Ижкар+1 °C
30 -тӥ шуркынмон 2021 Пуксён
18+

Удмуртиысь куинь лулчеберет юртъёсын тупатъян ужъёсты йылпумъязы

  • 349
  • 0
Можга / Удмуртия
Удмуртиысь куинь лулчеберет юртъёсын тупатъян ужъёсты йылпумъязы
Туспуктэм: Удмуртиысь тӧролэн но кивалтэтлэн пресс-службазы

Можгаын, Пичи Пурга но Можга ёросъёсын куинь лулчеберет юртъёсты тупатъязы. Ужъёсты «Покчи шаерлэн лулчеберетэз» федерал программая быдэстӥзы. Со сярысь улосвыл тӧролэн но кивалтэтлэн пресс-службазы ивортӥз.

Можга ёросысь Быдӟымсурд (Старый Березняк) гуртысь лулчеберет юртын тупатъян ужъёс кык ар мынӥзы. 2021-тӥ арын солы федерал, улосвыл но муниципал коньдэтъёсысь 1 миллион 500 сюрс манетлэсь трос уксё висъязы. Учкисьёслы залын тылэз но шуныт сётон сӧзнэтэз тупатъязы, борддоръёсты, вӧлдэтэз но выжез выльдӥзы, 150 пуконъёсты воштӥзы. Кылем арын липетэз, укноосты, пырон интыосты, ву кошкон гумыосты но ву виян сӧзнэтэз тупатъязы.

Лулчеберет юртын 10 клубъёс ужало, отчы 105 адями ветлэ. Таяз арын Быдӟымсуртын нырысьсэ турнан ужъёсты йылпумъянлы сӥзем «ТУРЫНфест» фестиваль ортчытӥзы. Оглом 100-лэсь трос ужрадъёс радъязы, со пӧлысь 30-эз – пиналъёс понна.

Озьы ик кык ар тупатъязы Пичи Пурга ёросысь Уча (Ильинское) черкогуртысь лулчеберет юртэз. Туэ 2 миллион 200 сюрс манет тыр шуныт сётон сӧзнэтэз выльдӥзы. 2020-тӥ арын липетсэ, ӧсъёсты, укноосты воштӥзы, пырон интыез тупатъязы. Торгъёсын шыръям коньдонэз сценаез но юртлэсь отмостказэ выльдыны малпало.

Лулчеберет юрт вить улон интыос понна ужа: Уча, Ыбдэс, Арлан, Сосновка но Чокал, кытын оглом 1 сюрс 700-лэсь трос адями улэ. Юртын 300 учкисьёслы зал, лыдӟиськонни, административной висъетъёс, кружокъёслы куинь висъетъёс, музей, костюмерной, гримёрной но хореографи висъетъёс. 17 клубъёсы 196 адями пыриське. Соос пӧлын нылпи садэ ветлӥсьёс, школаын дышетскисьёс, егитъёс, арлыдоос но пересьёс.

Можгаысь «Дубитель» культура юртын тупатъян ужъёс 2017-тӥ арысен мынӥзы. Отын акустика но тыл, пуконъёс басьтӥзы, пырон интыысь витражъёсты, шуныт сётон сӧзнэтэз но фойеысь, касса залысь но гардеробысь вӧлдэтэз воштӥзы.

«Культура» йӧскалык ӵектосъя кинозал усьтӥзы. Али висъетъёсты буязы, укноосты воштӥзы но витраж лэсьтӥзы

«Дубительын» арлы быдэ 200-лэсь трос ужрадъёс ортчытъяло, отчы 40 сюрслэсь трос адями пыриське. Лулчеберет юртын 24 кружокъёс но огазеяськонъёс ужало, отчы 564 адями ветлэ. Вить коллективъёс «калык» но «образцовой» ним нулло.

Ватсалом, 2021-тӥ арын «Покчи шаерлэн лулчеберетэз» парти ӵектосъя но «Культура» йӧскалык ӵектосъя 25 лулчеберет юртъёсты тупатъялозы. Грак но Дэбес ёросъёсын выль ужъюртъёс кылдозы. 



Наверх
Вниз