умой пыриське. Соос егитъёслы куать спектакльёссэс, куинь театр программаоссэс возьматыны но профориентационной экскурсия ортчытыны дасясько.

Тодэ вайытом, «Пушкинская карта» федерал программа Россиын 2021-тӥ арын 1-тӥ куарусёнэ ужзэ мытӥз. Со улсын 14-22

Читать полностью

Удмуртиын нырысьсэ вылӥ но шор ёзо ӧнер дышетсконниосысь студентъёс понна «ЭТНОэксперт» визьбур шудон ортчытозы. Викторина 4-тӥ толсуре Zoom платформаын онлайн амалэн мыноз. Со сярысь Калыкъёслэн эшъяськон юртсылэн пресс-службаез ивортӥз.

Турнире 4-6 адямиен командаос пыриськыны быгато. Со понна 1-тӥ толсурозь чӧлсконпусъя регистрациез ортчоно. Шудонэ нырысетӥосыз пӧлын куриськон сётэм 20 командаосты кутозы. Ӧтён-чӧлскон командаослэн капитанъёссылэн чатазы шудон кутскемлэсь 15 минутлы азьвыл вуоз. 

Шудон кыллы но йӧскалык сямъёслы сӥземын луоз. Заданиосты 10 темаосъя огазеялозы но «Своя игра» шудон амалэн сётозы. Йылпумъянъёсъя нырысетӥ куинь интыосты басьтэм командаосты пусъёзы. 

Тодэ вайытом, Удмуртиысь дышетскисьёс Удмурт кыллэсь нуналзэ пусъён улсын ӝӧквыл шудонъёсын шудозы.



Удмуртиысь студентка Вероника Карачёва Ижкарын калыкез удмурт кылэн но лулчеберетэн, учкымон интыосын тодматон понна «Познай Удмуртию» ӵектос гожтӥз. Кемалась ик ӧвӧл ужез Егитъёсын ужанъя федерал агентстволэн (Росмолодёжь) вожвылъяськоназ вормисьёс пӧлы пыриз. Ӵектосэзлэн пуштросэз сярысь нылаш ивортодэтъя «Удмуртия» агентстволэн корреспондентэзлы вераз.

Вероника Карачёва вордӥськиз но будӥз Ижкарын. Али Удмурт кун университет бордысь колледжын рекламая ӧнерчилы дышетске, Удмуртилэн лулчеберетэныз тунсыкъяське. Туризмен герӟаськем ӵектос гожтыны малпанэз ог ар но ӝыны талэсь азьлогес кылдӥз шуыса пусъе.

Мон театр студие ветлӥ, отын крезьгуръя коллектив вал. Ми театрын но шудӥм, удмурт кырӟанъёсты но кырӟам. Кырӟанъёсты дышетӥськом вал, но эшшо милемлы юромо ӟуч кылын транскрипция дасяло вал. Озьы мон валай, сыӵе шугъяськон вань шуыса, карын улӥсьёс удмурт кылэз уг тодо шуыса. Но югдурез тупатыны кулэ, со асьмелэн лулчеберетмы
Вероника Карачёва, «Познай Удмуртию» ӵектослэн авторез

Ӵапак со понна Вероника Ижкарысь 10 тужгес учкымон интыос доры ивортодэт сётӥсь стендъёс пуктыны малпаз. Пусйымон интыосын тодматэм сяна, куд-огез соос улосвылмы, лулчеберетмы сярысь вералозы. Стендъёс интерактивной луозы. 

Отын Зарни нимо маскот луоз, ӵектосмылэн персонажез. Со стенд доры лыктӥсьёсты пумиталоз. Озьы ик отчы мерлыко вотэсъёсы но аудиогид вылэ потон понна QR-кодъёс интыяськозы. Со инты, удмурт лулчеберетмы сярысь пичияк верамын луоз. Куд-огъёсаз улосвылмы, кӧня каръёсмы но мукетыз сярысь ивортодэт луоз. Озьы ик удмурт кылэн но тодматскыны луоз. Со понна удмурт кылъёсын кнопкаос луозы, кудъёсыз вылэ зӥбыса, соос удмурт но ӟуч кылын чузъяськозы
Вероника Карачёва, «Познай Удмуртию» ӵектослэн авторез

Пусъём, ачиз Вероника удмурт кылэз уг тоды. Соин ик стендъёсысь удмурт кылъёсты дасяны Удмурт кун университетысь Удмурт кылосбуръя, финно-угроведениея но журналистикая институтысь ӧнерчиос юрттозы шуыса оске. Нош ачиз азьланяз удмурт кылъя курсъёсы ветлыны дасяське.

Вероника Карачёвалэн малпамезъя, пӧртэм юртъёс но синпелетъёс бордысь стендъёслэсь Ижкарлэн шор люкетаз аспӧртэм кульчо кылдоз. Тунсыкъяськисьёс Кузебай Герд нимо йӧскалык музей дорысен тымет пала васькозы но котырскыса М. Т. Калашников нимо музей огъет доры вуозы. 

Оглом ӵектос улсын укмыс пӧртэм ужрадъёс ортчыны кулэ. Нырысетӥез соос пӧлысь туэ толсуре луоз ини. Берпуметӥез – 2022-тӥ арын шуркынмонэ. Нош стендъёсты вуоно арын ик куартолэзе-инвожое усьтыны чакламын.

Ужрадъёсы пӧртэм арлыдъем адямиос пыриськозы: студентъёс бордысен кутскыса, мӧйыос дорозь. Фестиваль луоз. <…> Со маршрутэн герӟаськемын луоз. Ижкар уйпал амалэн ветлонъя одӥгез шоркар луэ ук. Соин ик милям фестивалямы солы тӥрлык сётӥськоз но, озьы вань мылкыд карисьёс маршрутмыя ортчозы. Экскурсовод кармы сярысь вералоз
Вероника Карачёва, «Познай Удмуртию» ӵектослэн авторез

Вероникалэн кылъёсызъя, Ижкарын маршрут кылдытэмез бере, элькунысь но учкымон интыосъя сыӵе ик стендъёс пуктылыны мылкыдыз вань, озьы ик соос Удмуртилэн инкуазь чеберлыкез сярысь вералозы. Стендъёсын ивортэмын луоз, кӧня иськем со интыос дорозь, кызьы, кыӵе транспортэн отчы вуоно. 

Тодэ вайытом, Вероника Карачёва ӵектоссэ улонэ пыӵатыны 800 сюрс

Читать полностью

17-тӥ шуркынмонэ Пичи Пургаын «Гербер» удмурт йӧскалык шулдыръяськонэз радъясь комитетлэн нырысетӥ пумиськонэз ортчиз. 2022-тӥ арын элькун праздник ӵапак Пичи Пурга ёросын ортчоз. Со сярысь Удмуртиысь йӧскалык политикая министерстволэн пресс-службаез ивортӥз.

Пумиськонэ элькунысь йӧскалык политикая министрлэсь ужъёссэ быдэсъясь Людмила Соковикова но министерствоын ужасьёс, Пичи Пурга ёрослэн тӧроез Сергей Юрин, «Удмурт Кенеш» огазеяськонлэн ёзчиосыз, Удмуртиысь Калыкъёслэн эшъяськон юртысьтызы ӧнерчиос но ёрос администрациын тыршисьёс люкаськылӥзы. Соос ужрадлэн пуштросэз сярысь но ортчон интыез пумысь кенешизы.

Вуоно арын Гербер 18-тӥ инвожое ортчоз шуыса чаклало

Тодэ вайытом, 2021-тӥ арын элькун шулдыръяськон 26-тӥ инвожое Вавож ёросын ортчиз. Праздниклэн валтӥсь темаез воршудъёс луизы. 

Наверх
Вниз