Ижкар-1 °C
22 -тӥ коньывуон 2020 Покчиарня
18+

Ижкарын Удмурт лулчеберетъя центрез пуктыны федерал коньдон басьтон пумысен кенешонъёс мыно

  • 420
  • 0
Ижкар / Удмуртия
Ижкарын Удмурт лулчеберетъя центрез пуктыны федерал коньдон басьтон пумысен кенешонъёс мыно
Туспуктэм: Полина Уразова

Ижкарын Короленко нимо театрлэн юртэз интые Удмурт лулчеберетъя центр пуктон понна Удмуртия федерал коньдэтысь юрттэт басьтыны оске. Со сярысь улосвыллэн тӧроез Александр Бречалов «Комсомольская правда - Ижевск» радиоын «Утро с главой Удмуртии» программаын вераз.

Ӵектос вань ни. <…> Мон (Россиысь – ред.) азьмуртлы куинь юанъёсын вазиськи, <…> соос пӧлын Удмурт лулчеберетъя центр. Али Лулчеберетъя министерствоен кенешиськомы инвестициосъя федерал программае пырон пумысен, Федерация милемлы коньдонэн мед юрттоз. Но озьы-а, тазьы-а, Удмурт лулчеберетъя центрез ми со интыын пуктомы
Александр Бречалов, Удмуртилэн тӧроез

Тодэ вайытом, нырысь ик юртэз быдэсак выльдыны чакламын вал, но берлогес выльзэ пуктыны дунтэмгес луоз шуыса кенешизы.

Сое быдэсак выльдыны, выльдонэз йылпумъяны малпамын вал, но эскеронъёс ортчытӥмы: сомында ик коньдон, нош со 400 миллион манетлэсь трос, кулэ выль юрт пуктыны
Александр Бречалов, Удмуртилэн тӧроез

Озьы ик улосвыллэн тӧрез ватсаз, юртлы ӵектосэз ӧнерчиос «Удмурт Кенеш» огазеяськонэн валче кылдытӥзы но выль юртлэн вылтусыз мукет луоз шуыса.

Тодэ вайытом, Ижкарын Удмурт лулчеберетъя центр кылдытонлэн кулэлыкез сярысь «Удмурт Кенешлэн» азьветлӥсьёсыз Александр Бречаловлы 2017-тӥ арын куартолэзе ортчем пумиськонын веразы. Инвожое ини солэн пуштросэз пумысен калыкен кенешон радъязы. 2018-тӥ арын южтолэзе Центрлы выль юрт пуктозы шуыса тодмо луиз. Соку ие улосвыллэн тӧроез пусйиз, Удмуртилэн кунлык басьтонэзлы 100 ар тырмонлы, 2020-тӥ арлы, Удмурт лулчеберетъя центр дась луоз.



Наверх
Вниз