Ижкар-1 °C
26 -тӥ толшор 2021 Пуксён
18+

Россиысь дышетонъя министрлэн воштӥсез дышетӥсьёсты ӧнерлыкъя азинтон но йӧскалык дышетон ужпумъёсты эскериз Удмуртиын

  • 83
  • 0
Ижкар / Удмуртия
Россиысь дышетонъя министрлэн воштӥсез дышетӥсьёсты ӧнерлыкъя азинтон но йӧскалык дышетон ужпумъёсты эскериз Удмуртиын
Туспуктэм: Удмуртиысь дышетонъя но тодосъя министерстволэн пресс-службаез

25-тӥ толсуре Удмуртие Россиысь калыкез дышетонъя министрлэн воштӥсез Виктор Басюк вуылӥз. Элькун министерствоысь, дышетонъя ужъюртъёсысь ӧнерчиосын ӵош со элькунысь дышетӥсьёсты ӧнерлыкъя азинтон но йӧскалык дышетон ужпумъёсты эскериз. Ивортодэтъя «Удмуртия» агентстволэн кивалтӥсез Ижкарысь Кузебай Герд нимо гимназиын ортчем пумиськонэ вуылӥз.

Милемлы туннэ валаны кулэ, кызьы дышетӥсьёсты ӧнерлыкъя азинтон сӧзнэт пуктэмын, со пӧлын элькунлэсь улосвыл аспӧртэмлыкъёссэс, анай кылэз дышетонэз лыдэ басьтыса. Росси азьмурт шор ёзо дышетонъя устоосыз дас кунъёс пӧлы пырыны ужпум пуктӥз. Со понна дышетонлэсь ӟечлыксэ будэтоно. Отын валтӥсь инты басьтэ дышетӥсь. Соин ик туннэ милям ужпуммы, дышетӥсьёсты азинтонъя сыӵе сӧзнэт кылдытыны, кудӥз дышетӥсьлы быгатонлыкъёссэ ялан будэтыны юрттоз
Виктор Басюк, Россиысь калыкез дышетонъя министрлэн воштӥсез

Виктор Басюк Глазкарысь дышетӥсьёсты дасянъя институтэ но вуылӥз. Солэн верамезъя, дышетсконни туж умой мылкыд кельтӥз. Солэн туж юн йылолъёсыз вань, уката ик визьнодан, этнокультура ласянь.

Озьы ик умоен пусйиз Кузебай Герд нимо гимназиез. Отын удмурт кылэз, лулчеберетэз нылпи садысен кутскыса дышето. Татын пиналъёсты дышето солы, мар выжыосын, генетикаен сётэмын. Со йылолъёсты утён духовно-нравственной визьноданлы, вордскем шаерез гажаны дышетонлы инъет луэ, вераз Виктор Басюк. Солэн кылъёсызъя, сыӵе уж сӧнзнэт амалэн нуиськыны но элькунысь дышетонъя министерствоен радъяськыны кулэ.

Милям ужпуммы – утьыны калык культурая, кылъя югдурез, кытын пинал со кылын вераськыны мед быгатоз, пиналъёс анай кылынызы мед вераськозы. Сое утён понна, семьяосын анай кылын вераськыны кулэ, кыӵе ке конкурсъёс, праздникъёс радъяны кулэ. Дышетон огазеяськонъёсын сыӵе югдурез утьыны кулэ
Ирина Крохина, Удмуртиысь дышетонъя но тодосъя министрлэн воштӥсез

Гимназилэн кивалтӥсез Татьяна Волкова верамъя, туннэ соослэн 736 пиналъёс пӧлысь удмурт кылэз 10-эз гинэ уг дышето. Со анай-атайёсын ужамлэн ужъемышез, угось али ӵапак соос быръё, кыӵе кылэз анай кыл чотын дышетоз нылпизы.

Тросэз анай-атайёс быръё ӟуч кылэз анай кыл чотын, малы ке шуоно соос малпало, ӟучез анай кыл чотын дышетэм сётоз соослы луонлык умойгес сётыны ЕГЭ. Но Виктор Стефанович милем валэктӥз тазы: анай-атайёсын ужаны кулэ, валэктыны, со ЕГЭ-лы ватсаса дасян ӧвӧл шуыса, <...> Мон вераны быгатӥсько, анай кылэз дышетон зэмзэ но куанергес нылпиез уг лэсьты. Верано ке гимназия сярысь, ӟуч кылъя ЕГЭ-эз нылпиос туж вылӥ сёто: куинь ар ӵоже 76-77 шор балл - со туж бадӟым балл.
Татьяна Волкова, Кузебай Герд нимо йӧскалык гимназилэн кивалтӥсез

Вить ар талэсь азьло анай кылэз дышетон одно дышетоно предметъёс пӧлы пыриз. Виктор Басюк верамъя, анай кылъёсты дышетонъя огъя концепция вань, но со бордын трос ужано на. Удмуртия ӟеч ужъемышъёс возьматэ кылъёсъя ужан программаосты но, учебникъёсты но дасян ласянь, пусйиз федерал министрлэн воштӥсез. Тодэ вайытом, удмурт кылъя но литературая 5-11 классъёслы удмурт кылъя но литературая федерал лыдметэ пыртыны ӵектӥзы, матысь нуналъёсы сое быдэстэмез возьмало. Покчи классъёслы учебникъёс азьвылгес пыртэмын ни.

Методика ласянь сыӵе рос-прос уж нуэмен ваньмыз кылъёс ушъяськыны уг быгато, соин ик та ласянь Удмуртиын вань марлы дышетскыны
Виктор Басюк, Россиысь калыкез дышетонъя министрлэн воштӥсез

Удмуртиысь Дышетон удысысь йӧскалык ужпумъёсты эскеронъя тодос институтлэн кивалтӥсез Надежда Ураськина верамъя, мукет улосвылъёсысь ужъюлтошъёссы вазиськыло ни ужан амалъёсынызы тодматыны курыса.

Ми туннэ кышкатэк но вераны быгатӥськом, что быгатомы возьматыны сое мукет элькунъёслы но: авторъёс - учебникъёссэс, тодон-валанзэс методика удысын, выль технологиосты кызьы кутӥськомы, кызьы электрон учебникъёс туннэ дасясько, кыӵе амалъёсъя
Надежда Ураськина, Удмуртиысь Дышетон удысысь йӧскалык ужпумъёсты эскеронъя тодос институтлэн кивалтӥсез

Со дыре ик Надежда Ураськина учебникъёс гожтӥсь авторъёсты дышетыны нокытын шуыса ужпумез ӝутӥз.

Тани выль ми доры лыкто специалистъёс, кытын соосты дышетоно, кызьы кутскыны дышетыны, нокытын но сыӵе курсъёс уг сёто, нокытын но сыӵе институтъёс ӧвӧл. Соин ик мон та юанэз ӝутӥ, хотя бы кыӵе ке но курсъёс ортчытъяны, соослы куронъёс пуктыны, книга гожъясьёслы, кыӵе со куронъёс СанПиНъя, кыӵе туала учебник луыны кулэ. Виктор Стефанович оскытӥз, сыӵе курсъёс малпаськомы шуыса радъяны. Малпаськом, со умой луысал, радъяськысалзы ке яке Москваын, яке Питерын, но самой зол, кызьы ми валамы, научной потенциал МГУ-ын
Надежда Ураськина, Удмуртиысь Дышетон удысысь йӧскалык ужпумъёсты эскеронъя тодос институтлэн кивалтӥсез

Тодэ вайытом, алигес Удмуртиын нылпи садэ ветлӥсь пиналъёслы удмурт кылын «Зарни бугор» хрестоматиос вуизы, нош азьвылгес визьнодасьёслы дышетонъя но методикая «Зарни бугор» комплект поттӥзы. Со сяна, туэ сӥзьыл пӧртэм классъёсын пиналъёслэсь удмурт кылъя но литературая тодонлыкъёссэс эскерон но дунъян методика пособиос потӥзы. Нош 2021-тӥ арын Удмуртиын удмурт кылэз но литератураез дышетонъя ивортодэт но дышетон портал ужаны кутскоз



Наверх
Вниз