Ижкар-1 °C
26 -тӥ толшор 2021 Пуксён
18+

Демидов нимо биатлон огъетэз быдэсак выльдон ужпумез эскеризы Удмуртиын

  • 69
  • 0
Ижкар / Удмуртия
Демидов нимо биатлон огъетэз быдэсак выльдон ужпумез эскеризы Удмуртиын
Туспуктэм: Удмуртиысь тӧролэн но кивалтэтлэн пресс-службазы

28-тӥ толсуре Удмуртиысь тӧролэн но кивалтэтлэн администрацизылэн кивалтӥсез Сергей Смирнов Россиысь биатлонистъёслэн огазеяськонзылэн тороеныз Виктор Майгуровен пумиськылӥз. Соос улосвылын биатлонэз огкылысь азинтонъя тупанкыллэсь ӵектоссэ, ыбылӥськонъя но спортъя генерал-майор А. М. Демидов нимо огъетэз быдэсак выльдон ужпумез эскеризы. Со сярысь улосвыл тӧролэн но кивалтэтлэн пресс-службазы ивортӥз.

Биатлон огъетэз выльдонъя ужкагазъёсты дасяны 2021-тӥ арын кутскозы, нош тупатъян ужъёсты 2023-2024 аръёсы мытыны малпало.

Куасэн бызьылон спорт Удмуртиын котьку но паськыт вӧлмемын вал. Элькун биатлонъя дуннелэсь, Европалэсь но Россилэсь чемпионъёссэ будэтӥз. Со сяна, та спорт амалэн туж трос адями яратэ, соос трансляциосты учко но чемпионатъёсы висьыны ветло. Биатлонэз азинтонын бадӟым уж нуиське, кылсярысь, пинал спортсменъёсты дасянъя, пӧртэм ӵошатсконъёсты ортчытонъя
Сергей Смирнов, Удмуртиысь тӧролэн но кивалтэтлэн администрацизылэн кивалтӥсез

Озьы ик пумиськонын элькунэ бадӟым огъяросси ужрадъёсты кыскон но спортсменъёсты дасянын кунысь мукет улосвылъёсын кусыпъёс юнматон ужпумъёс сярысь кенешизы.

Пумиськонэ Удмуртиысь физкультурая, спортъя но егитъёсын ужан политикая министр Александр Варшавский но Кун Кенешысь физкультурая, спортъя но егитъёсын ужан политикая ялан ужась ӧрилэн кивалтӥсез Иван Черезов пыриськизы. 

Тодэ вайытом, 25-28 толсуре Ижкарын «Ижевская винтовка» ӵошатсконъёс ортчизы. Демидов нимо огъетын кужымзэс воргоронъёс но пиос мертазы. Удмуртилэн командаяз Дмитрий Шамаев, Александр Поварницын, Ильназ Мухамедзянов, Владимир Семаков, Максим Макаров но Александр Мяконький пыризы. Нырысетӥ нуналаз 20 иськеме нимаз бызёнын Дмитрий Шамаев азвесь медаль утӥз. Спринтын Ильназ Мухамедзянов витетӥ но Александр Поварницын куаетӥ луизы.




Наверх
Вниз