Ижкар-4 °C
27 -тӥ толшор 2021 Вирнунал
18+

Нылпи садэ ветлӥсь пиналъёслы удмурт кылын хрестоматиос поттӥзы Удмуртиын

  • 132
  • 0
Ижкар / Удмуртия
Нылпи садэ ветлӥсь пиналъёслы удмурт кылын хрестоматиос поттӥзы Удмуртиын
Туспуктэм: Константин Вознесенских

«Удмуртия» книгапоттонниын нылпи садэ ветлӥсь пиналъёслы удмурт кылын «Зарни бугор» хрестоматиос поттӥзы. Со сярысь ивортодэтъя «Удмуртия» агентстволэн корреспондентэзлы издательствоысь дышетон литературая валтӥсь редактор Татьяна Воронова вераз.

Хрестоматиосты кылдытон бордын Удмурт Элькунысь Дышетон удысысь йӧскалык ужпумъёсты эскеронъя тодос институтысь ӧнерчиос Елена Николаева, Анна Бородина но Мария Алексеева ужазы. Нырысь ик ӧнерчиос визьнодасьёслы «Зарни бугор» нимо ик дышетонъя но методикая бичет лэсьтӥзы. Нош табере - соос борды хрестоматиос. Соос тямыс книгаен потӥзы.

Маин таос ог-огзылэсь пӧртэмесь? <…> Котькуд кык книга, нырысетӥ но кыкетӥ люкетэз, сӥземын одӥг арлыдлы. Тани, шуом, нырысетӥез сӥземын куинь-ньыль аресъем нылпиослы. Кызьы группаос нылпи садъёсын люкисько арлыдзыя, озьы ик тани та хрестоматиос но
Татьяна Воронова, «Удмуртия» книгапоттонниысь дышетон литературая валтӥсь редактор

Арлыдзыя сяна, книгаос темаоссыя, ӧръёссыя висъясько. Татьяна Вороновалэн кылъёсызъя, соос тодонлыксэс юнматонлы, чеберлыкез валанзэс азинтонлы но юнматонлы, тазалыксэс утьыны но юнматыны дышетонлы, калыкын астэ возьыны быгатонлы но нылпиослэсь удмурт кылзэс азинтонлы люкемын.

Нылпиослы «Зарни бугор» хрестоматиос

7 фото

Книгае гожтосъёс сяна, пӧртэм шудонъёс но пыризы.

Соос мукет бичетъёсысь басьтэмын. Тросэз асэнызы ик лэсьтэмын. Тани Елена Аркадьевна Николаевалэн трос гинэ сыӵе шудонъёсыз. Но соос печатламын ӧвӧл на али. Сыӵе шудонъёс чиньы-пӧлыоссэс пиналъёслэсь выретыны, соос капчиесь, кыӵе ке но кылъёс бырйыса шудыны
Татьяна Воронова, «Удмуртия» книгапоттонниысь дышетон литературая валтӥсь редактор

Озьы ик хрестоматиосы визькылъёс, лэчыткылъёс, вазиськонъёс, фольклор люкетъёс сюризы. Татьяна Вороновалэн верамезъя, отчы туж узыр материал пыриз. Соин ик книгаосты визьнодасьёс сяна, школаын дышетӥсьёс но ужазы кутыны быгатозы.

Ӧнерчи пусйиз, хрестоматиосты кылдытӥсьёс книгаосы пыртэм куд-ог гожтэмъёсты асьсэос но гожъяллязы. Уго нимаз темаослы тупась удмурт текстъёс шедьтыны куд-ог дыръя туж шуг.

Трос гинэ сыӵе ужъёс. Чеберлыко произведениос сярысь вераськон ӧвӧл. Шуом, садикен тодматскон. Куинь аресъем пинал лыктэ но отын солы верало кыӵе ӧнерчиос ужало нылпи садын. Со визьнодасьёс, дӥськут миськисьёс, сиён пӧзьтӥсьёс. Сыӵе пичигес текстъёс пыртылэмын тӥни со садикын ужась адямиослэн ужзы сярысь
Татьяна Воронова, «Удмуртия» книгапоттонниысь дышетон литературая валтӥсь редактор

Хрестоматиослэн бамъёсыз яркыт буёло суредъёсын, пиналъёслы киязы кутымон, тунсыко пӧрмизы.

Выль суредъёсмы бордын ужазы Татьяна Немцева, Анна Закревская. Тросэз суредъёс пыремын архивысьтымы, малы ке шуоно дырмы туж ӧжыт вал, нош суредасьлы трос дыр кулэ. Нош вылбамъёссэ лэсьтӥз милям дизайнермы Анна Закревская
Татьяна Воронова, «Удмуртия» книгапоттонниысь дышетон литературая валтӥсь редактор

Книгаослэн вылтуссы сярысь верано ке, соос котькуд арлыдлы нимаз буёлэн висъямын. Нылпи будэмъя, книгалэн вылтусыз но воштӥське.

Хрестоматилэн быдӟалаез оглом 900 бам котыр луиз. Татьяна Вороновалэн верамезъя, нырысь ик сое одӥг книгаен поттыны малпало вал. Но нылпиослэн кышкыттэмлыксы сярысь малпаськыса, но учкыны каньыл мед луоз шуыса котькуд арлыдлы кык люкетэн поттыны кариськизы.

Хрестоматиос 1 сюрс 500 пала тиражен потӥзы. Соосты книгаосты курон гожтэм ужъюртъёсы келялозы.

Азьланяз хрестоматиос вӧзы ужан тетрадъёс но поттыны чаклало

Тодэ вайытом, визьнодасьёслы дышетонъя но методикая «Зарни бугор» комплект кылем ар пумын поттӥзы вал.



Наверх
Вниз