Ижкар+18 °C
9 -тӥ куартолэзь 2021 Воскресенье
18+

Ньыль выль школаосты усьтозы Удмуртиын 2021-тӥ арын

  • 585
  • 0
Ижкар / Удмуртия
Ньыль выль школаосты усьтозы Удмуртиын 2021-тӥ арын
Туспуктэм: Руслан Нуриахметов

2021-тӥ арын Удмуртиын ньыль школаосты пуктон ужъёсты йылпумъялозы. Со сярысь элькунысь дышетонъя но тодосъя министерстволэн пресс-службаез ивортӥз.

Кез каргуртын 500 интылы чаклам кема возьмам школаез пуктон йылаз-пумаз вуиз. 30-тӥ южтолэзе дышетсконниез уже кутӥзы. Сое 2018-тӥ арын пуктыны кутскизы. 8 сюрс квадрат метр пала быдӟалаем школаын дышетскон классъёс сяна, спортзал но актовой зал, кык библиотека – лыдӟиськон зал но ивортодэтъя центр, мастерскойёс, вуриськонъя но пӧраськонъя висъетъёс лэсьтӥзы.

Одӥгез школа Вавож ёросысь Кионгурт черкогуртын усьтӥськоз. Со 160 интылы чакламын. Туннэ нуналлы отын ужъёс йылаз-пумаз вуттэмын ини. Дышетсконниын черкогуртысь но кык матысь гуртъёсысь пиналъёс тодон-валан люкалозы. Выль школаын тазалыксыя ӧжыт быгатонлыкъем пиналъёслы луонлыкъёс кылдытэмын, туала интерактивной ужан тӥрлык пуктэмын. Нош 2022-тӥ арын «Точка роста» центр но усьтыны чаклало.

Эшшо одӥг корка пыронэз Ижкарысь Берш нимо урамын пусъёзы. Куинь этажъем школаын 1 сюрс 224 пиналъёс дышетскыны быгатозы. 

Ар пумозь Сьӧлтаысь покчи классъёслы школаез но вуттыны кулэ. Со 384 интылы чакламын. Пиналъёслы 16 висъетъёс дасялозы, со пӧлын кунсьӧр кылъя, крезьгуръя, технологияя но информатикая урокъёслы. Озьы ик школаын психологлы, логопедлы но дефектологлы висъетъёс лэсьтозы. Выль юртэз шор ёзо школаен шуныт выжонэн герӟалозы. 

Тодэ вайытом, 2021-тӥ арын Воткаын выль школа пуктыны кутскизы. 



Наверх
Вниз