Ижкар+22 °C
11 -тӥ пӧсьтолэзь 2020 Кӧснунал
16+

Ясли но школа пуктон ужъёс ӝегало Кезын

  • 255
  • 0
Кез / Удмуртия
Ясли но школа пуктон ужъёс ӝегало Кезын
Туспуктэм: Руслан Нуриахметов

Удмуртиысь кивалтэтлэн тӧроез Ярослав Семёнов Кезэ кык мер юртъёсты пуктонэз эскерыны вуылӥз – 80 интылы яслиез но 500 дышетскисьлы школаез. Кыкезъя ик дыраз вуттон ласянь сюлмаськонъёс вань, вераз элькунлэн премьер-министрез журналистъёслы.

Вань бадӟым сюлмаськонъёс. Пуктӥськись яслиез та арня пумозь липет улэ пыртозы. Собере куасьтон но пушсэ лэсьтон ужъёс кутскозы
Ярослав Семёнов, Удмуртиысь кивалтэтлэн тӧроез

Кезысь яслиез шуркынмон пумозь вуттыны кулэ вал, но куазен сэрен лэсьтӥськисьёслэн ужъёссы ӝегало.

Дыр ӧз кыльы ни. Ужъёсмы туж трос. Липет вуттымтэ на. Пуш ужъёс 25-30 процентлы дась. Куазь воксё ужаны уг сёты. Вань кужыммес сётыса ужалом, но ум вуттэ
Сергей Ястребов, Кезысь яслиын лэсьтӥськон ужъёсъя мастер

Кезысь школаез но, лэсьтӥськисьёс но материалъёс но тырмыт ке но, дыраз уз вуттэ, дыр. Нош сое каргуртын 20 ар возьмало ини. Школаез кылем арын ӝутыны кутскизы, но лэсьтӥськонэз ужкагазъёсты соглаштон но отчы воштонъёс пыртон понна дугдытӥзы. Юртэз 2019-тӥ ар пумозь вуттыны кулэ, но кылемын на липет лэсьтон но пуш ужъёс.

Вань ужъёсты ар пумозь йылпумъяны ужпум сылэ. Куазь зол шӧдӥськиз, но со подрядчиклэсь кылкутонзэ нокызьы уг капчияты. Огкылэз кинюртыкуз со валаз, мар борды кутске. Тодӥз, милям зоръёс но, кезьытъёс но вань шуыса
Ярослав Семёнов, Удмуртиысь кивалтэтлэн тӧроез

Юртъёсты пуктыны коньдон федерал но элькун коньдэтъёсысь висъязы. Яслиез Россилэн азьмуртэныз кичӧлтэм «Демография» йӧскалык ӵектосъя пуктозы, со 93 миллион манет тыр усёз. Школаез 262 миллион манетлы «Образование» кун программая лэсьтозы. Со сяна, арбериос басьтыны 89 миллион кошкоз на. Подрядчик вань уксёез уже кутыны но вылаз басьтэм ужез быдэстыны кулэ. Сотэк соос федерал коньдэтысь уксё сётон тупанкылэз тӥялозы.

Милям ӧвӧл луонлыкмы юртэз туэ вуттытэк кельтыны. Вань кужыммес сётом, ужасьёсмес йылэтом
Евгений Торганов, Кезын школаез лэсьтӥсь огазеяськонысь валтӥсь инженер

Матысь кык аръёсы Кезын эшшо одӥг ясли пуктыны чаклало

Озьы ик Ярослав Семёнов Кез ёрослэн тӧроеныз Иван Богдановен интыысь сюресъёсъя кенешон ортчытыны вуттӥз.

Туэ элькун коньдэт чотын Кез каргуртын 2 но ӝыны иськем асфальтэн шобыртэм сюресъёс тупатъямын. 15 миллион манет висъямын вал
Иван Богданов, Кез ёрослэн тӧроез

Со сяна, улосвыл программа улсын Кез – Кулига – Карсовай сюресэз рос-прос тупатъян ужъёс азьланьтӥсько.



Наверх
Вниз