Ижкар+19 °C
6 -тӥ пӧсьтолэзь 2020 Вордӥськон
16+

Азбаръёсты но мер интывылъёсты тупатъяны кутскизы Удмуртиын

  • 263
  • 0
Ижкар / Удмуртия
Азбаръёсты но мер интывылъёсты тупатъяны кутскизы Удмуртиын
Туспуктэм: Алексей Арзамасцев

Удмуртиын Россилэн азьмуртэныз Владимир Путинэн кичӧлтэм «Жильё и городская среда» йӧскалык ӵектос улсын азбаръёсты но мер интывылъёсты тупатъяны кутскизы. Со сярысь элькун тӧролэн но кивалтэтлэн пресс-службазы ивортэ.

2020-тӥ арын йӧскалык ӵектос улсын 154 азбаръёсты но 112 мер интывылъёсты умоятыны чаклало

Туннэ нуналлы подрядчикъёс Ижкарысь, Глазкарысь, Воткаысь, Сарапуысь но Пудем черкогуртысь 26 азбаръёсты тупатъяны кутскизы. Чур черкогуртын ужъёсты йылпумъязы ини.

Та дыре тужгес трос азбаръёсты Сарапулын умоято. Татын чаклам 12 азбаръёс пӧлысь ужъёс укмысаз мыно. Али калыклы но машинаослы ветлон сюресъёсты асфальтэн шобыртыны дасяло.

Сарапулын туэ йӧскалык ӵектосэ пыриськись тросаз коркаосын улӥсьёс асфальт кисьтонэн гинэ ужъёсты йылпумъяны пумит луизы, соос нылпиослы спортэн вырыны но шудыны площадкаос, поръяны, шутэтскыны, мӧйыослы но коляскаосын анайёслы пукыны интыос радъяны кариськизы. 2020-тӥ арын Сарапулысь азбаръёсты выльдыны висъям 18 миллион манет пӧлысь 3 миллион манетлэсь троссэ асьсэос корка кузёос люказы

Озьы ик Сарапулын Ленин паркез лэсьтонлэн кыкетӥ люкетэз кутскиз. Алнашын администрацилэн юртэз азьын Мемориал огъетын ужъёс мыно. Гольяныын, Кизнерын тротуаръёс лэсьтозы. Яганын кык интывылын ужъёс мыно – Заводской урамын нылпи площадкаын но парк вӧзысь Мемориал огъетын.

Карын ӟеч котырулос кылдытон – туж кулэ луись ӵектос, кудӥз калыклэн улон ӟечлыкез вылын шӧдӥське. Со асьмелэсь каръёсмес но ёросъёсмес, отын калыклы кыстӥськон инты кылдытыса, умойгес карыны юрттэ. Со интыос, кытчы лыктэм, дырез ортчытэм, вераськыса пукем потэ
Ярослав Семёнов, Удмуртиысь кивалтэтлэн тӧроез

Пусъём, йӧскалык ӵектос улсын умоятон ужъёслы туэ 570 миллион манет висъязы. 

Тодэ вайытом, азьвылгес Ижкар думаысь депутатъёс азьвыл чакламтэ сессиязы 2020-тӥ арлы «Формирование современной городской среды» муниципал программае воштонъёсты соглаштӥзы.



Наверх
Вниз