Ижкар+1 °C
30 -тӥ шуркынмон 2021 Пуксён
18+

Дэри ёросысь Италмас черкогуртын Галина Кулакова нимо стадион пуктон ужъёсты йылпумъязы. Со сярысь элькун тӧролэн но кивалтэтлэн пресс-службазы ивортӥз.

Буш интыын футбол бусы но баскетбол площадка, кузьдалае тэтчан инты, бызьылон сюресъёс, тренажёръёсын площадка, 150 интылы липето трибуна, тӥрлыкез дасяны но куасъёсты возьыны вакс-кабина, кылиськон инты кылдӥзы

Стадионлэн интывылаз ветлон сюресъёсты гылӟисьтэм, чурыт материалэн шобыртӥзы, со сяна, пандусъёс пуктылӥзы. Азьланяз стадионын ёрос но элькун ӵошатсконъёсты ортчытъялозы.

Италмасысь шор ёзо школа борды дышетскисьёслы, черкогуртын но матысь гуртъёсын улӥсьёслы спорт объект лэсьтыны кичӧлтонэн ачиз ньыль пол олимпи чемпионка, дуннелэн вить пол чемпионкаез, СССР-лэн 39 пол чемпионкаез Галина Кулакова потӥз вал. Ужъёсты туэ гужем мытӥзы.

2021-тӥ арын Удмуртиын куать стадионъёс, ГТО куронъёсты сётыны куинь площадкаос но спортэн вырыны 10 интыос лэсьтӥзы, со сяна, школаосысь 25 спорт объектъёсты выльдӥзы. 

Тодэ вайытом, Гракын куасэн бызьылон сюресэз паськытатӥзы

Ижкарын Калык творчествоя элькун юртэз тупатъяны кутскизы. Ужъёсты нуыны элькун коньдэтысь 3 миллион манет висъязы. Со сярысь Удмуртиысь лулчеберетъя министр Владимир Соловьёв «ВКонтакте» мерлыко вотэсысь бамаз ивортӥз.

Висъям коньдонэз фойеысь но пырон дорысь вӧлдэтэз выльдыны, коридорез чебер карыны но кыкетӥ этажысь ӧсъёсты воштыны кутозы. Ужъёсты 2021-тӥ арын толсуре йылпумъяны чаклало.

Тупатъян ужъёс вакытэ ужъюрт дышем радлыкезъя ик ужа, творчествоя коллективъёс ужрадъёслы дасяськонзэ азьланьто.

Нялтас вераса, туэ Калык творчествоя элькун юрт 85 ар тырмонзэ пусъе. Соин ик тупатъян ужъёс улосвылысь лулчеберет удысысь огезлы валтӥсь ужъюртлы бадӟым кузьым луозы.

Та дыре Калык творчествоя элькун юртын ужасьёс лулчеберет ужъюртъёслэсь, кибашлыослэн юртъёссылэсь но элькунысь искусствоосъя нылпи школаослэсь ужзэс чакласа возё. Озьы ик Удмуртиын улӥсь калыкъёслэсь лулчеберетсэс эскеро но утё, лулчеберет удысын ужасьёс понна квалификацизэс будэтонъя курсъёс радъяло, фестивальёс ортчытъянэз но ӵектосъёсын ужанэз азинто, самодеятельной коллективъёс понна аттестаци ортчытъяло.

Тодэ вайытом, кемалась ик ӧвӧл, Алнаш ёросысь Туймыйылысь лулчеберет юртэз тупатъязы. 

Иворъёс

Глазкарын Луначарский нимо но Карл Маркс нимо ульчаос вожын мини-футбол, баскетбол, волейбол, гандбол шудыны чаклам выль спорт огъет пуктозы. Со сярысь Глазкарлэн тӧроез Сергей Коновалов «ВКонтакте» мерлыко вотэсысь бамаз ивортӥз.

Площадка спортысь шудон амалъёсъя федерациослэн вань куронъёссылы тупась луоз, тренировкаосты радъяны но нимлыко ӵошатсконъёслэсь люкетъёссэс ортчытъяны луонлык сётоз
Сергей Коновалов, Глазкарлэн тӧроез

Лэсьтӥськон ужъёсты мытӥзы ни. Мугор чеберетъя но тазалыкез кыдатонъя огъетлэн быдӟалаез 1 сюрс 500 квадрат метр пала луоз. Сое капчи конструкциослэсь ӝутозы. Выж вылаз туала паркет вӧлдозы, спортсменъёслы кылиськон-дӥсяськон интыос, гылтӥськон висъетъёс лэсьтозы.

Огъетэз 2022-тӥ арын усьтозы. 

Тодэ вайытом, Гракын куасэн бызьылон сюресэз паськытатӥзы

Ижкарын В. Г. Короленко нимо театрлэн азьвыл юртаз висъетъёсты тупатъян ужъёсты кутскизы. Со бере фольклор кырӟанъя но эктонъя «Айкай» театр отын камерной концертъёс ортчытъялоз. Со сярысь Удмуртиысь тӧролэн но кивалтэтлэн пресс-службазы ивортӥз.

Коллективлэсь висъетъёссэ тупатъяны улосвыл коньдэтысь 6 миллион манет висъязы.

«2021-тӥ ар пумозь артистъёслэн гримъёрнойёссэс, репетициослы залэз, оркестр шудон интыез, вуриськон цехез, костюмерноез но гардеробен коридорез выльдозы. Тупатъям бере труппа юртын камерной концертъес ортчытъяны быгатоз

Соловьёв

«Айкай» театрлэн репетициосыз но вуоно концертъёслы дасяськон азьланьтӥсько.

Короленко нимо тетарлэн азьвыл юртэз 1946-тӥ арын пуктэмын. Юртлэсь Карл Маркс нимо ульча ласянь вылзэ 2016-тӥ арын выльдӥзы. «Айкай» театр отчы 1992-тӥ арын пыриз, 2011-тӥ арозь драмая ӟуч театрен ӵош ужазы. Али фольклор коллектив юртлэсь 15 процентсэ гинэ басьтэ. 

Тодэ вайытом, В. Г. Короленко нимо театрлэн азьвыл юртаз Удмурт лулчеберетъя центр интыяськоз шуыса чакламын. Солэн учкетэз 2021-тӥ ар пумозь дась луыны кулэ. Концепциез кылдытонъя вожвылъяськонын Ульяновскысь архитектурной бюро утӥз. 

Ижкарын Шор площадьысь тымет пала васькон интылэсь люкетсэ тупатъянэз йылпумъязы. 12-тӥ шуркынмонэ эскерись ӧри солэсь Карл Маркс нимо ульчаысен Красной ульчаозь люкетсэ уже кутӥзы. Со сярысь кар администрацилэн пресс-службаез ивортӥз.

Туэ лэсьтӥськисьёс выль тротуар но гранит плитаос тыризы, ву кошконэз радъязы, 77 выль светильникъёс пуктӥзы, пыкъясь борддоръёсты выльдӥзы, арт-объектъёс пуктӥзы. Пиналъёслы резинаен шобыртэм шудон инты лэсьтӥзы. Ужъёс оглом 53 миллион манет тыр усизы.

Со сяна, куарусёнэ – коньывуонэ 59 выль писпуос, куакъёс мерттӥзы, сяська убоос лэсьтӥзы, турын кизизы.

Вуоно арын эспланадалэсь Красной ульчаысен Киров нимо ульчаозь люкетсэ выльдыны чаклало. Ӵектослэн дуныз 69 миллион манет. Та дыре ужъёсты быдэстӥсез быръён мынэ.

2021-тӥ арын тулыс та объект «Жильё и городская среда» йӧскалык ӵектос улсын ортчытэм куара сётонын нырысетӥ интые потӥз. Сое выльдон понна 18 сюрс 300 адями куаразэ сётӥз. 

2021-тӥ арын Удмуртиысь ёросъёсын Гурт интывылъёсты котыр ласянь азинтонъя кун программа улсын мерлыко объектъёсты пуктыны но тупатъяны оглом 764 миллион манет кутӥзы. Со сярысь элькунысь гурт возёсъя но сиён-юонъя министерстволэн пресс-службаез ивортӥз.

Со пӧлысь 446,8 миллион манетэз Росси кивалтэтлэн Резерв фондысьтыз вуиз. Коньдонэз Грак, Кизнер, Ува но Можга ёросъёсысь укмыс объектъёсты пуктыны но тупатъяны кутӥзы.

Озьы ик со уксёен 19 ёросъёсысь котырез умоятонъя 90 ӵектосъёсты улонэ пыӵатӥзы. Соос пӧлын адямиослы ветлыны 12 сюресъёс, спортэн вырыны 18 но нылпиослы 16 площадкаос, 13 шутэтскон интыос, сюресъёсты тупатъянъя 24 ӵектосъёс, югдыт каронъя ньыль ӵектосъёс но жуг-жагез люканы кык площадкаос.

Со сяна, 2021-тӥ арын трос коркаос пуктон улэ интыосты дасянъя кык бадӟым ӵектосъёсты йылпумъязы. Солы луыса Глаз ёросысь выль микрорайонын 25 музъем кесэгъёс дорозь ву но электротыл кыскизы, сюресэз асфальтэн шобыртӥзы. Со выллем ик ужъёс Пичи Пурга ёросын нуизы, отын коммуникациосты 46 участокъёс дорозь вуттӥзы. Куинетӥез сыӵе ӵектос туэ Сарапул ёросын пыӵатӥськыны кутскиз. 

Тодэ вайытом, али ёросъёсын гурт возёс предприятиосын ужасьёслы мерлыко найм улсын 15 коркаос пуктӥсько. Кун программалэн та ӧраз элькунмы нырысьсэ пыриське. Федераци уже кутэм коньдонлэсь 80 процентсэ берыктэ.

2021-тӥ арын укмыс толэзь ӵоже Удмуртиын 626,9 сюрс квадрат метр улон интыосты кутӥзы. Кылем арысь та вакытэн ӵошатыса, со 13,7 процентлы тросгес. Толшор – куарусён ӵоже 9 сюрс пала квартираос пуктӥзы, ивортӥз Удмуртстат.

Ӝыныезлэсь тросэз улон интыос, 328,3 сюрс квадрат метр, нимаз адямиос пуктӥзы. Миым сярысь со 4 процентлы тросгес. Оглом туэ 2 сюрс 948 корка ӝутӥзы.

Нимаз адямиосын тросгес коркаос пуктэмын Нижний Новгород но Ульяновск улосвылын - вань ӝутэм улон инты пӧлысь 75 процентэз

Элькунысь гуртъёсын 229,3 сюрс квадрат метр улон инты пуктӥзы. Муниципал кылдытэтъёс пӧлын лэсьтӥськон тужгес шӧдскымон йылӥз Кияса (4,8 поллы), Глаз но Алнаш (1,8 поллы) ёросъёсын.

1 сюрс улӥсьлы быдэ кутэм улон интылэн мындалаезъя Удмуртия Приволжск феджерал округын 6-тӥ инты басьтэ (418,7 квадрат метр). Азьпалан Татарстан – 571,8 квадрат метр, бере кыле Саратов улосвыл – 236,5 квадрат метр.

Тодэ вайытом, 2021-тӥ арын Удмуртиын трос квартираем 60 корка пуктыны чаклало

Алнаш ёросысь Туймыл гуртын лулчеберет юртэз тупатъян ужъёсты йылпумъязы. «Культура малой родины» парти ӵектосъя туэ юртэз выльдыны 1 миллион 300 сюрс манет висъязы. Со сярысь Удмуртиысь тӧролэн но кивалтэтлэн пресс-службазы ивортӥз.

Туэ татын тыл тӥрлыкез, фойеысь выжлэсь шобретсэ, висъетъёс куспысь ӧсъёсты воштӥзы, сцена вылын тыл тӥрлыкъёс но езъёс понна креплениос юнматӥзы, борддорзэ буязы.

Туймылысь лулчеберет юртэз тупатъян 2017-тӥ арысен мынэ. Соку партилэн ӵектосэзъя липетсэ выльдӥзы. 2019-тӥ арын пластик укноос пуктӥзы, сценаез но юртлэсь азьпалзэ тупатъязы, оглом 1 миллион 600 сюрс манет тыр.

Лулчеберет юртын арлы быдэ 150-лэсь трос ужрадъёс ортчытъяло, 11 клуб огазеяськонъёс ужало: кружокъёс, пиналъёслэн но бадӟымъёслэн творчествоя коллективъёссы.

2021-тӥ арын «Культура малой родины» ӵектосъя элькунысь гуртъёсысь но черкогуртъёсысь 25 лулчеберет юртъёсты выльдӥзы. Тупатъян ужъёслы но выль тӥрлык басьтыны 28 миллион 700 сюрс манет быдтӥзы. 

Тодэ вайытом, Алнашысь синпелетъёс но музейёс доры QR-кодъёсын планшетъёс пуктӥзы.

2022-тӥ арын Ижкарын 11 школаослэсь но 13 нылпи садъёслэсь липетъёссэс тупатъялозы. Ужъёсты «Большой ремонт» ӵектос улсын быдэсъялозы. Со сярысь кар администрацилэн пресс-службаез ивортӥз.

Ӵектос 2019-тӥ арын быдэсъяськыны кутскиз. Со дырысен Ижкарын 35 школаослэсь но 52 нылпи садъёслэсь липетъёссэс тупатъязы. Со сяна, 32 школаосын но 49 нылпи садъёсын 6 сюрс 579 выль укноос пуктӥзы.

Кызьы вераз кар администрацилэн жилищно-коммунальной ужпумъёсъя воштӥсез Игорь Сальников, тупатъян ужъёслэсь мынэмзэс калык туж сак чакла, угось куд-ог лэсьтӥськисьёс туж ик умой уг тыршо.

Технологиез чакламтэен сэрен куд-ог тупатъям липетъёсын шекъёс шараясько. Ужъёсты быдэстӥсь соосты ас коньдонэныз гарантиос улсын палэнтэ, яке коньдэтысь уксёен, но сое суд пыр берен берыктытыса.

Тодэ вайытом, 2021-тӥ арын Ижкарын 15 школаослэсь но нылпи садъёслэсь липетъёссэс тупатъязы, эшшо 17 дышетон юртъёсын выль укноос пуктылӥзы.

2021-тӥ ар пумозь Удмуртиын трос квартираем 25 коркаосты уже кутыны чаклало. Озьы ар ӵоже оглом 60 корка пуктэмын луоз. Со сярысь улосвыл тӧролэн но кивалтэтлэн пресс-службазы ивортӥз.

Туэ 9 толэзь ӵоже элькунын трос квартиарем 35 коркаосты уже кутӥзы ни, со 304 сюрс квадрат метрлэсь трос. Эшшо 306 сюрс квадрат метр нимаз адямиос пуктӥзы.

Таяз арын Удмуртиын 850 сюрс квадрат метр улон инты ӝутыны ужпум сылэ

Улон интылы кулэяськон ялан бадӟым. Кылем арен ӵошатыса, туэ элькунын ипотека кредитъёс басьтон 49 процентлы йылӥз. Татын бадӟым инты басьтэ капчиятэм куронъёсын кредитъёс висъянъя программаослы федераци но улосвыл ласянь дурбасьтон.

Туннэ Удмуртиын трос квартираем 147 корка пуктӥське, оглом 2,2 миллион квадрат метр мында. Со пӧлысь 144-езлы банкъёс пыр коньдон басьтыса (эскроу-счетъёс пыр), куинез калыклэсь коньдонзэ кутытэк ӝутӥсько.

Тодэ вайытом, 2021-тӥ арын Удмуртиын Гурт интывылъёсты котыр ласянь азинтонъя кун программа улсын коркаос пуктыны кутскизы

Удмуртиын «Территория детства» улосвыл ӵектосэз мытӥзы. Со улсын нылпи садъёслэсь интывылъёссэс тупатъялозы-утялтозы. Программаез Ижкар Думаысь депутатъёс ӵектӥзы.

Ижкарысь троссэ нылпи садъёсты 70-80 аръёсы пуктӥзы. Соосты «Большой ремонт» ӵектос улсын тупатъялоз. Нош интывылзэс выльдон понна «Территория детства» программа дасяны ӵектӥзы. Со улсын ужъюрт котырысь асфальтэз выльдозы, югдытӥсь юбоос пуктылозы но алама писпуосты коралозы.

Матысь дыре Ижкарын нылпи садъёслэсь интывылъёссэс эскерозы. Бӧрысь бичам ивортодэтъя нимысьтыз программа дасялозы.

Сое 2022-тӥ арын улонэ пыӵатыны кутскозы

Тодэ вайытом, Ижкарын выль нылпи сад усьтӥзы.

Удмуртиын «Модернизация первичного звена здравоохранения» федерал ӵектос улсын 30 эмъюртъёсты рос-прос тупатъялозы. 2021-тӥ ар пумозь ужъёслы 137,6 миллион манет висъялозы. Со сярысь элькунысь тазалыкез утёнъя министерстволэн пресс-службаез ивортӥз.

Программа улсын Вавож, Сюмси, Сьӧлта ёрос эмъюртъёсысь стационаръёсты, Нылгаысь участковой эмъюртэз, Якшур-Бӧдья ёросысь Лынга черкогуртысь врачебной амбулаториез но Дэбес, Грак, Якшур-Бӧдья ёросысь кӧня ке ФАП-ёсты выльдозы

Со сяна, программа улсын вуись ужан тӥрлыкез (рентген аппаратъёсты, флюорографъёсты но маммографъёсты) пуктон понна висъетъёсты рос-прос тупатъян ужъёс кутскизы. Кабинетъёсты вань туала куронъёсъя чакласа лэсьтозы. Ужъёс 21 ёрос эмъюртъёсын ортчозы.

Тодэ вайытом, федерал ӵектос улсын Удмуртие 47 эм тӥрлык басьтозы

Глаз ёросысь Полоста (Понино) ноДзякино черкогуртъёсын но Ярын лулчеберет юртъёсты тупатъян ужъёс бере усьтӥзы. Со сярысь элькун тӧролэн но кивалтэтлэн пресс-службазы ивортӥз.

Полостаын культура юртлэсь липетсэ выльдӥзы. Ужъёсты быдэстон понна оглом 850 сюрс манет кутӥзы.

Полоста Глаз ёросысь тужгес бадӟымез черкогурт луэ. Клубзы но бадӟымез. Учкисьёслы залзы 300 адямилы чакламын. Ужъюртын культура юрт сяна, искусствоосъя нылпи школа но библиотека интыясько. Со сяна, калык понна 14 пӧртэм огазеяськонъёс ужало.

Дзякиноысь культура юртысь фойеез тупатъязы. Укноосты, югдытӥсь арбериосты, тылпу сярысь ивортӥсь сигнализациез, вӧлдэтэз выльдӥзы.

Гуртын 593 адями улэ. Лулчеберет юртазы ужасьёслы но калыклы луыса клубзы Ӟуч лулчеберетъя центр инлык басьтӥз. Калык понна 10 огазеяськонъёссы ужало.

Озьы ик выльдон ужъёс Ярысь «Юбилейный» центрын мынӥзы. Отчы югдытӥсь прожекторъёс басьтӥзы, ву кошкон сӧзнэтсэс но санузелзэс тупатъязы.

Пусъём, вань ужъёсты «Культура малой Родины» ӵектос улсын быдэстӥзы. 2021-тӥ арын со но «Культура» йӧскалык ӵектос улсын оглом 25 гурт культура юртъёсты тупатъялозы.

Тодэ вайытом, кемалась ик ӧвӧл Кияса ёросын кык ар тупатъям бере культура юртэз усьтӥзы

Глазкарын ёроскуспо эмъюртэз тупатъяны кутскизы. Со сярысь Глазкарлэн тӧроез Сергей Коновалов «ВКонтакте» мерлыко вотэсысь бамаз ивортӥз.

Ужъёсты, калыкез эмъянэз дугдылытонтэм понна, бӧрсьысь бӧрсе быдэстозы, радлыксэ эмчиос асьсэос юнматӥзы. Вань ужъёс коньывуон пумозь йылпумъямын луыны кулэ
Сергей Коновалов, Глазкарлэн тӧроез

Лэсьтӥськисьёс хирургия ёзэтысь плиткаез сэртто ни, матысь нуналъёсы укнооссэ воштон борды басьтӥськозы.

Тодэ вайытом, 2021-тӥ арын ,Удмуртиысь ёрос эмъяськонниослы 47 эм тӥрлык басьтозы.

Кияса ёросысь Салья гуртын тупатъям бере культура юртсэс усьтӥзы. Ужъёсты «Покчи шаерлэн лулчеберетэз» федерал ӵектосъя быдэстӥзы. Со сярысь Удмуртиысь лулчеберетъя министр Владимир Соловьёв «ВКонтакте» мерлыко вотэсысь бамаз ивортӥз.

Ужъёсты 2020-тӥ но 2021-тӥ аръёсы нуизы. Оглом 5 миллион манетлэсь трос коньдон быдтӥзы. Берлозэ юртэз 50 ар талэсь азьло тупатъязы

2020-тӥ арын липетсэ, вӧлдэтсэ, выжзэ, укноосты воштӥзы. Сигзэ шуныт каризы. Пуш борддоръёс вылэ кык сӥен гипсокартон шуккизы. Пырон но висъетъёс куспы ӧсъёс пуктӥзы, ошиськись вӧлдэт лэсьтӥзы.

2021-тӥ арын пыронъёсты тупатъязы, электроезъёсты но светильникъёсты воштӥзы, юртлэсь вылзэ сайдинген ворсазы, шуныт сётон сӧзнэт, шуныт сьӧросъёс лэсьтӥзы, учкисьёслы залэ небыт пуконъёс пуктӥзы но мукет ужъёсты быдэстӥзы.

Лулчеберет юртын тямыс клуб огазеяськонъёс ужало, отчы 100 пала адями пыриське. Фольклоръя «бӧляк» калык ансамбль но драмая «Мылкыд» кружок калыккуспо, огъяросси, улосвылкуспо, элькун вожвылъяськонъёслэн, калык творчествоя фестивальёслэн лауреатъёсыз луо.

Салья гуртын трос удмурт шулдыръяськонъёсты но йылолъёсты ортчытъяло, соос пӧлын «Вӧсьнерге ветлон» (Великтэм), «Урбеч уллян» (Великтэм бере сизьыметӥ нуналаз пеймыт кужымъёсты уллян), «Бусы сюан» (тулыс бусы ужъёсты йылпумъян), «Гужем юон», «Выль», Салья базар.


Иворъёс

Алнаш ёросысь Асан Техникумын выль хоккей коробка пуктӥзы. Со сярысь «ВКонтакте» мерлыко вотэсысь бамаз Алнаш ёрослэн тӧроез Алексей Семёнов ивортӥз.

Ӵектосэз кичӧлтонъёсты быдэстыны коньдон висъян (инициативной бюджетирование) программая улонэ пыӵатӥзы. Хоккей коробкалэсь бортъёссэ пуктӥзы ини, площадказэ асфальтэн шобыртӥзы. Матысь дыре тыл юбоос пуктозы, со сяна, спонсоръёслэн юрттэменызы асфальтэз резинка пырыен шобыртозы.

Гужем пумозь Алнаш ёросын эшшо куинь хоккей площадкаос лэсьтозы на. Соос «Благоустройство сельских территорий» программа улсын кылдозы. Озьы толалтэ йӧ вылэ потаны Ляли, Вуж Шудья но Шор Утчан гуртъёсын улӥсьёс быгатозы.

Тодэ вайытом, Сюмси ёросын покчи пиналъёсты коньки вылэ султытыны ӧдъяло

Вотка ёросысь Пихтовка черкогуртын «Деревня будущего» ӵектос улсын нылпи садэз рос-прос тупатъяло. Со сярысь Вотка ёрослэн тӧроез Илья Прозоров «ВКонтакте» мерлыко вотэсысь бамаз ивортӥз.

Оскисько, рос-прос тупатъян уж нылпи садлэсь данзэ шӧдскымон ӝутоз, сое кема но пайдалыко уже кутыны луонлык сётоз, озьы ик пиналъёслы но, ужасьёслы но нылпи садын дырзэс ортчытыны умой луонлыкъёс кылдытозы
Илья Прозоров, Вотка ёрослэн тӧроез

Туннэ нуналлы лэсьтӥськисьёс нылпи садлэсь юртсэ юнматӥзы, липетсэ тупатъязы ини, али пушсэ выльдо, укнооссэ, ӧсъёссэ вошто. Со сяна, выжъёссэ, кенеръёссэ выльдозы, пиналъёслы поръян интыосы выль верандаос пуктозы.

Нылпи садлэн юртэз 1980-тӥ арын пуктэмын вал ини, со дырысен тупатъян ужъёс ортчытъямын ӧй вал. 

Тодэ вайытом, Ижкарын куинь выль нылпи садъёс пуктозы

Россиысь калыкез дышетонъя министерствоын быдэсак тупатъямез кулэ карись школаослэсь реестрзэс кылдыто. Туннэ Удмуртиын 43 сыӵе дышетон юртъёс лыдметэ пыртэмын. Со сярысь элькунысь дышетонъя но тодосъя министерствоын ивортӥзы.

Та нуналъёсы муниципалитетъёсын ужаськом, котькуд школая учкиськом, мае отын тупатъяны кулэ. Та лыдметэ «Большой ремонт» ӵектосъя тупатъям школаос но шедизы, дыр. Вордӥськонлы йылпумъян реестр дась луоз

Солэн кылъёсызъя, вуоно арня кутсконын тодмо луоз, кыӵе школаос 2022-тӥ арын быдэсак тупатъямын луозы.

Со сяна, Светлана Болотниковалэн верамезъя, юртъёсты рос-прос тупатъям сяна, инфраструктураын куд-ог воштонъёс, мебелез выльдон, кытын ке учебникъёс басьтон, дышетӥсьёслэсь тодон-валанъёссэс будэтон но чакламын.

Ватсалом, Россилэн азьмуртэз Владимир Путин кивалтэтэз улосвылъёсын ӵош школаосты быдэсак тупатъянъя 2022-2026 аръёслы чаклам программа дасяны куриз. 

Тодэ вайытом, Ижкарысь школаосын выль дышетскон арлы покчи пиналъёслы ватсаса 15 классъёс дасялозы

Удмуртиын «Покчи шаерлэн лулчеберетэз» («Культура малой родины») федерал ӵектос улсын Красногорск черкогуртысь культура юртэз но Сьӧлта ёросысь Кыргуртысь (Новая Жикья) Йӧскалык лулчеберетъя центрез выльдӥзы. Со сярысь элькунлэн тӧроез Александр Бречалов «Вконтакте» мерлыко вотэсысь бамаз ивортӥз.

Красногорскысь культура юртын ужъёс кӧня ке люкетэн мынӥзы. 2017-тӥ арысен кутскыса, учкисьёслы залэз, коридорез, пыронэз тупатъязы. Пластик укноос, ӧсъёс пуктӥзы, пушсэ чебер каризы, выжъёссэ, тубатъёссэ выльдӥзы. Со сяна, югдытонъя но куарая тӥрлык, выль пуконъёс басьтӥзы.

Озьы ик кружокъёс ортчытъяны чаклам висъетъёсты но выльдӥзы. Туэ эктонъёслы классэз, юрттӥсь висъетъёсты, кабинетъёсы ӧсъёсты воштӥзы.

Нош Сьӧлта ёросысь Йӧскалык лулчеберетъя центре шуныт сётӥсь сӧзнэт, ву лыктон но кошкон гумыос кыскизы, выль санузелъёс лэсьтӥзы. 

Та ужъёсты тупатъям бере 28 клуб огазеяськонъёслэн умой интыын ужаны луонлыксы кылдӥз, нош кӧня ке сюрс адями ӟечлыкогес возьматонъёсты учкыны быгатоз

Тодэ вайытом, кемалась ик ӧвӧл федерал программа улсын Можгаысь, Пичи Пургаысь, Можга ёросысь куинь лулчеберет юртъёсты тупатъязы

Можгаын, Пичи Пурга но Можга ёросъёсын куинь лулчеберет юртъёсты тупатъязы. Ужъёсты «Покчи шаерлэн лулчеберетэз» федерал программая быдэстӥзы. Со сярысь улосвыл тӧролэн но кивалтэтлэн пресс-службазы ивортӥз.

Можга ёросысь Быдӟымсурд (Старый Березняк) гуртысь лулчеберет юртын тупатъян ужъёс кык ар мынӥзы. 2021-тӥ арын солы федерал, улосвыл но муниципал коньдэтъёсысь 1 миллион 500 сюрс манетлэсь трос уксё висъязы. Учкисьёслы залын тылэз но шуныт сётон сӧзнэтэз тупатъязы, борддоръёсты, вӧлдэтэз но выжез выльдӥзы, 150 пуконъёсты воштӥзы. Кылем арын липетэз, укноосты, пырон интыосты, ву кошкон гумыосты но ву виян сӧзнэтэз тупатъязы.

Лулчеберет юртын 10 клубъёс ужало, отчы 105 адями ветлэ. Таяз арын Быдӟымсуртын нырысьсэ турнан ужъёсты йылпумъянлы сӥзем «ТУРЫНфест» фестиваль ортчытӥзы. Оглом 100-лэсь трос ужрадъёс радъязы, со пӧлысь 30-эз – пиналъёс понна.

Озьы ик кык ар тупатъязы Пичи Пурга ёросысь Уча (Ильинское) черкогуртысь лулчеберет юртэз. Туэ 2 миллион 200 сюрс манет тыр шуныт сётон сӧзнэтэз выльдӥзы. 2020-тӥ арын липетсэ, ӧсъёсты, укноосты воштӥзы, пырон интыез тупатъязы. Торгъёсын шыръям коньдонэз сценаез но юртлэсь отмостказэ выльдыны малпало.

Лулчеберет юрт вить улон интыос понна ужа: Уча, Ыбдэс, Арлан, Сосновка но Чокал, кытын оглом 1 сюрс 700-лэсь трос адями улэ. Юртын 300 учкисьёслы зал, лыдӟиськонни, административной висъетъёс, кружокъёслы куинь висъетъёс, музей, костюмерной, гримёрной но хореографи висъетъёс. 17 клубъёсы 196 адями пыриське. Соос пӧлын нылпи садэ ветлӥсьёс, школаын дышетскисьёс, егитъёс, арлыдоос но пересьёс.

Можгаысь «Дубитель» культура юртын тупатъян ужъёс 2017-тӥ арысен мынӥзы. Отын акустика но тыл, пуконъёс басьтӥзы, пырон интыысь витражъёсты, шуныт сётон сӧзнэтэз но фойеысь, касса залысь но гардеробысь вӧлдэтэз воштӥзы.

«Культура» йӧскалык ӵектосъя кинозал усьтӥзы. Али висъетъёсты буязы, укноосты воштӥзы но витраж лэсьтӥзы

«Дубительын» арлы быдэ 200-лэсь трос ужрадъёс ортчытъяло, отчы 40 сюрслэсь

Читать полностью
Наверх
Вниз