Ижкар-12 °C
22 -тӥ толшор 2021 Удмуртарня
18+

Удмуртиысь Глаз ёросын элькунлэн кунлыкезлы 100 ар тырмон нуналэ ёрослэсь гожъёссэ утись батыр стела кылдӥз. Со сярысь ивортодэтъя «Удмуртия» агентстволэн корреспондентэзлы Глаз ёрос администрациысь ӵектос ужъёсъя, лулчеберетъя, егитъёсын ужан политикая, физкультурая но спортъя управлениен кивалтӥсь, ёрос муниципал кылдытэтлэн администрациезлэн тӧроезлэн мерлык ужъёсъя воштӥсез Евгений Баженов вераз.

Утись батыръёсты лэсьтыны малпанмы «ДондыДор» ӵектос кутскон дырысен вал, со омырын поръя вал ини. Озьы луиз, сюрес возёсъя министерство стела лэсьтыны коньдон висъяз, но ми югдурысь пайда поттыны малпам. Милям пӧрмизы батыръёс, Глаз музъемъёсты вашкала утисьёс
Евгений Баженов, Глаз ёрос администрациысь ӵектос ужъёсъя, лулчеберетъя, егитъёсын ужан политикая, физкультурая но спортъя управленилэн кивалтӥсез

Ужъёсты быдэстыны оглом одӥг но ӝыны миллион манет висъязы

Глаз ёрослэн гожъёсаз ньыль батыръёс кылдозы. Нырысетӥзэ, Красногорск ёросэн гожын, пуктӥзы ини. Кӧснуналэ Яр ёросэн гожын лэсьтозы. Собере Юкаменск ёросэн но Балезино ёросэн гожъёсын.

Евгений Баженовлэн верамезъя, нырысетӥ куинез батыръёс 2 метр пасьталаем но 4 метр ӝуждалаем луозы. Нош берпуметӥез – батыръёсын бадӟым композиция – 5 метр пасьталаем но 6 метр ӝуждалаем.

Кортлэсь батыръёсты Глазкарысь суредась-скульпторъёс Сергей Попов но Владимир Голованов лэсьтӥзы.

Азьланяз калык батыръёслы нимъёс ӵектыны быгатоз.

Малпанъёсамы со кыӵе ке интерактивность выллем. Адямиос квестэз сямен мед ортчозы, учкозы, нимъёс малпалозы. <…> Озьы, адямиос асьсэос батыръёслы ним сётозы
Евгений Баженов, Глаз ёрос администрациысь ӵектос ужъёсъя, лулчеберетъя, егитъёсын ужан политикая, физкультурая но спортъя управленилэн кивалтӥсез

Озьы ик, «ДондыДор» ӵектосэз радъясьёс батыръёсын туспуктэм лэсьтыны но соосты мерлыко вотэсъёсы #страж_Донды хештеген пусйыса поттыны ӵекто. 

Вавоже Слудка паласен пырон дорын будӥсь сусыпу Россиысь паймымон писпуослэн лыдметазы шедиз. Со сярысь Удмуртиысь кивалтэтлэн тӧроез Ярослав Семёнов «ВКонтакте» мерлыко вотэсысь огиназ ивортӥз.

Писпу лыдметэ кемалась ик ӧз шедьы. Сое биолог но шаерчи Александр Кондратьев но «ДаУР!» кветсэ мыло-кыдо пыриськись биолог тодосъя доктор, профессор Николай Ильминских эскеризы. Ӵемысьгес сусыпу куак сямен будэ, но Вавожысь экземпляр пӧртэм
Ярослав Семёнов, Удмуртиысь кивалтэтлэн тӧроез

Тодосчиослэн чакламзыя, писпулы 300-400 ар. Сусыпулэн зӧкталаез - 1,5 метр, ӝуждалаез – 7,7 метр. 

Нялтас вераса, ёросын улӥсьёс та сусыпу дорысь 20 иськемын эшшо одӥг сыӵезэ ик шедьтӥзы. 

Россиысь паймымон писпуослэн лыдметазы али 16 писпуос, соос пӧлын кызьпуос, кызъёс, пужымъёс, тыпыос.

Ува ёросысь Кыйлуд школаын дас одӥгетӥ классын дышетскись пиналъёс вашкала пӧйшуръёслэсь лыоссэс шедьтӥзы. Сыӵе шедьтосъёс соос Кияса ёросысь Кырыкмас шур доры экспедициен потакузы лэсьтӥзы. Тунсыко усьтонъёссы сярысь ивортодэтъя «Удмуртия» агентстволэн корреспондентэзлы Ува ёросысь Кыйлуд школаысь биологияя дышетӥсь Ирина Аднакулова вераз.

Ирина Аднакуловалэн кылъёсызъя, Кияса ёросэ вашкала пӧйшуръёслэсь лыоссэс утчаны эскепедицие потыны ӵош дышетскем эшез, биолог Александр Корепанов ӵектӥз.

Со мыным шуиз: «Ойдо отчы ветлом, мар ке шедьтӥм ке, пиналъёсыд исследовательской уж гожъялозы». Дас одӥг классысь пиналъёс соглаш луизы. Куинь кузя гинэ соос дышетско но, ваньзы ӵош ик мынӥзы
Ирина Аднакулова, Ува ёросысь Кыйлуд школаысь биологияя дышетӥсь

Вашкала пӧйшуръёслэсь лыоссэс Кырыкмас шур дурысь утчазы. Дышетӥсьлэн верамезъя, шур туж читыр-чутыр кошке, ярдурез огпалтӥ меӵ, мукет палтӥ нялмыт луэ. Ӵапак нялмыт интыосаз вашкала лыос сюрыло, пе. Александр Корепанов экспедицие потэмъёслы кызьы ужаны валэктӥз но, вырӟизы.

Мон созэ-тазэ туспуктонъям соослэсь (пиналъёслэсь – ред.) бергес васьки. Боды шедьтӥ аслым. Бодыен ветлӥсько. Мынӥсько, мынӥсько но, учкисько, ву вӧзын ик сюй пӧлын пеймыт-пеймыт лы кылле. Мон воксё абдрай ини сыӵе шедьтосэлы. Мон сое поттӥ, учки. Кесяськисько ини. Соос малпаллям мон йыроми шуыса. Табере лыкто ини мон доры но, мон ура! шуыса кесяськисько. Озьы соос валазы ини мон шедьтӥ шуыса
Ирина Аднакулова, Ува ёросысь Кыйлуд школаысь биологияя дышетӥсь

Ирина Аднакуловалэн верамезъя, солэн шедьтосэз нырысетӥ чырты сюрлыёз вал, но кинлэн – соос ӧз тодэ. Бӧрысь утчаськисьёс эшшо кык пӧртэм лыос шедьтӥзы на. Огзэ дышетскисьсы, нош мукетсэ Александр Корепанов. 

Александр Корепанов шедьтосъёссэс Ижкарысь палеонтолог доры экспертизае нуллӥз.

Толон со мыным жингыръяз ини лыосты эскеризы шуыса. Одӥгез вашкала бизонлэн, одӥгез вашкала валлэн. Нош одӥгез пужейлэн луыны быгатэ, но рос-прос ӧвӧл на тодэмын
Ирина Аднакулова, Ува ёросысь Кыйлуд школаысь биологияя дышетӥсь

Бӧрысь одӥгзэ ке но лыэз Кыйлудысь школае кельтозы. 

Вашкала лыос шедьтэм сяна, пиналъёс дышетӥсенызы ӵош эшшо мукет усьтон лэсьтӥзы. Кырыкмас шур доры мынон сюрессы тэль пыр ортчиз ке, отысь соос Удмуртиысь Горд Книгае пыртэм «Лангермания гигантская» нимо губиосты пумитазы.

Сюресмылэн паллям палаз со тӧдьы губи адӟиськиз. Бадӟым маке. Ми воксё абдрам ини сыӵе бадӟым губилы. Мынам аслам адӟылэме вал ини, нош пиналъёс нырысьсэ адӟизы. Соин туж шумпотӥм ини сыӵе шедьтосмылы
Ирина Аднакулова, Ува ёросысь Кыйлуд школаысь биологияя дышетӥсь

Паймымон губиосты соос 20-лэсь трос адӟизы! Котькудзэ мертазы, гожтыса кельтӥзы. Пасьталазы 20 сантиметрысен ӝыны метрозь луиз.

Ирина Аднакулова вера, сюрес вылэ потыкузы ӧз ик малпалэ вал сомында шедьтонъёс, усьтонъёс лэсьтозы шуыса. Нош табере эскерон ужъёс лэсьтыны трос гинэ материалзы люкаськиз. 

Пусъём, Кырыкмас шур дуре вуылэм сяна, Александр Корепанов пиналъёсты но дышетӥсьсэс Кияса ёросысь мукет интыосын но тодматӥз. Соос Флорлэн но Лаврлэн дун-чылкыт ошмессы, Постолка шур дурысь вуусён доры вуылӥзы, «Елабуга – Сарапул» почта тракт кузя ортчизы но трос

Читать полностью

Дэбесын улӥсь Павел Симанов 11-тӥ инвожое Кам шурысь 36 килограммъем лапаез (сом) кутӥз. Со сярысь Дэбес ёросысь «Новый путь» газетлэн «ВКонтакте» мерлыко вотэсысь бамаз Надежда Ворончихина ивортӥз.

Визнанэн кутэм чорыгез пыже куинь кузя гинэ ӝутыны вормизы.  

Удмуртиысь йӧскалык театрын туала ӟуч драматурглэн Юлия Поспеловалэн «Лёха» пьесаезъя «Шуылоз вал песятае...» удмурт кылын спектакль дасяло. Со сярысь ивортодэтъя «Удмуртия» агентстволэн корреспондентэзлы театрысь литературая ёзэтлэн кивалтӥсез Наталия Панфилова вераз.

Спектаклез Барнаулысь егит режиссёр Ирина Астафьева пуктоз

Со милемлы гожтӥз, пӧртэм пьесаос пуктыны ӵектӥз. Ми кутским соин вераськыны. Ку со милемлы «Лёхаез» ӵектӥз, ми лыдӟим, кызьы-мар адӟиськод шуыса юам. Милемлы солэн пӧртэм малпанъёсыз кельшизы
Наталия Панфилова, Удмуртиысь йӧскалык театрысь литературая ёзэтлэн кивалтӥсез

Пьесаын нылмурт песятаез сярысь тодэ ваёнъёссэ маде, озьы со выжыез пыр, мукет вакытэ улэм адямилэн улонэз пыр ассэ валаны, дуннеын интызэ шедьтыны тырше.

Сыӵе ненег, сюлэмез позыртӥсь мадён арлыдо муртлэн улон сюресэз сярысь, кудӥзлэн озьы ик улэмез потэ, яратэмез потэ, огшоры улонэн куанэмез потэ
Наталия Панфилова, Удмуртиысь йӧскалык театрысь литературая ёзэтлэн кивалтӥсез

Пьесаез удмурт кылэ драматург, артист Сергей Антонов берыктӥз

Наталия Панфиловалэн кылъёсызъя, соос режиссёрен Ирина Астафьеваен туж трос кенешизы, вераськизы, кыӵегес спектакль пуктыны шуыса. Озьы со туала мед луоз шуыса пумкылъянэ вуизы.

Классикамы милям тырме ини. Туала улонэн одӥг вамышен мыном шуод-а, мар-а, соин ик басьтыны малпам сыӵе аспӧртэм постановкаез
Наталия Панфилова, Удмуртиысь йӧскалык театрысь литературая ёзэтлэн кивалтӥсез

Юлия Поспеловалэн пьесаез монопьеса шуыса гожтэмын, но режиссёрлэн Ирина Астафьевалэн малпамезъя, театрын монопьеса уз пуктэ, отын мукет шудӥсьёс но луозы.

Озьы ик татын аслаз тунсыко ритмикаез но луоз. Со кылбурлы матэгес гожтэмын. И со ритмиказэ татын кельтыны малпам
Наталия Панфилова, Удмуртиысь йӧскалык театрысь литературая ёзэтлэн кивалтӥсез

Тунсыко выль спектакльлэн жанрез но – sound-драма. Наталия Панфиловалэн верамезъя, сое Владимир Панков малпаз. Спектакльын литература но крезьгур герӟасько. Ваньмыз, мае адямиос шӧдо, куараос, крезьгур пыр возьматӥське.

Татын крезьгуро люкетэз но литературно-драматургической люкетэз - соослэн луоз синтез. Кырӟанъёс но чузъяськозы, туала крезьгур но мыноз. Али со (режиссёр – ред.) тани малпаське, кыӵегес луоз. Электронной крезьгурез басьто, дыр, шуэ
Наталия Панфилова, Удмуртиысь йӧскалык театрысь литературая ёзэтлэн кивалтӥсез

Нырысь ик спектаклез пичи сцена вылын возьматозы шуыса малпазы вал, но суредасьёс эскизъёс лэсьтэм бере валазы, ваньзэ сое отчы пыртыны уз быгатэ.

Спектакль мыныку, учкисьёс залын уз пуке, соос артистъёс вӧзын сцена вылын луозы

Кыӵе ке конструкция луоз яке, тани али малпаськом ай, кызьыгес сое карыны, пуктылом пуконъёс конструкция карыса ик, но отын соос пукозы. Озьы ик али малпаськиськом на, учкисьёсмы учкисьёс гинэ луозы, яке асьсэзыз отын адӟозы, яке интерактив луоз
Наталия Панфилова, Удмуртиысь йӧскалык театрысь литературая ёзэтлэн кивалтӥсез

Оглом вераса, таӵеез удмурт театрын ӧй вал на. Туала но аспӧртэм. Тунсыко соиз но - спектаклез нырысьсэ нылкышно пуктэ.

Милям али репертуармы пиосмуртъёсын гинэ пуктэмын. Пиосмурт синмын учкиськом улон шоры. Нош татын кышномурт учкоз улон шоры. Соин ик туж тунсыко
Наталия Панфилова, Удмуртиысь йӧскалык театрысь литературая ёзэтлэн кивалтӥсез

Нялтас вераса, режиссёр Ижкарын кыкетӥ нуналзэ гинэ ужа ай. Та дыре со артистъёсты учке, валтӥсь рольёсты шудӥсьёсты быръе. Озьы ик али малпасько, луоз-а ӟуч кылэ синхронной перевод. Спектакльлэн премьераез 9-10 оштолэзьлы чакламын.

Ватсалом, театрын мукет спектакльёс бордын но уж пӧзе. Кылсярысь, али Сергей Антоновлэн «Троллейбус» пьесаез бордын ужало. Солэн режиссёрез Алексей

Читать полностью

Пичи Пурга ёросысь шаертодонъя музейын ужасьёс Быдӟым Атыкай ож вакытысь гожтэтысь адямиослэсь ӵыжы-выжыоссэс утчало. Со сярысь ивортодэтъя «Удмуртия» агентстволэн корреспондентэзлы музейлэн кивалтӥсез Алевтина Данилова вераз.

Туэ оштолэзь пумысен «Северо-Запад» огазеяськонысь поисковикъёс Ленинград улосвылысь Киров ёросын ужазы. Утчаськонъёссы йылпумъяськон азьын ини, 6-тӥ куартолэзе, Вороново урочище но Барское ты дорысь интыын корт утчась арберизы куара сётӥз. Музъем улысь 45 миллиметръем пушкалы ыбылымтэ артиллери снарядъёс адӟиськизы. Одӥгысьтыз тэшкам гильзаысь поисковикъёс кагазлэсь пумзэ адӟизы.

Берлогес ини тодмо луиз, со гожтэт шуыса. Паймымон, со кызьы ке но дарылы (порохлы) картонлэсь пачкатӥсь-призмаос вискын утиськем. Снарядэз ыбысалзы ке, гожтэт чиптэм-чаптэм ышысал. 

Гожтэтэз снарядъёс лэсьтон цехын ужась нылкышноос келяллям. Пичи Пургаысь шаертодонъя музейын ужасьёслэн малпамзыя, соос ожгарчиослы «ми но тыршиськом, тӥледын ӵош вормонэз матэктытӥськом» шуыса вераны тыршизы, луоз. Технологической кагаз вылын карандашен гожтэмын:

«Рабочие призм Егорова Клавдия Ивановна, Коробихина Анна, Петрова Мария Яков., Погорелова Вера, Дереушева Катя М., Егорова Анна, Варнавская Галя Т., Зенина Антон. Ром., Таринова Мария, Нистиренкова Зоя окон. контроль. Все Стахановцы. Выполняют 3 нормы в день»

Шедьтэм гильза бордын 67 номер пуктэмын. Со снаряд дасясь базаослэн номерзы. 67 номер улсын Москва улосвылысь Можайскысь база лыдъяськиз, кудзэ 1941-тӥ арын Удмуртиысь Пугачёвое эвакуацие келязы. Отчы ужаны быдэс шаерысьтымы 180 нылкышноосты басьтӥзы.

Со пумысен милемлы Мер палатаысь Фаиль Фаизович Ибрагимов (Удмуртиысь «Долг» огазеяськонлэн кивалтӥсез – ред.) жингыртӥз. Со милемлы тӥни озьы вераз но электронной почтаен лэзиз сыӵе гожтэт. Соос малпало, со кышноос Пугачёвоын ужамын шуыса
Алевтина Данилова, Пичи Пурга ёросысь шаертодонъя музейлэн кивалтӥсез

Алевтина Даниловалэн кылъёсызъя, гожтэтын пусъем нылкышноос сярысь мар ке тодон понна соос интернетысь вань сайтъёсты бугыртӥзы ини, форумъёсысь, ёрос архивысь утчазы. Но нокытын тыро-пыдо ивор ӧвӧл.

Ивор сайтэ но, газетэ но сётӥмы ни, Пугачёвоын но выжыоссэс мед утчалозы шуыса тыршиськом. <…> Калык вылэ гинэ осконмы кыле на
Алевтина Данилова, Пичи Пурга ёросысь шаертодонъя музейлэн кивалтӥсез

Туннэ нуналлы Удмуртиысь кун архивлэн сайтэз пыр кыксэ нимез шедьтӥзы ик. Со Вера Александровна Погорелова но Антонина Романовна Зенина. Ужкагазын нылкышноосты 1946-тӥ

Читать полностью

Эгра ёросысь Чутыр черкогуртын паймымон инкуазь кылдонэз – табаньлы укшась йӧэз - пусйизы. Со сярысь «ВКонтатке» мерлыко вотэсысь бамаз улосвыл Гидрометцентрлэн пресс-секретарез Алла Шумихина ивортӥз.

Йӧ табаньёс удмурт пельняньлэн шаераз. Туспуктӥсь Виктор Дудуров Чутыр черкогуртын шер пумиськылӥсь, тунсыко но чебер инкуазь кылдонэз – табань йӧэз – пусйиз
Алла Шумихина, Удмуртиысь Гидрометцентрлэн пресс-секретарез

Алла Шумихина валэктӥз, кызьы сыӵе йӧ пӧрме. Солэн кылъёсызъя, омырын температура 0 градус котырын возиськыку ву вылын векчи йӧ пырыослэсь сӥ кылдыны быгатэ. Собере, лымы усьыку но температура лэзькыку, йӧ сӥ лымы кӧмен шобырске. Тӧл сое юдэсъёслы люкылэ. Тӧл но кезьыт ву со юдэсъёсты волято, озьы соос табаньлы укшаны кутско. 

Йӧ табань Чутрысь тыметын
Йӧ табаньёс Чутырысь тыметын Фото: Виктор Дудоров © https://vk.com/victor_dudorov

Тодэ вайытом, толшоре Ижкарын удмурт выжыкылъёслы но элькунысь тодмо адямиослы сӥзем йӧ скульптураос кылдозы.  

Ижкарын удмурт Stand Up (стендап) клуб усьтӥське. Нырысетӥ пумиськон ӝыт 10-тӥ коньывуонэ ортчоз. Со сярысь ивортодэтъя «Удмуртия» агентстволы клубез радъясь Александр Бикузин вераз.

Нырысетӥез пумиськон ортчоз «эрико микрофон» форматъя. Ужрадэ котькин но пыриськыны быгатэ. Асьсэдыз стендап жанрын эскерыны мылкыд карисьёс пумен люкасько ни, та дырлы дасо пала адями ни
Александр Бикузин, удмурт стендап клубез радъясь

Серемес мадёсъёсын микрофон азе потыны Шаркан, Алнаш, Эгра ёросъёсысь егитъёс дасясько.

Стендапен маскаръяськыны мылкыд каризы арлыдогес улосчиосмы но. Кылсярысь, кырӟасьлэн Андрей Корниловлэн атаез Вячеслав Корнилов озьы ик мылкыд кариз улонысьтыз серемес учыръёсыз сярысь вераны. Озьы ик пыриськозы студентъёс
Александр Бикузин, удмурт стендап клубез радъясь

Солэн верамезъя, стендап клуб толэзьлы быдэ люкаськылоз. Азьланяз ог 5-10 маскарчиосын концерт но возьматыны малпанъёс вань.

Туннэлы удмурт сцена вылын стендап жанрен ужась артистъёс ӧвӧл, маскарчиосты но, Вячеслав Цветной сяна, бадӟым сцена вылысь адӟыны уг луы. Удмурт стендап клуб, оскиськом, юморын выль кизилиосты усьтоз
Александр Бикузин, удмурт стендап клубез радъясь

Нырысетӥез пумиськон «Пужей» ресторанын ортчоз. Пыронэз 100 манет. Александр Бикузин верамъя, люкам коньдонэз устоез комик басьтоз.  

Тодэ вайытом, 2020-тӥ арын Пичи Пурга ёросын «Удмурт гурт stand up» вожвылъяськон но фестиваль ортчытозы

Армиослэн калыккуспо шудонъёссы улсын Танк биатлонлэн йылпумъян эстафетаяз вормем Россилэсь командазэ ӵошатсконъёслы Пичи Пургаын вордскем Леонид Петров дасяз. Кунмылэн сборноез ӝоглыкъя рекорд пуктӥз. Со сярысь ужрадлэн сайтаз ивортэмын.

Вань быръён ӵошатсконъёсты ортчыса, финал Россиысь, Белоруссиысь, Казахстанысь но Азербайджанысь командаос потӥзы.

Россилэн сборноез ӝоглыкъя выль рекорд пуктӥз – часкын 84 иськем

24 мишень пӧлысь 21-зэ ворсаса (тужгес умой ыбылон Россилэн сборноез нырысетӥ луиз. Трассаез ортчыны кунысьтымы танкистъёс 1 час 33 минут 20 секунд быдтӥзы. Кыкетӥ инты басьтӥзы белорусъёс – 1 час, 41 минут 19 секунд, Казахстанлэн командаез куинетӥ луиз – 1 час 53 минут 44 секунд.

Пусъём, 2017-тӥ арын Леонид Петров Танк биатлонын ӵошатскись сямын вормиз вал.

ВАТСАН

Армиослэн витетӥ калыккуспо шудонъёссы улсын «Танк биатлон – 2019» вожвылъяськон 3-17 гудырикошконэ Москва улосвылысь Алабиноын «Патриот» паркын ортчизы. Ӵошатсконъёсы Европаысь, Африкаысь, Азиысь но Латин Америкаысь 23 сборнойёс люкаськизы. Нош Шудонъёслэн 32 вожвылъяськонъёсаз 39 кунъёсысь 223 команда пыриське.

«Бурановские бабушки» коллектив Mortal Kombat («Смертельная схватка») фильмысь кырӟанэз быдэстӥз. Ялон роликез поттӥз ТНТ4 телеканал. Уй-нуналскын Ютубын сое 92 сюрслэсь трос пол учкизы.

Пусъёмы, роликез кылдытонэ кыкетӥез коллектив пыриськиз, со али быдэс Россиетӥ но кунгожсьӧртӥ ветлэ. Нырысетӥез коллектив, кудӥз 2012-тӥ арын Евровидениын 2-тӥ инты басьтӥз, та дыре черкогуртысьтызы гинэ сцена вылэ пота на. Табере соос «Брангуртысь песянайёс» нимасько. Выль коллективын ӧнерлыко артисткаос но вань.

Ялон роликын «песянайёс» кырӟам сяна, ожгар нюръяськонысь куд-ог инъетъёсты но возьмато. Кылсярысь, одӥгез артистка Саб-Зироез нокаутэ келя.

ТНТ4 feat. Бурановские Бабушки - Mortal Kombat


Мерлыко вотэсъёсысь удмурт мемъёсын но комиксъёсын бичет люказ огез удмурт азьветлӥсь Александр Бикузин.  Кызьы со вераз иворъёсъя «Удмуртия» агентстволэн корреспондентэзлы, тросэз соос аслаз ик малпамъёсыз луо.

Бичетэ 73 серемес суредъёс пыризы.

«Соос 100 луысалзы, дыр, ӧй ни утча, ӧй шедьты. Нош таосыз пӧлысь 90 процентэз «Иворъёс» группаысь («ВКонтакте» мерлыко вотэсысь — ред.), озьыен, мынамъёсыз», — вераз Александр Бикузин.

Солэн кылъёсызъя, тросэз мемъёс 3–4 ар талэсь азьло «Иворъёс» группае лыдӟисьёсты кыскон понна лэсьтэмын ини. Озьы ик солэн малпанэз вылэм будӥсь пиналъёслы удмурт кыл котькыӵе ӧрын кулэ но кутӥськыны быгатэ шуыса возьматыны.

«Мемъёс, анекдотъёс, комиксъёс — котьку тунсыко. Суред вылын лэчыт но серемес верам тунсыко луэ. <…> «Шӧкыч» рубрикаез («Удмурт дунне» газетысь — ред.) но тросэз шумпотыса учко-лыдӟо ук, татын но», — валэктӥз со.

Вераны кулэ, серемес суредъёсты лэсьтон амалэз Александр Бикузин ӟуч вотэс бамъёсысь адӟем карем.

Удмурт кылын мемъёс

10 фото

2017-тӥ арын Глаз ёросысь кивалтӥсьёс кыкетӥ фамилия - Донды - басьтозы. 2-тӥ тулыспалэ со сярысь ивор «ВКонтакте» мер вотэсын потӥз. Кызьы валэктӥз иворъёсъя «Удмуртия» агентстволы Глаз ёрос администрациысь лулчеберетъя но егитъёслэн политиказыя ёзэтлэн кивалтӥсез Светлана Коротаева, со «Лулчеберетъя но туризмъя ДондыДор парк» но «Глаз музъем — Дондылэн музъемез» ӵектосъёсты улонэ пыӵатон улсын удмурт батырлэсь нимзэ вӧлмытонъя серемкыл луэ. 

«Ӵӧж» лобе. Со тунсыкъятон понна «ӵӧж» гинэ вал. Донды бордын ужаськом бере, кызьы ке но солы саклык висъятоно ук. Нимтулмес воштыны ум малпаське. Номыре но сыӵе-таӵе малпаськем ӧвӧл. Так гинэ, серекъян гинэ со
Глаз ёросысь лулчеберетъя но егитъёслэн политиказыя ёзэтэн кивалтӥсь Светлана Коротаева

Солэн кылъёсызъя, таӵе малпан Глаз ёросысь лулчеберетъя но туризмъя центрен кивалтӥсьлы Евгений Баженовлы Ижкаре кенешонэ мынон-ветлонзы дыръя лыктӥз.

«Сюресмы кузь ук, кык но ӝыны час, куинь час мынӥськом Ижкарозь. Сокема ик берен бертӥськомы. Маке но вераськоно ук. <…> Вераськонъямы огез мылкыд сётӥсьмы Евгений Баженов шуэ: «Усто луысал ас нимтулэд борды ватсаса, кылсярысь, Баженов-Донды карыны». Серекъям, серекъям соку машинаын. Нош со ӵуказеяз лыктӥз но «ВКонтакте» вотэсэ кутскиз, гожтӥз. Пост куштӥз Глаз ёросысь администрациын ужасьёс нимтулзы борды Донды кыкетӥ нимтул басьтозы шуыса. Собере мукетыз ӧнерчимы лыктӥз, дизайнермы, но шуэ: «Мар сокем огшоры. Ойдолэ паспортъёстэс туспуктыса отчы ватсалом». Люказ куинь муртмылэсь паспортмес, лэсьтӥз отчы Донды ватсаса но тӥни», — малпанзылэсь кылдэмзэ валэктӥз Глаз ёросысь лулчеберетъя но егитъёслэн политиказыя ёзэтэн кивалтӥсь.

Серекъятэк верано ке, «Лулчеберетъя но туризмъя ДондыДор парк» но «Глаз музъем — Дондылэн музъемез» ӵектосъёс бордын ужан али азинске. Соос, Коротаевалэн верамезъя, туж трос инты басьто ужазы: ужрадъёс ортчытъяло, мерлыко вотэсъёсын вӧлмытӥсько, коньдон утчало.

Тодэ вайытом, шор дауръёсысь лулчеберетъя но историяя «ДондыДор» паркез Удмуртиын 2018-тӥ арын усьтыны чакламын. 2016-тӥ арын ӵектос «Культурная мозаика: партнерская сеть» Росси конкурсын вормисе потӥз.  

Фото: vk.com (Центр культуры и туризма Глазовского района)
«ДондыДор» парклэн люкетэз                                                      Фото: vk.com (Центр культуры и туризма Глазовского района)

Наверх
Вниз