Ижкар+19 °C
6 -тӥ пӧсьтолэзь 2020 Вордӥськон
16+

Выль йӧ аренаос но стадионъёс усьтӥськозы 2020-тӥ арын Удмуртиын

  • 60
  • 0
Ижкар / Удмуртия
Выль йӧ аренаос но стадионъёс усьтӥськозы 2020-тӥ арын Удмуртиын
Туспуктэм: vk.com (Ярослав Семёнов)

2020-тӥ арын Удмуртиын кӧня ке выль спорт объектъёс усьтӥськозы. Элькун кивалтэтлэн тӧроез Ярослав Семёнов «ВКонтакте» мерлыко вотэсысь бамаз ивортӥз, кытын лэсьтӥськон ужъёс мыно.

Можгаын 450 учкисьёслы чаклам йӧ аренаез усьтыны дасясько. Отын педпалаз ву гумыосты кыскон, пушсэ чебер карон, йӧ бусыез висъян но спортзалъёсын выжъёсты лэсьтон ужъёсты йылпумъяло.

Эшшо одӥг каток Воткаын пукто. Сое «Демография» йӧскалык ӵектос улсын ӝуто. Отын трибунаос 410 учкисьёслы чакламын. Йӧ вылын огдыре 120 адями нискыланы быгатоз. Али юрт доры нуись сюресъёсты но тротуаръёсты тупато, липетэз но пырон интыосты лэсьтыса быдто.

Красногорскын туэ гужем элькун гурт шудонъёс ортчозы. Солы луыса черкогуртын физкультурая но тазалыкез юнматонъя огъет но стадион пукто. ФОК 100 учкисьёсты тэрытоз. Лэсьтӥськисьёс шуныт сётон сӧзнэтэз, липетэз, укноосты но вентиляциез лэсьтыны кулэ на. Стадионын футбол бусы, бызьылон сюресъёс, тэтчан инты, баскетбол площадка но шальы лэзьянъя инты луозы. Трибунаос 500 учкисьёслы чакламын.

Тодэ вайытом, озьы ик йӧскалык ӵектос улсын Ижкарысь Ухтомский нимо ульчаын ФОК, 17 но 35 номеро школаосын стадионъёс пуктыны кутскизы ни. Матысь дыре Гракысь школаын стадион лэсьтон борды басьтӥськозы. 

Озьы ик таяз арын Шарканысь стадионэз рос-прос тупатъялозы, Сьӧлтаын, Эграын но Кезын выль спортплощадкаос лэсьтозы.



Наверх
Вниз