Ижкар+18 °C
29 -тӥ куарусён 2020 Пуксён
18+

Быдӟым Атыкай ож вакытысь гожтэтысь адямиослэсь ӵыжы-выжыоссэс утчало Пичи Пургаын

  • 617
  • 0
Пичи Пурга / Удмуртия
Быдӟым Атыкай ож вакытысь гожтэтысь адямиослэсь ӵыжы-выжыоссэс утчало Пичи Пургаын
Туспуктэм: vk.com (Малопургинский краеведческий музей)

Пичи Пурга ёросысь шаертодонъя музейын ужасьёс Быдӟым Атыкай ож вакытысь гожтэтысь адямиослэсь ӵыжы-выжыоссэс утчало. Со сярысь ивортодэтъя «Удмуртия» агентстволэн корреспондентэзлы музейлэн кивалтӥсез Алевтина Данилова вераз.

Туэ оштолэзь пумысен «Северо-Запад» огазеяськонысь поисковикъёс Ленинград улосвылысь Киров ёросын ужазы. Утчаськонъёссы йылпумъяськон азьын ини, 6-тӥ куартолэзе, Вороново урочище но Барское ты дорысь интыын корт утчась арберизы куара сётӥз. Музъем улысь 45 миллиметръем пушкалы ыбылымтэ артиллери снарядъёс адӟиськизы. Одӥгысьтыз тэшкам гильзаысь поисковикъёс кагазлэсь пумзэ адӟизы.

Берлогес ини тодмо луиз, со гожтэт шуыса. Паймымон, со кызьы ке но дарылы (порохлы) картонлэсь пачкатӥсь-призмаос вискын утиськем. Снарядэз ыбысалзы ке, гожтэт чиптэм-чаптэм ышысал. 

Гожтэтэз снарядъёс лэсьтон цехын ужась нылкышноос келяллям. Пичи Пургаысь шаертодонъя музейын ужасьёслэн малпамзыя, соос ожгарчиослы «ми но тыршиськом, тӥледын ӵош вормонэз матэктытӥськом» шуыса вераны тыршизы, луоз. Технологической кагаз вылын карандашен гожтэмын:

«Рабочие призм Егорова Клавдия Ивановна, Коробихина Анна, Петрова Мария Яков., Погорелова Вера, Дереушева Катя М., Егорова Анна, Варнавская Галя Т., Зенина Антон. Ром., Таринова Мария, Нистиренкова Зоя окон. контроль. Все Стахановцы. Выполняют 3 нормы в день»

Шедьтэм гильза бордын 67 номер пуктэмын. Со снаряд дасясь базаослэн номерзы. 67 номер улсын Москва улосвылысь Можайскысь база лыдъяськиз, кудзэ 1941-тӥ арын Удмуртиысь Пугачёвое эвакуацие келязы. Отчы ужаны быдэс шаерысьтымы 180 нылкышноосты басьтӥзы.

Со пумысен милемлы Мер палатаысь Фаиль Фаизович Ибрагимов (Удмуртиысь «Долг» огазеяськонлэн кивалтӥсез – ред.) жингыртӥз. Со милемлы тӥни озьы вераз но электронной почтаен лэзиз сыӵе гожтэт. Соос малпало, со кышноос Пугачёвоын ужамын шуыса
Алевтина Данилова, Пичи Пурга ёросысь шаертодонъя музейлэн кивалтӥсез

Алевтина Даниловалэн кылъёсызъя, гожтэтын пусъем нылкышноос сярысь мар ке тодон понна соос интернетысь вань сайтъёсты бугыртӥзы ини, форумъёсысь, ёрос архивысь утчазы. Но нокытын тыро-пыдо ивор ӧвӧл.

Ивор сайтэ но, газетэ но сётӥмы ни, Пугачёвоын но выжыоссэс мед утчалозы шуыса тыршиськом. <…> Калык вылэ гинэ осконмы кыле на
Алевтина Данилова, Пичи Пурга ёросысь шаертодонъя музейлэн кивалтӥсез

Туннэ нуналлы Удмуртиысь кун архивлэн сайтэз пыр кыксэ нимез шедьтӥзы ик. Со Вера Александровна Погорелова но Антонина Романовна Зенина. Ужкагазын нылкышноосты 1946-тӥ арын «За доблестный труд в годы Великой Отечественной войны 1941-1945 г.г.» медален пусйизы шуыса гожтэмын. Озьы ик соос Пичи Пурга ёросысь луо шуыса пусъемын.

Соослэн фамилиоссы но, оло, воштӥськизы, егит нылъёс вал ке. Ум тодӥське таре, кызьы соосты шедьтыны
Алевтина Данилова, Пичи Пурга ёросысь шаертодонъя музейлэн кивалтӥсез

Шедьтыны кылдӥз ке, гожтэтэз Пичи Пургае вайыны но, отысь нылкышноослэсь ӵыжы-выжыоссэс ӧтьыса, бадӟым сӥё-дано ужрад ортчытыны малпало. Нош шедьтосэз азьланяз Ижкарысь огаз музее сётозы, дыр. 

Тодэ вайытом, кемалась ик  ӧвӧл, поисковикъёс Пичи Пурга ёросысь Куреггуртысь ожгарчилэсь медальонзэ шедьтӥзы шуыса ивор вуиз вал. 



Наверх
Вниз