Ижкар-1 °C
17 шуркынмон 2019 Воскресенье
16+

Атайлэсь нуналзэ нырысьсэ пусъёзы Удмуртиын 20-тӥ коньывуонэ

  • 300
  • 0
Ижкар / Удмуртия
Атайлэсь нуналзэ нырысьсэ пусъёзы Удмуртиын 20-тӥ коньывуонэ
Туспуктэм: Григорий Фомин

20-тӥ коньывуонэ Удмуртиын нырысьсэ Атайлэсь нуналзэ пусъёзы. Ижкарын ортчоно ужрадъёс сярысь журналистъёслы кар администрацилэн тӧроезлэн воштӥсез Дмитрий Чистяков ераз.

Солэн кылъёсызъя, Атайлэсь нуналзэ элькунын котькуд ар коньывуонлэн куинетӥ арнянуналаз пусъёзы.

Туннэ пуктэт юнматымтэ на, оскисько, со кинюртэмын луоз. Озьы ке но, ми со ужрадэз ортчытыны дасяськиськомы ини
Дмитрий Чистяков, Ижкар администрацилэн тӧроезлэн мерлыко политикая воштӥсез, Удмуртиысь атайёслэн кенешсылэн кивалтӥсез

Атайлэн нуналэз азьын Ижкарысь школаосын «Мынам атае» акци ялӥзы. Дышетскисьёс атайёссы сярысь пичи фильмъёс дасяло, котькуд школа одӥг узе возьматоз. Вожвылъяськонын вормисьёсты 20-тӥ коньывуонэ пусъёзы.

Валтӥсь ужрадъёс Нылпи творчествоя юртын радъяськозы. Отын пленарной кенешон ортчоз. Пумиськонэ Россиысь атайёслэн огазеяськонзылэсь кивалтӥсьсэ Юрий Солёновез но мукет федерал куноосты ӧтизы. Отын ортчем ужрадъёслы йылпумъянъёс лэсьтозы но вуоно ӵектосъёсын тодматозы. Соос визьноданэн, инкуазез утёнэн, спортэн но мукет удысъёсын герӟаськемын луозы. Со сяна, мукет улосвылъёсысь экспертъёс асьсэ ужан амалъёссы сярысь вераны быгатозы.

Куноос понна мастер-классъёс но тренингъёс ортчозы. Ижкарын улӥсьёсты нылъёссылы причёска лэсьтыны но быдэс семьялы пӧраны дышетозы. Атайлэсь нуналзэ пусйыны мылкыд карисьёсты 11 часлы ӧтё.

Дмитрий Чистяковлэн верамезъя, Удмуртиысь атайёслэн кенешсы Атайлэн нуналэзлы йылол кылдытыны малпа. Озьы 20-тӥ коньывуонэ элькунын ӟеч ужъёслы арня кутскоз – мыло-кыдо атайёс ӟечлэсьтон ӵектосъёсы пыриськозы

Ватсалом, туэ оштолэзе элькунын «Удмуртиысь атайёслэн кенешсы» мер огазеяськон кылдӥз. Солы кивалтӥсе Дмитрий Чистяковез бырйизы. Али огазеяськонлэн президиумаз 27 адями лыдъяське, нош Ижкарысь Кенеш 500 атайёс пырисько.

Удмуртиысь атайёслэн кенешсы кылдэм дырысен воргоронъёс трос ӵектосъёсты улонэ пыӵатӥзы. Ижкарысь Киров нимо паркысь фан-зона вӧзын 100 кедръёс мерттӥзы. Пыласькон интыосын, нылпи лагерьёсын, шутэтскон интыосын но азбаръёсын эрикрадэз чаклан понна «Атайёслэсь патрульзэс» кылдытӥзы. Озьы ик хоккеен шудонъя но азбар шудонъёсъя ӵошатсконъёс радъяло. Нош алигес нырысь Россиын семьяен футбол шудонъя турнир ортчиз.

Азямы пуктэм ужпумъёс пӧлын нырысетӥез – пиналъёсмылэн кышкыттэмлыксы. <…> Кыкетӥез – семьяосты огазеясь ужрадъёсты азинтон
Дмитрий Чистяков, Ижкар администрацилэн тӧроезлэн мерлыко политикая воштӥсез, Удмуртиысь атайёслэн кенешсылэн кивалтӥсез

Тодэ вайытом, толсуре Ижкарын «2019-тӥ арлэсь песятайзэ» быръёзы

Наши партнеры

Наверх
Вниз