Ижкар+15 °C
2 -тӥ пӧсьтолэзь 2020 Покчиарня
16+

Ижкарысь Кузебай Герд нимо йӧскалык гимназиез тупатъяло Удмуртилэн кунлыкезлы 100 ар тырмонлы

  • 141
  • 0
Ижкар / Удмуртия
Ижкарысь Кузебай Герд нимо йӧскалык гимназиез тупатъяло Удмуртилэн кунлыкезлы 100 ар тырмонлы
Туспуктэм: udmurt.ru

Ижкарысь Кузебай Герд нимо йӧскалык гимназиын элькунмылэн кунлыкезлы 100 ар тырмон улсын тупатъян ужъёс мыно. Туннэ нуналлы актовой залэз лэсьтӥзы ини, азьланяз липетсэ выльдозы на, ивортэ элькун тӧролэн но кивалтэтлэн пресс-службазы.

Актовой залысь вуж пуконъёсты куштонэн сэрен выжзэ быдэсак выльдӥзы. Озьы ик сценазэ тупатъязы – паськытатӥзы, тубатъёссэ воштӥзы

Пусъём, гимназиын огъяросси но элькун вожвылъяськонъёслэн лауреатсы калык эктонъя «Чебеляй» студия ужа. Со понна сценалэсь выжзэ кема чидась ӧнерлыко материалэн шобыртӥзы. Со сяна актовой зал но пичи зал вискысь борддорез сэрттӥзы но тылпулэсь утись ӧс пуктӥзы. Табере артистъёс сцена вылэ пичи залысь потыны быгатозы, кытын дӥськутсэс воштыны но, буяськыны но луонлыкъёс вань. Озьы ик катанчиосты усьтон-ворсан электро сӧзнэт басьтӥзы. Ватсаса прожекторъёс пуктӥзы.

Ужъёслы луыса сцена вылэ потон кышкытлык вайись учыръёсы утиськыны ватсаса ӧс луиз. Озьы ик актовой залысь тылпу сярысь ивортӥсь датчикъёсты воштӥзы, сценаез тылпулэсь утись суретэн пазязы. Со сяна борддоръёссэ, вӧлдэтсэ, укнооссэ выльдӥзы. Куарая операторлы выль ужан инты лэсьтӥзы, акустикая тӥрлык басьтӥзы.

Липет бордын ужъёс кылем арын ик кутскизы вал ини. Ужасьёс актовой зал, спортэн вырыны бадӟым но пичи залъёс, лыдӟетъюрт, коридорлэн люкетэз вадьсысь липетэз лэсьтӥзы. Со интыосын со тужгес алама вал ини. Лымы шунан но зоръёс вакытэ вияса улӥз.

Туэ ужъёс тупатъятэк кылем алама интыосаз азинтӥськозы

Удмуртилэн кунлыкезлы 100 ар тырмон улсын тупатъян ужъёс дышетӥсьёсты дасянъя Можгаысь Трокай Борисов нимо колледжын но мынӥзы. Ужъюртысь вуж липетсэ сэрттӥзы, стропила сӧзнэтсэ, шобретсэ воштӥзы. Азьлоез интые профнастил вӧлдӥзы, ву кошкон гумыос, лымыез кутӥсь арбериос, сиг укноос, тылпулэсь утиськон люкъёс, чилектэмлэсь утиськонъёс пуктӥзы. Пулэсь конструкциоссэ тылпулэсь утись суретъёсын шобыртӥзы, липетсэ шуныт карись арбериосын шуккизы.

Чебер карон ужъёс Пётр Ильич Чайковскийлэн Воткаысь музей-юртаз но ортчизы. Отысь капкаоссэ но ужъюртлэсь вылтуссэ выльдӥзы.

Тодэ вайытом, матысь нуналъёсы Якшур-Бӧдья ёросысь Мукши школаез но рос-прос тупатъяны кутскизы



Наверх
Вниз