Ижкар+4 °C
19 -тӥ коньывуон 2021 Пуксён
18+

Можгаысь «Такъян» клубен но солэн кивалтӥсеныз тодматскизы Ижкарын «Табань-клублэн» пумиськоназ

  • 696
  • 0
Ижкар / Удмуртия
Можгаысь «Такъян» клубен но солэн кивалтӥсеныз тодматскизы Ижкарын «Табань-клублэн» пумиськоназ
Фото: Григорий Фомин

Можгаысь нылкышноослэн «Такъян» клубенызы но солэн кивалтӥсеныз тодматскизы «Табань-клублэн» пумиськоназ 6-тӥ оштолэзе Калыкъёслэн Эшъяськон юртазы. Туэ клублэн ужамезлы 20 ар тырмиз ини, ивортэ «Удмуртия» агентстволэн корреспондентэз. 

«Такъян» клублэсь 25-тӥ толшоре ми пусйимы 20 ар тырмон юбилейзэ. 1997-тӥ арын кыӵе ке но мылкыды луиз, удмурт нылкышноосты люкаме потыны кутскиз. Малызэ мон уг тодӥськы. <…> Мӧйы тодмоосын, «Удмурт кенешысь» нылкышноосын вераськыса, ойдолэ, шуисько, озьы люкай ке, лыктоды-а. Бон утча шуизы. Тӥни озьы нырысьсэ, 1997-тӥ арын 25-тӥ толшоре люкаським. Люкаським 17 кузя. Мон туж шумпотӥ сомында лыктӥзы шуыса», — тодаз вае клубез кылдытӥсь, Можгаысь «Удмурт нылкышно кенешлэн» тӧроез Татьяна Иванова.

Дун чылкыт Татианалэн нуналаз нырысьсэ пумиськемзы ик клубзылы ним но сётӥз. Отчы ветлӥсьёс пӧлын егитъёсыз но, мӧйыосыз но вань. Нош 20 ар талэсь азьло сюрес лёгемъёс пӧлысь одӥгез-кыкез гинэ вуыло на. Соку соослы ог 50 арес вал ке, али ог 70 ини, шуэ Татьяна Иванова.

«Такъянлэн» ёзчиосыз, гужем толэзьёсты лыдэ басьтытэк, толэзьлы огпол пумиськыло. Соос пӧртэм шуг-секытъёс, лулчеберет, семьязы сярысь верасько. Ӵем гинэ кинэн ке пумиськыло, кытчы ке потало.

Ми пумиськылӥськом психологен, нырысь ваньмы ӵош, собере кинлэн ке но нимысьтыз психологен пумиськемез потэ, соос асьсэ понна верасько <…> Культура сярысь но вераськиськомы, семья. Тазалык котыр ласянь, кышномурт аслаз тазалыкез, кузпалызлэн тазалыкез, нылпиосызлэн тазалыксы понна - ваньмыз понна со кылкутэ. Ӵем дыръя кытчы вазиськыны но ум тодӥське. Ми арлы быдэ кыӵе ке но эмчиен пумиськон ортчытӥськомы. Яке со нылпи эмчи, яке со нылкышно эмчи, яке со куэз эскерись эмчи, яке фельдшер, кудӥз вераны быгатэ давлениед дыръя мар кароно. Вот сыӵе пумиськонъёс туж кулэ шуыса мон малпасько
«Такъян» клублэн кивалтӥсез Татьяна Иванова

Улон-вылонъя ӵектонъёс сётыны быгатӥсь ӧнерчиосын сяна, нылкышноос творчество удысысь тодмо но тунсыко адямиосын пумиськонъёс радъяло, кылсярысь, кылбурчиосын Лидия Черноваен но Александр Белоноговен. Клубе ветлӥсь мыло-кыдо нылкышноос Можгаысь шаертодонъя музее вуылӥллям ини, Байтеряков нимо лыдӟетъюртэ, Алнаше но Ашальчи Окилэн музеяз, Бадӟым Сибые но Вера Толстаялэн музеяз.

20 ар ӵоже ик клублэн пумиськонъёсыз Можгаысь Трокай Борисов нимо педколледжын орчыло. Со понна туж тау каро дышетскон интылэн азьвыл кивалтӥсезлы Николай Пискуновлы но Григорий Владимировлы.

«Табань-клублэн» пумиськоназ

15 фото

ВАТСАН

«Табань-клуб» «Удмурт нылкышно кенеш» огазеяськонэн 2005-тӥ арын Ижкарын удмурт семья йылолъёсты утён понна кылдытэмын. 12 ар ӵоже ик ини соин кивалтэ но пумиськонъёсты нуэ «Удмурт нылкышно кенеш» огазеяськонлэн тӧроез Надежда Степанова. Пумиськонъёсы пӧртэм тодмо, азьветлӥсь адямиосты ӧтчало. Кылсярысь, вуылӥзы ини Удмуртиысь йӧскалык политикая министр Лариса Буранова, лулчеберетъя но туризмъя министр Владимир Соловьёв, Россилэн дано артисткаез, Удмуртилэн калык артисткаез Светлана Смагина но мукетъёсыз. Нош берло дыре ёросъёсысь тодмо адямиосты ӧтчаны тыршо. Пумиськонлэн героез ас улонэз, ужез, шуг-секытъёс шоры учконэз сярысь вераське, юанъёслы валэктонъёс сётэ. Пумиськонэ лыктӥсьёс одно ик сьӧразы пӧрам табаньзэс, пыжӥськемзэс куто. Озьы, клублэн азьветлӥсьёсыз табань пыжонъя 100-лэсь ятыр аспӧртэм рецептъёс люказы ини.


Наверх
Вниз