Ижкар+1 °C
9 -тӥ толсур 2021 Покчиарня
18+

Глаз ёросын XIV даурысь тодылымтэ улон бервылэз шедьтӥзы

  • 404
  • 0
Глазкар / Удмуртия
Глаз ёросын XIV даурысь тодылымтэ улон бервылэз шедьтӥзы
Туспуктэм: vk.com (Музей-заповедник УР "Иднакар" им. М. Г. Ивановой)

Историяя но лулчеберетъя «Иднакар» музей-заповедникысь ӧнерчиос Глаз ёросын XIV даурысь тодылымтэ улон бервылэз шедьтӥзы. Кызьы вераз ивортодэтъя «Удмуртия» агентстволы музейысь археология ёзэтлэн кивалтӥсез Александр Дёмин, Удмуртия понна, озьы ик быдэс Россиысь тодос дунне понна со туж пусйымон учыр.

Этнографъёс но, археологъёс но 19-тӥ даурын ай чутрак вераллязы: Чупчипал археологи культура – со вал 13-тӥ даурозь. Берлогес но, 20-тӥ даурын но, Чупчи шурлэн бассейназ Зарни Орда вакытэ, нош со 4-тӥ даур, улон интыос вал шуыса зэмос, оскымон иворъёс ӧй вал
Александр Дёмин, «Иднакар» музей-заповедникысь археологи ёзэтлэн кивалтӥсез

Музейын ужасьёс оглом 30 пала арбериос шедьтӥзы: коньдон, юртъер котырын кутӥськись арбериос, ожмаськон арбериос, чеберъяськонъёс. Алексей Дёминлэн кылъёсызъя, соосъя валаны луэ, ӵапак XIV даурын татын улон инты вал шуыса. Нош кинъёс улӥзы, та арбериосъя гинэ валаны уг луы, пусйиз музейысь ӧнерчи.

Таӵе коньдон, кудзэ ми бусыын ужакумы шедьтӥмы, туала Татарстанлэн но, Удмуртилэн но инытвылазы ветлӥз, малы ке шуоно Удмуртиын но, бускель улосвылъёсын но, бигер, зарни орда, коньдонъёсын ватосъёс шедьтылэмын вал
Александр Дёмин, «Иднакар» музей-заповедникысь археологи ёзэтлэн кивалтӥсез

Археолог оскемзэ вераз, вашкала улон инты котырысь вашкала шайвылэз но шедьтыны кылдоз шуыса. Со трос юанъёслы валэктонъёс сётысал, кылсярысь, тодыны быгатысалзы татын улэмъёслэсь кин луэмзэс: финн-перм калыкъёс, оло, нырысетӥ бигеръёс.

Александр Дёминлэн верамезъя, вашкала улон интыос та палан эшшо луыны быгато на. Со сярысь татысь интынимъёс верало. Вуоно арын утчаськон ужез азьланьтыны малпало. 

Тодэ вайытом, 2020-тӥ арын Кияса ёросын пиналъёс вашкала пӧйшуръёслэсь лыоссэс шедьтӥзы



Наверх
Вниз